"ދި މެންގުރޫވް އައިލޭންޑް ފުޓްބޯލް ޗެންޕިއަންޝިޕް 2024" މުޅި ރާއްޖެއަށް ހުޅުވާލައިފި

ނ.ކެނދދިކުޅުދޫ ކައުންސިލުން އިންތިޒާމް ކުރާ ފުޓްބޯޅަ މުބާރާތް "ދި މެންގުރޫވް އައިލޭންޑް ފުޓްބޯލް ޗެންޕިއަންޝިޕް" މި އަހުރު މުޅި ރާއްޖެއަަށް ހުޅުވާލައިފިއެވެ.

ވޭދުވެ ދިޔަ އަހަރުތަކުގައި މި މުބާރާތަކީ ހަމަ އެކަނި ކެނދިކުޅުދޫގެ ޓީމްތަކަށް ޙާއްސަކޮށްގެން ބާއްވަމުން އައި ސިލްސިލާ މުބާރާތެކެވެ. އެހެން ނަމަވެސް މުބާރާތުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއްކޮށް، 2024 ވަނަ އަހަރުގެ މުބާރާތް މި ވަނީ މުޅި ރާއްޖެއަށް ހުޅުވާލާފައެވެ. މި އަހަރުގެ މުބާރާތުގެ ޤަވާއިދު ބުނާ ގޮތުން މުބާރާތުގައި ބައިވެރިވާ ޓީމްތަކަށް، ކޮންމެ ރަށަކަށް ނިސްބަތްވާ ކުޅުންތެރިން ވެސް ނުވަތަ ބިދޭސީ ކުޅުންތެރިން ވެސް ހިމެނުމުގެ އިޚްތިޔާރު އެބައޮތެވެ.

ރާއްޖޭގެ ކޮންމެ ކުލަބް ޖަމިއްޔާ ޖަމާއަތަކަށް ވެސް ބައިވެރިވެވޭ ގޮތަށް ހުޅުވާލެވިފައިވާ މި މުބާރާތް ފެށުމަށް ހަމަޖެހިފައިވާ ތާރީޚަކީ 23 އޭޕްރީލް 2024 ވާ އަންގާރަ ދުވަހުއެވެ. މުބާރާތުގެ ޗެންޕިއަން ޓީމަށް 75،000 ރުފިޔާ އަދި ރަނާރސް އަޕް ޓީމަށް 25،000 ދިނުމަށް ވަނީ ކަނޑައެޅިފައެވެ.

Advertisement

 މި މުބާރާތް މުޅި ރާއްޖެއަށް ހުޅުވާލި އެންމެ ބޮޑު މަޤްސަދަކީ ކުޅިވަރުގެ ސަބަބުން ރަށުގެ އިޤްތިޞާދު ރަނގަޅު ކުރުމާއި، ރަށަށް ގިނަ މެހެމާނުން ގެނައުމުގެ އިތުރުން، ފުޓްބޯޅައިގެ ފޯރި ރަށުގައި ނަގަހައްޓާ ވާދަވެރި މުބާރާތެއްގެ ފުރުސަތު ޒުވާނުންނަށް ފަހިކޮށް ދިނުން ކަމުގައި ކައުންސިލްގެ ރައީސް މުޙައްމަދު ރަޢޫފް ވިދާޅުވިއެވެ.

ކައުންސިލްގެ ރައީސް އިތުރަށް ވިދާޅުވީ، ރަށުން ބޭރުން އަންނަން ބޭނުންވާ ޓީމްތަކަށް ދަތިތަކެއް ހުރި ކަން ފާހަގަ ކުރެވިފައިވާ ކަމަށާއި، އެގޮތުން އެކޮމަޑޭޝަންގެ ކަންތައްތަކަށާއި، ދަތުރުގެ އިންތިޒާމްތަކަށް ލުޔެއް ހޯދުމުގެ މަސައްކަތް ކުރެވެމުންދާ ކަމަށް އަދި އެކަންކަމަށް ހައްލެއް ހޯދައިދެވޭނެކަމުގެ އުންމީދު ކުރާކަމަށެވެ.

މުބާރާތުގައި ރަޖިސްޓާވުމަށް އޮންލައިން ފޯމް ފުރިހަމަކޮށްލުމުން ރަޖިސްޓާރ ވެވޭނެއެވެ. އަދި މުބާރާތުގެ އެންމެ ފަހުގެ އަދާހަމަ މަޢުލޫމާތު މުބާރާތުގެ ސޯސަލް މީޑީއާ ޕޭޖްތަކުން ލިބިގެންދާނެއެވެ.

ރަޖިސްޓްރޭޝަން ލިންކް

ފޭސްބުކް ޕޭޖް

އޭގެ އިތުރުން މުބާރާތުގެ ސުޕޮންސާރޝިޕްއަށް ވެސް މިހާރު ވަނީ ހުޅުވާލެވިފައެވެ. ޝައުޤްވެރިވާ ފަރާތްތަކުން ކައުންސިލްށް ގުޅުއްވާ (6560013) ނުވަތަ އީމެއިލް ([email protected]) ކުރަށްވައިގެން އެކަމުގެ މަޢުލޫމާތު ސާފް ކުރެވޭނެކަމަށް ކެނދިކުޅުދޫ ކައުންސިލުން މަޢުލޫމާތު ދިނެވެ.