މަނަދޫ ކައިރިން ޑީޓޫއަށް މުބާރާތުގެ ފުރަތަމަ މޮޅު

ނ.ކެނދިކުޅުދޫގައި މިހާރު ކުރިއަށްދާ ކުއާޒޯ ދިމެންގުރޫވް އައިލޭންޑް ޗެންޕިއަންޝިޕް 2024ގެ، 15 ވަަނަ މެޗުގައި ނ. ހެނބަދޫގެ ޑީޓޫ ސުޕޯޓްސް ކުލަބުން މަނަދޫ ސުޕޯޓްސް ކުލަބުގެ މައްޗަށް މުބާރާތުގައި އެޓީމުގެ ފުރަތަމަ މޮޅު ހޯދައިފިއެވެ.

މި ދެޓީމުން ވެސް މުބާރާތުގައި މިހާތަނާށް 3 މެޗް ކުޅެފައިވާއިރު 2 ޓީމަށް ވެސް މުބާރާތުގައި މި ވަނީ 1 މޮޅު ލިބި އަނެއް 2 މެޗުން ބަލިވެފައެވެ. ވާދަވެރި ކުޅުމެއް ފެނިގެންދިޔަ މިމެޗުގައި ލަނޑު ޖަހާ ލީޑް ނެގީ ޑި ޓޫ ސުޕޯޓްސް ކުލަބުންނެވެ. އެ ޓީމުގެ ފުރަތަމަ ލަނޑު ކާމިޔާބު ކޮށްދިނީ ޖޯޒީ ނަންބަރު 17 އަހަމަދު އަލީ (މުލާ) އެވެ. 

މެޗުގެ ދެ ވަނަ ހާފުގައި 2 ޓީމުން ވެސް ކުޅުން ވަރަގަދަކޮށް ގިނަ ހަމަލާތަކެއް އުފައްދާފައިވެއެވެ. މެޗުގެ 66 ވަނަ މިނެޓުގައި ޑީޓޫ ސުޕޯޓްސް ކުލަބަށް ލީޑް ފުޅާ ކޮށްދިނީ ކައުންޓާރ އެޓޭކުގައި މުޙައްމަދު ވަހީދު (ކޮކީ)ގެ މޮޅު ކުޅުމުގެ ތެރެއިން ދިން ޕާހަކުން އެ ޓީމްގު ޖޯޒީ ނަންބަރު 8 ހުސައިން އިބްރާހީމްއެވެ. ޑީޓޫގެ ދެ ގޯލާއިއެކު މަނަދޫ ޓީމުން އިތުރު ހިތްވަރެއްލާ ކުޅުން ރަނގަޅު ކުރިއެވެ. މެޗުގައި މަނަދޫ ސުޕޯޓްސް ކުލަބުގެ ހަމަ އެކަނި ލަނޑު މެޗުގެ 88 ވަނަ މިނެޓުގައި ލިބުނު ޕެނެލްޓީެއަކުން އެ ޓީމަށް ކާމިޔާބުކޮށްދިނީ އިތުބާރު ފޯވާޑް އަލީ ނަސީމް (ދިއްލި)އެވެ.

Advertisement

މުބާރާޓުގައި މެ ދެޓީމަށް ބާކީ އެއް މެޗުއޮތް އިރު، މި ގުރޫޕުގެ ވާދަވެރި މެޗުގައި މިރޭ ބައްދަލު ކުރާނީ ވަރުގަދަ ވިންޑް ވޯރިއާރސް އަދި ނައިފަރު ޗެލްސީއެވެ. މި 2 ޓީމް މިހާތަނަށް ކުޅުނު ހުރިހާ މެޗަކުން ވަނީ މޮޅުވެފައެވެ.