ދަރަނިވެރިވެފައި އޮތް ފުރަތަމަ ޑިވިޝަން ކުލަބުތަކަށް ސަރުކާރުން 5 މިލިއަން ރުފިޔާ ދީފި

ކޮންމެ ކްލަބަކަށް 500،000 ރުފިޔާގެ މަގުން، ދިވެހި ޕްރިމިއާ ލީގުގައި ވާދަކުރާ ކްލަބްތަކަށް ސަރުކާރުން 5 މިލިއަން ރުފިޔާ ޖަމާކޮށްދީފައިވާ ކަމަށް އަޑުފެތުރިއްޖެއެވެ.

ސަރުކާރުން ނިންމާފައި އޮތީ ކޮންމެ ކްލަބަކަށް 1.5 މިލިއަން ރުފިޔާ ދޭށެވެ. މި 500،000 ރުފިޔާއަކީ މީގެ ފުރަތަމަ އިންސްޓޯލްމަންޓެވެ.

ސްޕޯޓްސް މިނިސްޓްރީގެ އޮފިޝަލަކު ވަނީ މިދިޔަ އާދީއްތަ ދުވަހު ފައިސާ ޖަމާކުރިކަން ރާއްޖޭގެ ނޫހެއް ކަމަށްވާ 'މިހާރު' އަށް ކަށަވަރުކޮށްދީފައި ކަމަށް އެ ނޫހުން ވަނީ މިއަދު ރިޕޯޓްކޮށްފައެވެ.

Advertisement

މި ފައިސާއަކީ އާ ސީޒަނަށް ތައްޔާރުވާން ކްލަބްތަކަށް ދިން އެހީއެކެވެ. އެކަމަކު އަދިވެސް އާ ސީޒަން ފަށާނެ ދުވަހެއް ޔަގީނެއް ނުވެ އެވެ. ސީޒަނަށް ޕްރެކްޓިސް ފެށީ ހަމައެކަނި މާޒިޔާ އިންނެވެ.

އެފްއޭއެމުން ވެސް މި އަހަރު ކްލަބްތަކަށް 10 މިލިއަން ރުފިޔާ ދިނުމަށް ކުރިން އޮތީ ނިންމައިފަ އެވެ. ކޮންމެ ކްލަބަކަށް އެއް މިލިއަން ރުފިޔާގެ މަގުން އެކި މަރުހަލަތާކަށް ބަހާލައިގެން އެ ފައިސާ ދިނުމަށް ނިންމީ ނޯމަލައިޒޭޝަން ކޮމިޓީގެ ކުރީގެ ޗެއާމަން އަހްމަދު ޒުހޫރުގެ ޗެއާމަންކަމުގަ އެވެ.

އެކަމަކު ޒުހޫރު ކުރިން ވިދާޅުވެފައި ވަނީ ކްލަބްތައް ހިންގަން ފައިސާ ދިނުމަކީ އެފްއޭއެމުން ކުރަން ޖެހޭނެ ކަމެއް ނޫން ކަމަށެވެ. އަދި ފީފާއިން ވެސް އެކަމަށް ތަރުހީބު ނުދޭ ކަމަށް ޒުހޫރު ވިދާޅުވެފައިވެ އެވެ

އަނެއްކޮޅުން ފީފާ އިން މިހާރު ވަނީ އެ މަގާމުން ޒުހޫރު ވަކިކޮށްފަ އެވެ. އާ ރައީސް އަހުމަދު މުއިއްޒުގެ ވިސްނުން އަދި ސާފެއް ނުދެ އެވެ.

އެފްއޭއެމް އޮތީ ވެސް ބޮޑު ދަރަންޏެއްގައި، ބަނގުރޫޓުވުމާ ގާތުގަ އެވެ. އެގޮތުން އެ އެސޯސިއޭޝަންގެ ދަރަނި 160 މިލިއަން ރުފިޔާއާ ގާތް ކުރެ އެވެ.