އިންޑިއާ ސިފައިން ތިބި ވާހަކަ ކުރިން ދެއްކީ އިދިކޮޅުގައި ތިބެގެން ސަރުކާރަށް އަންނަން: އަދުރޭ

އިންޑިއާ ސިފައިން ރާއްޖޭގައި ތިބި ބާހަކަ ކުރިން ދެއްކީ އިދިކޮޅުގައި ތިބެގެން ސަރުކާރަށް އަންނަން ކަމަށް ޕީއެންސީގެ ރައީސް އަދި ރައީސް ޑރ. މުހައްމަދު މުއިއްޒުގެ އެޑްވައިޒަރ އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.

މިރޭ ޕީޕީއެމް - ޕީއެންސީ ކޯލިޝަނުން ކުރިއަށް ގެންދިޔަ ސެނެޓް ބައްދަލުވުމަށްފަހު ނޫސްވެރިންނާ ވާހަކަ ދެއްކެވުމަށް އެ ދެ ޕާޓީގެ ވެރިން ބޭއްވި ބައްދަލުވުމުގައި ނޫސްވެރިން ވަނީ އިންޑިއާ ސިފައިން ރާއްޖޭގައި ތިބި އަދަދު ސަރުކާރުން ހާމަނުކުރާ ސަބަބު އޮޅުން ފިލުވުމަށް ސުވާލުތައް ކޮށްފައެވެ. ނަމަވެސް މިރޭގެ ޖަލްސާއަކީ ސަރުކާރުގެ ވެރިންގެ ހައިސިއްޔަތުން ދޭ ޕްރެސްއެއް ނޫން ކަމަށާއި މިއީ ޕީއެންސީ/ޕީޕީއެމްގެ ސެނެޓް ބައްދަވުމުގެ ނިންމުންތަކަށް ބާއްވާ ބައްދަލުވުމެއް ކަމަށް އެ ބައްދަލުވުމުގައި ވާހަކަ ދެއްކެވި އަދުރޭ ވަނީ ތަކުރާރުކޮށް ވިދާޅުވެފައެވެ.

އެހެން ނަމަވެސް ސަރުކާރާ ހަވާލުވުމުގެ ކުރިން ޕީޕީއެމް އަދި ޕީއެންސީގައި ތިބެގެން ހަމަ މިހާރު އޮތް ލީޑާޝިޕުން އެވާހަކަ އޭރު ދެއްކެވީ ކީއްވެތޯ ނޫސްވެރިޔަކު ކުރި ސުވާލަށް ޖަވާބު ދެއްވަމުން އަދުރޭ ވިދާޅުވީ ކުރިން އެވާހަކަ ދެއްކީ އިދިކޮޅުގައި ތިބެގެން ސަރުކާރަށް އަންނަން ކަމަށެވެ.

Advertisement

"އެދުވަހު އަޅުގަނޑުމެން މަސައްކަތް ކުރީ އިދިކޮޅުގައި ތިބެގެން ސަރުކާރަށް އަންނަން. އަޅުގަނޑުމެން ދެއްކީ ރަނގަޅު ވާހަކަ. އިންޑިއާ ސިފައިން އެބަތިބި ރާއްޖޭގައި." މިރޭގެ ޕްރެސްގައި އަދުރޭ ވިދާޅުވިއެވެ.

ރައީސް މުއިއްޒު ހުވާކުރެއްވިތާ ދެ ދުވަސް ފަހުން ސަރުކާރުން ވަނީ ރާއްޖޭގައި ގާއިމުވެ ތިބީ 77 އިންޑިއާ ސިފައިން ކަމަށް ބުނެފައެވެ. ކުރީ ސަރުކާރުން 75 އިންޑިއާ ސިފައިން ރާއްޖޭގައި ތިބި ކަމަށް އޭރު ބުނި ނަމަވެސް ރައީސް މުއިއްޒު އަދި ޕީޕީއެމް/ޕީއެންސީއިން އޭރު ބުނަމުން ގެންދިޔައީ އެތައް ހާސް ސިފައިންނެއް ރާއްޖޭގައި ތިބި ކަމަށެވެ.

ނަމަވެސް މިހާރު ރައީސް މުއިއްޒު ވިދާޅުވަމުން ގެންދަވަނީ ރާއްޖޭގައި ތިބި އިންޑިއާގެ ސިފައިންގެ އަދަދު ސާފު ނޫންކަމަށާއި، އެކި އިދާރާތަކުން ބުނަނީ އެކި އަދަދުތައް ކަމަށެވެ. މިކަމުގެ ސަބަބުން ސަރުކާރަށް އަންނަނީ ގިނަބަޔަކު ފާޑު ކިޔަމުންނެވެ.