އިވާންގެ ފަސް ގޯލާއެކު ވިންޑްވޯރިއާސް ބަލިކޮށް ނައިފަރު ޗެލްސީ އެއްވަނައަށް

TMIFC2024: Ivange fas goalaa eku wind warriors balikoh naifaru chelsea ehvana ah

ފޮޓޯ: ސިޑިބަރި

30 އެޕްރީލު 2024

ކުއާރޒޯ ދި މެންގްރޫވް އައިލެންޑް ފުޓުބޯޅަ ޗެމްޕިއަންޝް 2024ގައި ވާދަވެރި ވިންޑްވޯރިއާސް ފަސޭހަކަމާއެކު ބަލިކޮށް ނައިފަރު ޗެލްސީއިން ގުރޫޕް ބީގެ އެއްވަނައިގެ ގޮތުގައި ސެމީ ފައިނަލަށް ދަތުރުކޮށްފިއެވެ.

މިރޭ ކެނދިކުޅުދޫ ފުޓުބޯޅަ ސްޓޭޑިއަމުގައި ކުޅުނު މެޗުން ވިންޑް ވޯރިއާސްގެ މައްޗަށް ނައިފަރު ޗެލްސީން ކުރި ހޯދީ 2-6 ގެ ނަތީޖާއަކުންނެވެ. މި މޮޅާއެކު ކުޅުނު ހުރިހާ މެޗެއްވެސް ކާމިޔާބުކޮށް ނައިފަރުން ސެމީ ފައިނަލަށް ދަތުރު ކުރީ 12 ޕޮއިންޓާއެކުއެވެ. އެ ގުރޫޕުގެ ދެވަނައިގައި އޮތީ ވިންޑް ވޯރިއާސްއެވެ. މި ގުރޫޕްގެ ސެމީގެ ފަހު ޖާގަ ޔަގީންވާނީ މަނަދޫ އަދި ވިންޑް ވޯރިއާސް ބައްދަލު ކުރާ މެޗަށްފަހުއެވެ.

މިރޭގެ މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު، ދެ ޓީމުންވެސް ވަނީ ރަނގަޅަށް ޑިފެންސްކޮށްގެން ކުޅެފައެވެ. މެޗުގައި ފުރަތަމައިން ގޯލު ޖަހައި ލީޑު ނެގީ ވިންޑް ވޯރިއާސްއިންނެވެ. ވިންޑް ވޯރިއާސްގެ އަބްދުﷲ ޔާމީން (ޔާނު) ނަގައިދިން ހުރަހަކުން އެ ގޯލު ކާމިޔާބު ކޮށްދިނީ ނާއިޒް ހަސަން (ދާދު) އެވެ.

ދާދުގެ ގޯލާއެކު ވިންޑް ވޯރިއާސް ހަމަޖެހިލި ވަގުތު ލިބުނު ކައުންޓާ އެޓޭކެއްގައި އިވާން ވެރަސް ވަނީ ނައިފަރު ޗެލްސީއަށް ނަތީޖާ ހަމަހަމަ ކޮށްދީފައެވެ. އެ ހާފު ނިމުނީ 1-1 ގެ ނަތީޖާއަކުން އެއްވަރު ވެގެންނެވެ.

ދެވަނަ ހާފު ފަށައިގެން ވިންޑް ވޯރިއާސްއިން ވަނީ ގޯލެއް ޖަހައި މެޗުގައި ދެވަނަ ފަހަރަށް ލީޑު ނަގައިފައެވެ. އެ ގޯލަކީ އެ ޓީމަށް ލިބުނު ހިލޭ ޖެހުމަކުން ޔާނު ނަގައިދިން ބޯޅައަކުން އައިސަމް ޖަހައިދިން ގޯލެކެވެ. ވިންޑް ވޯރިއާސްއިން ލީޑު ނެގިތާ މާގިނައިރުތަކެއް ނުވަނީ އިވާން ވަނީ ދެވަނަ ގޯލެއް ޖަހައި ނައިފަރު ޗެލްސީއަށް އެއްވަރުކޮށްދީފައެވެ.

ނައިފަރުން ދެވަނަ ފަހަރަށް އެއްވަރު ކުރި ލަނޑާއެކު އެ ޓީމުން ވަނީ ހިތްވަރު ލިބިގަނެ ގިނަ ހަމަލާތަކެއް އުފައްދައިފައެވެ. އެގޮތުން ގިނަ ކޯނަރުތަކެއް ނައިފަރަށް ވަނީ އެ ހާފުގައި ލިބިފައެވެ. ކޯނަރެއްގެ ފައިދާ ނަގައި ޚަލީލް ގަމާލް ނައިފަރަށް ލީޑު ނަގައިދިން އިރު، ބާކީ ތިން ގޯލުވެސް އެ ޓީމަށް ޖަހައިދިނީ އިވާން ވެރަސްއެވެ. މި މެޗުގައި އޭނާ ފަސް ގޯލު ޖަހާފައިވާއިރު، މިއީ އިވާން މި މުބާރާތުގައި ޖެހި 11 ވަނަ ގޯލެވެ. މިވަގުތު މުބާރާތުގެ ޓޮޕް ސްކޯރާއަކީވެސް އޭނާއެވެ.