މާޅެންދޫ ބަލިކޮށް މޮޅަކާއެކު ކޮމެޓްސްއިން ގުރޫޕް ސްޓޭޖް ނިންމާލައިފި

ކުއާރޒޯ ދި މެންގްރޫވް އައިލެންޑް ފުޓުބޯޅަ ޗެމްޕިއަންޝިޕް 2024ގައި މާޅެންދޫ އެފްޓީ ބަލިކޮށް އެންމެ ފަހުގެ ޗެމްޕިއަން ކޮމެޓްސް ސްޕޯޓްސް ކުލަބުން މޮޅަކާއެކު ގުރޫޕް ސްޓޭޖު ނިންމާލައިފިއެވެ.

ކެނދިކުޅުދޫ ފުޓުބޯޅަ ސްޓޭޑިއަމުގައި މިއަދު ކުޅުނު މެޗުން މާޅެންދޫގެ މައްޗަށް ކޮމެޓްސްއިން ކުރި ހޯދީ 0-2 ގެ ނަތީޖާއަކުންނެވެ. މި މޮޅާއެކު ކޮމެޓްސްއިން ވަނީ ވަގުތީ ގޮތުން ގުރޫޕް ތާވަލުގެ ދެވަނައަށް ޖެހިލައިފައެވެ. އެހެން ނަމަވެސް މިރޭ ޅޮހީ އެފްސީއާ ދެކޮޅަށް ކުޅޭ މެޗުން މޮޅުވެގެން މާފަރަށް ގުރޫޕުގެ ދެވަނައިގެ ގޮތުގައި ސެމީ ފައިނަލުގެ ޖާގައެއް ކަށަވަރު ކުރުމުގެ ފުރުސަތު އެބައޮތެވެ. މި ގުރޫޕުގެ އެއްވަނަ ކުޅުނު ހުރިހާ މެޗަކުން މޮޅުވެގެން ހޯދީ ހިންނަވަރު އެސްސީންނެވެ.

މިއަދުގެ މެޗު ފަށައިގެން ކޮމެޓްސްއިން ވަނީ ގާތް ގާތުގައި ގިނަ ހަމަލާތަކެއް މާޅެންދޫގެ ގޯލަށް އަަމާޒުކޮށް ފޮނުވާލައިފައެވެ. އެ ޓީމުގެ މުހައްމަދު އައްޒާމް އަދި ޖުމައިލް ޖަމީލްގެ އިތުރުން ހުސައިން ޝަރީފް ވެސް ރަނގަޅު ހަމަލާތަކެއް އުފެއްދި އިރު، ހުސައިން ޝަރީފް ވަނީ މެޗުގެ ކުރީކޮޅު ކޮމެޓްސްއަށް ލީޑު ނަގައިދީފައެވެ. އެ ހާފުގައި ކޮމެޓްސްއަށް ރަނގަޅު ފުރުސަތުތަކެއް ލިބުނު ނަމަވެސް ރަނގަޅަށް ހަމަލާތަކުގެ ބޭނުން ހިފޭ ގޮތެއް ނުވިއެވެ.

Advertisement

ދެވަނަ ހާފުގައި ކޮމެޓްސްއިން ޖެހި ދެވަނަ ގޯލު އެ ޓީމަށް ޖަހައިދިނީ އަބްދުﷲ ޒައީމް އެވެ. އެ ފަހުން ވެސް ޖުމައިލް އަދި ހުސައިން ޝަރީފްގެ އިތުރުން އައްޒާމް ފޮނުވާލި ހަމަލާތަކެއް ވަނީ ގޯލުގެ ދަނޑިއަށް އަމާޒުވެފައެވެ.

މި މުބާރާތުގައި މިރޭ މާފަރު އެފްސީ އަދި ޅޮހީ އެސްސީ ބައްދަލު ކުރާ މެޗު ފަށާނީ 9:00 ޖަހާއިރުއެވެ.