ސެންޓޭއާއި ނަސޫހުގެ ހެޓްރިކުން ޅޮހީގެ މައްޗަށް ހިންނަވަރުން ބޮޑު މޮޅެއް

ކެނދިކުޅުދޫގައި މިހާރު ކުރިއަށްދާ ދި މެންގްރޫވް އައިލެންޑް ފުޓްބޯޅަ ޗެމްޕިއަންޝިޕް 2024 ގެ ފަސްވަނަ މެޗުގައި ޅޮހީ އެފްސީ އަތުން ހިންނަވަރު ސްޕޯޓްސް ކުލަބު ބޮޑު މޮޅެއް ހޯދައި، ފެންވަރު ދައްކާލައިފިއެވެ. 

ކެނދިކުޅުދޫ ފުޓްބޯޅަ ސްޓޭޑިއަމުގައި މިއަދު ހަވީރު ކުޅުނު މެޗުގައި ޅޮހީގެ މައްޗަށް ހިންނަވަރު ޓީމުން ކުރި ހޯދީ 0-11 ގެ ބޮޑު ނަތީޖާއަކުންނެވެ. މިއާއެކު ހިންނަވަރުން ވަނީ ގުރޫޕް އޭގެ ތާވަލުގެ އެއްވަނައަށް ޖެހިލައިފައެވެ. ކުޅުނު ދެ މެޗުން ވެސް ހޯދި މޮޅާއެކު ހިންނަވަރު އެއްވަނައިގައި އޮތް އިރު ދެވަނައިގައި އޮތީ މާޅެންދޫ އެފްޓީއެވެ.

މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގެ ފުރަތަމަ މެޗުގައި ކޮމެޓްސް އަތުން ހިންނަވަރު ކުރި ހޯދި އިރު، މިއަދުގެ މެޗަށްވެސް އެ ޓީމުން ނުކުތީ ސްޓާ ސްކޮޑަކާއެކުއެވެ. ގައުމީ ޓީމުގެ ކުޅުންތެރިންނާއެކު ހިންނަވަރުން މިއަދުގެ މެޗުގައި މޮޅު ކުޅުމެއް ވަނީ ދައްކައިފައެވެ.

Advertisement

ފުރަތަމަ ހާފު ފަށައިގެން ހިންނަވަރުން ދިޔައީ އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލާތަކެއް އުފައްދަމުންނެވެ. އެގޮތުން އަލީ ފާސިރު (ސެންޓޭ) ދުރުން ފޮނުވާލި ހަމަލާތައް ގޯލާ އަމާޒުނުވެ ދިޔައިރު، އަލީ ނަސޫހު ރަޝީދު ވަނީ އެ ހާފުގެ ކުރީކޮޅު ހިންނަވަރަށް ލީޑު ނަގައިދީފައެވެ.

ޅޮހީ ޓީމުން އޮފްސައިޑެއް ކަމަށް ނިންމައިގެން ތިއްބާ ނަސޫހު ގޮސް ޖަހައިދިން ގޯލުން ހިންނަވަރަށް އިތުރު ހިތްވަރެއް ލިބިގެން ދިޔައިރު، ނަސޫހު ވަނީ އެ ހާފު ނިމުމުގެ ކުރިން އިތުރު ގޯލެއް ޖަހައި ފަރަގު ބޮޑުކޮށްފައެވެ. ނަސޫހުގެ އެ ގޯލަކީ އޭރިއާ ބޭރުން އޭނާ ފޮނުވާލި ބާރު ހަމަލާއަކުން ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކުރި ގޯލެކެވެ.

ދެވަނަ ހާފު ފަށައިގެން މާގިނައިރުތަކެއް ނުވަނީސް ނަސޫހު ވަނީ އޭނަގެ ތިންވަނަ ގޯލުވެސް ކާމިޔާބުކޮށް ހެޓްރިކް ހަދައިފައެވެ. މިއީ މި މުބާރާތުގައި މިފަހަރު ހެދި ފުރަތަމަ ހެޓްރިކެވެ. ހެޓްރިކަށްފަހު ނަސޫހު އިތުރު ގޯލެއް ކާމިޔާބުކޮށް ހަތަރު ގޯލަށް ފަރަގު ބޮޑުކުރި އިރު، ސެންޓޭ ވަނީ އެ ފަހުން ކައިރި ކައިރީގައި ދެ ގޯލު ޖަހައިފައެވެ.

އޭގެ ފަހުން ބަދަލު ކުޅުންތެރިއެއްގެ ގޮތުގައި ކުޅެން ނުކުތް އަބްދުﷲ މިސާލް މުހައްމަދު ވަނީ ގޯލެއް ކާމިޔާބުކޮށްފައެވެ. އަދި މެޗު ނިމުމުގެ ކުރިން ހުސައިން ނިޔާޒް ވެސް ވަނީ ގޯލެއް ޖަހައިދީފައެވެ. ނިޔާޒުގެ ގޯލަށްފަހު ސެންޓޭ އިތުރު ގޯލެއް ޖަހައި އޭނަގެ ހެޓްރިކް ފުރިހަމަކުރި އިރު، 10 ވަނަ ގޯލަކީ ވިޖާޒް އީސާފުޅުއެވެ. ހިންނަވަރުން ޖެހި ފަހު ގޯލު އެ ޓީމަށް ޖަހައިދިނީ ހުސައިން ނިޔާޒުއެވެ.

މި މުބާރާތުގައި މިރޭ ވެސް މެޗެއް ކުޅުމަށް ވަނީ ހަމަޖެހިފައެވެ. އެ މެޗުގައި ބައްދަލު ކުރާނީ މާޅެންދޫ އެފްޓީ އަދި މާފަރު އެފްޓީއެވެ.