މާޅެންދޫ ބަލިކޮށް ސެމީގެ ޖާގަ ޔަގީންކުރި ފުރަތަމަ ޓީމަކަށް ހިންނަވަރު

ކުއާރޒޯ ދި މެންގްރޫވް އައިލެންޑް ޗެމްޕިއަންޝިޕް 2024ގައި މާޅެންދޫ އެފްޓީ ބަލިކޮށް ހިންނަވަރު ސްޕޯޓްސް ކުލަބުން ސެމީ ފައިނަލުގެ ފުރަތަމަ ޖާގަ ޔަގީންކޮށްފިއެވެ.

ކެނދިކުޅުދޫ ފުޓުބޯޅަ ސްޓޭޑިއަމުގައި މިރޭ ކުޅުނު މެޗުން މާޅެންދޫގެ މައްޗަށް ހިންނަވަރު ކުރި ހޯދީ 2-4 ގެ ނަތީޖާއަކުންނެވެ. މި މޮޅާއެކު ކުޅުނު ހަތަރު މެޗު ވެސް ކާމިޔާބުކޮށް ހިންނަވަރުން ވަނީ ގުރޫޕް އޭ ގެ އެއްވަނައިގެ ގޮތުގައި ސެމީގެ ޖާގައެއް ކަށަވަރުކޮށްފައެވެ. މިއަދުގެ ނަތީޖާއާއެކު މާޅެންދޫއަށް ވަނީ އަމިއްލަ ބާރު ގެއްލިފައެވެ. މާާޅެންދޫއަށް ސެމީގެ ޖާގައެއް ދެން ލިބޭނީ ޅޮހީ އެފްސީން މާފަރާ ދެކޮޅަށް ކުޅޭ މެޗުން މޮޅުވުމާއެކު ކޮމެޓްސް އާ ދެކޮޅަށް ކުޅޭ މެޗުން މާޅެންދޫ މޮޅުވެގެންނެވެ.

މިރޭގެ މެޗު ފަށައިގެން ހިންނަވަރުން ރަނގަޅު ހަމަލާތަކެއް އުފައްދަމުން ދިޔައިރު، 10 ވަނަ މިނަޓުގައި މާޅެންދޫ ޓީމުގެ އަޒުފާން މޫސާއަށް ހިންނަވަރުގެ ކީޕަރު ހުސައިން އަހުމަދު ކުރި ފައުލަކާ ގުޅިގެން ވަނީ ޕެނަލްޓީއެއް ލިބިފައެވެ. އެހެން ނަމަވެސް މާޅެންދޫގެ ކެޕްޓަން މުހައްމަދު ނައުފަލް ފޮނުވާލި ޕެނަލްޓީ އަމާޒުވީ ހުރަސް ދަނޑިއަށެވެ. 

Advertisement

މާޅެންދޫން ޕެނަލްޓީ ނާކާމިޔާބުވިތާ މާގިނައިރުތަކެއް ނުވަނީސް ހިންނަވަރުގެ އަލީ ނަސޫހުއަށް ލިބުނު ހުސް ފުރުސަތެއްގައި އޭނާ ވަނީ ހިންނަވަރަށް ލީޑު ނަގައިދީފައެވެ. މިއީ ނަސޫހު މި މުބާރާތުގައި މިހާތަނަށް ޖެހި އަށް ވަނަ ގޯލެވެ. 

ނަސޫހުގެ ގޯލަށްފަހު ހިންނަވަރުން ރަނގަަޅަށް ކުޅެމުން ދަނިކޮށް މާޅެންދޫގެ އަޒުފާނަށް ހިންނަވަރުގެ ޑިފެންޑަރަކު ކުރި ފައުލަކާ ގުޅިގެން ދެވަނަ ޕެނަލްޓީއެއް ވަނީ އެ ޓީމަށް ލިބިފައެވެ. އެ ޕެނަލްޓީ ކާމިޔާބުކޮށް ފުރަތަމަ ހާފު ނިމުމުގެ ކުރިން ނަތީޖާ ހަމަހަމަކޮށްދިނީ މުހައްމަދު ފަރުހާންއެވެ.

ދެވަނަ ހާފު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނު އިރު، އެ ހާފުގައި ހިންނަވަރަށް މެޗުގައި ދެވަނަ ފަހަރަށް ލީޑު ނަގައިދިނީ މެޗުގެ މޮޅު ކުޅުންތެރިޔާގެ މަގާމުވެސް ހޯދި އަހުމަދު ރާހިލް ރަޝީދު އެވެ. އެއަށްފަހު ނަސޫހުގެ އިތުރު ގޯލަކުން ހިންނަވަރު ހިންދެމިލި އިރު، މެޗު ނިމެންދަނިކޮށް އަބްދުﷲ ޝާފީން ވަނީ ގޯލެއް ޖަހައި މާޅެންދޫއަށް އުންމީދެއް ހޯދައިދީފައެވެ. 

ނަމަވެސް މާޅެންދޫ ޓީމު ކުރިއަށް ޖެހިލި ވަގުތު އަލީ ފާސިރު (ސެންޓޭ) ވަނީ ހިންނަވަރުގެ ހަތަރުވަނަ ލަނޑު ޖަހައިދީފައެވެ.