ރަނގަޅު ހިތްވަރެއް ކުރި ޑީޓޫ ބަލިކޮށް ވިންޑް ވޯރިއާސް ކުރިއަށް

ކުއާރޒޯ ދި މެންގްރޫވް އައިލެންޑް ފުޓުބޯޅަ ޗެމްޕިއަންޝިޕް 2024 ގައި މިރޭ ކުޅުނު މެޗުގައި ރަނގަޅު ހިތްވަރެއް ކުރި ޑީޓޫ ސްޕޯޓްސް ކުލަބުގެ މައްޗަށް ވިންޑް ވޯރިއާސް އިން ކުރި ހޯދައިފިއެވެ.

ކެނދިކުޅުދޫ ފުޓުބޯޅަ ސްޓޭޑިއަމުގައި މިރޭ ކުޅުނު މެޗުން ޑީޓޫގެ މައްޗަށް ވިންޑް ވޯރިއާސް ކުރި ހޯދީ 1-6 ގެ ނަތީޖާއަކުންނެވެ. މި ނަތީޖާއާއެކު ވިންޑް ވޯރިއާސް ވަނީ ގުރޫޕް ބީ ގެ ދެވަނައަށް ޖެހިލައިފައެވެ. ކުޅުނު ދެ މެޗުންވެސް މޮޅުވެ ވިންޑް ވޯރިއާސް ދެވަނައިގައި އޮތީ ފައިދާ ގޯލުގެ ތަފާތުންނެވެ. އެއްވަނައިގައި އޮތީ މިއަދު ހަވީރު ކުޅުނު މެޗުން މޮޅުވި ނައިފަރު ޗެލްސީއެވެ.

މިރޭގެ މެޗު ފަށައިގެން ވިންޑް ވޯރިއާސްއިން ވަނީ މެޗުގެ ހަތަރުވަނަ މިނަޓުގައި ލީޑު ނަގައިފައެވެ. އެ ގޯލު އެ ޓީމަށް ކާމިޔާބުކޮށްދިނީ މުހައްމަދު ނާއިމްއެވެ. އެއަށްފަހު ވެސް ނާއިމްއަށް އެ ހާފުގައި ލަނޑު ޖަހާނެ ރަނގަޅު ހުސްފުރުސަތެއް ލިބި ވަނީ ބޭކާރުވެފައެވެ. އެ ހާފުގައި ވިންޑަށް ލީޑު ފުޅާކޮށްދިނީ ނާއިޒް ހަސަން (ދާދު) އަށް ކުރި ފައުލަކާ ގުޅިގެން ލިބުނު ޕެނަލްޓީއަކުން އަބްދުﷲ ޔާމީން (ޔާނު) އެވެ.

Advertisement

ވިންޑް ވޯރިއާސްގެ ދެ ގޯލަށްފަހު ޑީޓޫއިން ކުޅުން ރަނގަޅުކޮށް ހަމަލާތަކެއް އުފައްދަން މަސައްކަތް ކުރިއެވެ. އަދި މުހައްމަދު ވަހީދު (ކޮކީ) ގެ ހިތްގައިމު ލަނޑަކުން އެ ހާފު ނިމުމުގެ ކުރިން ޑީޓޫއިން ވަނީ ފަރަގު ކުޑަކޮށްފައެވެ.

ދެވަނަ ހާފު ފަށައިގެން ޑީޓޫއިން ވަނީ މޮޅަށް ކުޅެ، ގިނަ ހަމަލާތަކެއް އުފައްދައިފައެވެ. އެގޮތުން މުހައްމަދު އަލީ (މުލާ) ގެ ދިގު ޖެހުންތަކުން ރަނގަޅު އެޓޭކްތަކެއް އުފައްދާފައިވާއިރު، އެ ޓީމުހެ ފަރާތުން ވަރުބަލިކަން ވަރަށް ބޮޑަށް ވަނީ ފެނިފައެވެ. އެގޮތުން ކައިރި ކައިރީގައި ބަދަލުތަކެއް ކުރަން ޖެހުމުން ޓީމަށް އުނދަގޫތަކެއް ކުރިމަތިވި ވަގުތު ވިންޑް ވޯރިއާސްއިން ވަނީ ލީޑު ފުޅާކޮށްފައެވެ.

ވިންޑް ވޯރިއާސްއިން އެ ހާފުގައި ޖެހި ގޯލުތައް ކާމިޔާބު ކުރީ ޝަނާން ރަޝީދު، ދާދު އަދި އިބްރާހިމް އައިސަމްގެ އިތުރުން ޔާނުއެވެ.

މާދަމާ ހަވީރުވެސް މުބާރާތުގައި މެޗެއް ކުޅޭނެއެވެ. އެ މެޗުގައި ކުޅޭނީ ހިންނަވަރު އަދި މާފަރު އެފްސީއެވެ.