ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ވިންޑް ވޯރިއާސްގެ އަމާޒަކީ ހުރިހާ ތަށިތައް ނެގޭވަރުގެ ޓީމަކަށް ވުން

Wind Warriors ge amaazaky hurihaa thashithah negeyvaruge team akah vun

ވިންޑް ވޯރިއާސްއިން މެންގްރޫވް އައިލެންޑް ޗެމްޕިއަންޝިޕްގެ ރަނަރަޕްކަން ހޯދުމަށްފަހު -- ފޮޓޯ/ކެނދިކުޅުދޫ ކައުންސިލް

14 ޖުލައި 2023

އަންނަ އޮގަސްޓް މަހުގެ އެއްވަނަ ދުވަހު ނ. ކެނދިކުޅުދޫގައި ފަށައި ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ޗެލެންޖް 2023 ގައި ވާދަކުރާ ވިންޑް ވޯރިއާސްގެ އަމާޒަކީ ބައިވެރިވާ ހުރިހާ މުބާރާތަކުންވެސް ތަށި ނެގޭ ވަރުގެ ޓީމަކަށް ވުން ކަމަށް އެ ޓީމުގެ ސީނިއާ ޕްލޭޔަރު އަދި ފައުންޑިންގް މެމްބަރެއް ކަމަށްވާ ހުސައިން ނާއިފް (ނާއްޕެ) ބުނެފިއެވެ.

ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕަކީ މި ފަހުގެ ތާރީހެއްގައި ނޫނު އަތޮޅުގައި ބޭއްވޭ އެންމެ ބޮޑު ފުޓްސަލް މުބާރާތެވެ. ފަސް ރަށަކުން ޖުމުލަ 10 ޓީމު ވާދަކުރާ މި މުބާރާތަކީ ކުލަބުތަކަށް ހުޅުވާލައިގެން ވެސް އަތޮޅުގައި ދުވަސްގަނޑަކަށް ފަހު ބޭއްވޭ އެންމެ ފުރަތަމަ މުބާރާތެވެ. ނޫނު އަތޮޅުގެ ރަށްތަކަށް އަމާޒުކޮށްގެން ބާއްވާ މި މުބާރާތް ބޭއްވުމަށް ހަމަޖެހިފައިވަނީ ކެނދިކުޅުދޫގެ ފުޓްސަލް ދަނޑުގައެވެ. މިއީ މި ނަމުގައި މުޅިން އަލަށް ބާއްވާ މުބާރާތެކެވެ. މި މުބާރާތް އިންތިޒާމުކޮށް ހިންގާނީ ކެނދިކުޅުދޫއަށް ނިސްބަތްވާ ރިޒޯޓް ބޯއީސްގެ ޓީމުން އިސްނަގައިގެންނެވެ

މި މުބާރާތުގައި ބައިވެރިވުމަށް ހުޅުވާލި ފުރުސަތު ބައިވެރިވި 10 ޓީމެއްގެ ނަން ރިޒޯޓް ބޯއީސް ފުޓްސަލް މުބާރާތުގެ އިންތިޒާމީ ކޮމިޓީއިން މިހާރު ވަނީ އިއުލާން ކޮށްފައެވެ. އެގޮތުން ފަސް ރަށަކުން ޓީމުތައް ބައިވެރިވާ އިރު، މުބާރާތުގެ ފޯރި އިތުރަށް ގަދަވާނެ ކަމަށާއި، އަމާޒަކީ މުބާރާތް ވީހާވެސް ވާދަވެރިކޮށް ކުރިއަށް ގެންދިއުން ކަމަށް ރިޒޯޓް ބޯއީސް ފުޓްސަލްގެ އިންތިޒާމީ ކޮމީޓިން މައުލޫމާތު ދެޔެވެ.

މި މުބާރާތުގައި ކެނދިކުޅުދޫއިން ފަސް ޓީމަކަށް ވާދަކުރާއިރު، ވިންޑް ވޯރިއާސްއަކީ މި މުބާރާތަށް ވަރުގަދައަށް ތައްޔާރުވާ ޓީމެކެވެ. އަދި ފައިނަލްގައި އެއްކޮޅުން ކުޅުމުގެ އަމާޒުގައި އެ ޓީމުން މުބާރާތަށް ނުކުންނަ އިރު، ބައިވެރިވާ ހުރިހާ މުބާރާތަކުން ތަށި ނެގޭވަރު ޓީމަކަށް މި ޓީމު ވާނެ ކަމަށް ނާއްޕެ ވަނީ ބުނެފައެވެ.

ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023 އާ މެދު ދެކެނީ ކިހިނެތް؟

"މި މުބާރާތާއި މެދު ދެކެނީ މިހާތަނަށް މި ރަށުގައި ބޭއްވިފައި ނުވާކަަހަލަ، މުޅި އަތޮޅަށް ހުޅުވާލައިގެން ބާއްވާތީ ވަރަށް ވާދަވެރިވާނެ މުބާރާތެއްގެ ގޮތުގައި. ކެނދިކުޅުދޫގައި މި މުބާރާތް ބާއްވާތީ ކެނދިކުޅުދޫ ރައްޔިތެއްގެ ހައިސިއްޔަތުން ވަރަށް ފަޙުރުވެރިވޭ،" ނާއްޕެ ބުންޏެވެ.

"ދެން މި އޮޕޮޗުނިޓީއަކީ ނ އަތޮޅުގެ ހުރިހާ ރަށަކާއި، ރިޒޯޓްތަކަށް ވެސް ފުރުސަތު ދީގެން ބާއްވާ މުބާރާތެއް. އެހެންވީމާ މުބާރާތް ވަރަށް ޗެލެންޗިންގް މުބާރާތަކަށް ވާނެ ކަމަށް ގަބޫލުކުރަނީ،"

މުބާރާތާއި މެދު ޓީމުގެ އުންމީދުތަކަކީ ކޮބާ؟

"ޓީމުގެ އުންމީދަކީ ފައިނަލުގައި އެއްކޮޅުން ކުޅުން. އިންޝާﷲ"

މި މުބާރާތް ކާމިޔާބުކުރުން ވެގެންދާނީ ޓީމުގެ މުސްތަގުބަލަށް ކިހާ މުހިއްމު ކަމަކަށް؟

"އަހަރަމެން ވިންޑް ވޯރިއާސްއިން މުބާރާތްތައް ކުޅެން ފެށިފަހުން މިއީ ތިންވަނަ މުބާރާތް. ފުރަތަމަ މުބާރާތް އަހަރަމެން ދިޔައީ އެންމެން ނުލައި. ވިންޑް ވޯރިއާސްގެ ވަރަށް މުހިއްމު ކުޅުންތެރިންތަކެއް ނުލައި އެފަހަރު ދެން ބައިވެރިވީ، އެކަމަކު ދެން އަހަރަމެން މެންގްރޫވް އައިލެންޑް މުބާރާތުގައި ބައިވެރިވީ ވިންޑް ވޯރިއާސްގެ އެންމެ ރަނގަޅަށް ކުޅޭ ކުޅުންތެރިންތައް ލައިގެން. އެފަހަރު އެ މުބާރާތުގެ ފައިނަލްގައި ކުޅެފައި އަހަރަމެން މި މުބާރާތާއި މި ކުރިމަތިލަނީ."

"މިއަހަރު މި މުބާރާތް ނެގިއްޖެޔާ އަންނަ އަހަރުގެ މެންގްރޫވް ކަޕް އިންޝާﷲ އެ ތަށި ނަގާނަން،"

"މިހާރު ރަށުގައި އެންމެ ވަރުގަދަ ކުލަބަކީ ކޮމެޓްސް. ކޮމެޓްސްއިން އެ އަންނަނީ ހުރިހާ ތަށިތަކެއް ނަގަމުން. އެކަހަލަ ޓީމެއްގެ ގޮތުގައި ވުން އެއީ ވަރަށް ބޮޑު އުންމީދެއް. ކޮމެޓްސްއާ ވިއްދާފައި ނުކުތުން އެއީ އަހަރަމެންގެ އަމާޒެއް."

އަތޮޅުތެރޭގައި ކްލަބްގެ ވާދަވެރިކަން އޮތުން އެއީ ކިހާ މުހިއްމު ކަމެއް؟

"އެއީ ވަރަށް މުހުއްމި ކަމެއް."

ފައިސާގެ ބޮޑެތި އިނާމުތަކެއް ވެސް ކަނޑައަޅާފައިވާ މި މުބާރާތް ދެ ގުރޫޕަކަށް ބަހާލައިގެން ކުރިއަށް ގެންދަން ރާވާފައިވާ އިރު ސެމީއަށް ދަތުރު ކުރާނީ ގުރޫޕް ސްޓޭޖުގައި އެންމެ ގިނަ ޕޮއިންޓް ހޯދާ ދެ ޓީމެވެ. އެގޮތުން ޓީމުތައް ބަހާލާނީ ފަސް ޓީމުގެ ދެ ގުރޫޕަށެވެ.

މި މުބާރާތުގެ ޓައިޓަލް ސްޕޮންސަރުންނަކީ މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯނީގެ އިތުރުން އިއްސޭ ފިޝިންގްއެެވެ. އަދި ސަޕޯޓިންގް ޕާޓުނަރުންގެ ގޮތުގައި އެފްސީ ރޮބިންސިއާ ހިމެނެއެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.