މާޅެންދޫ ބަލިކޮށް މާފަރުން ފެށުން ރަނގަޅުކޮށްފި

ކުއާރޒޯ ދި މެންގްރޫވް އައިލެންޑް ފުޓުބޯޅަ ޗެމްޕިއަންޝިޕުގައި މާފަރު އެފްސީއިން ކުޅުނު ފުރަތަމަ މެޗުން މާޅެންދޫ އެފްޓީގެ މައްޗަށް ކުރި ހޯދައިފިއެވެ.

ކެނދިކުޅުދޫގެ ފުޓުބޯޅަ ސްޓޭޑިއަމުގައި މިރޭ ކުޅުނު މެޗު ނިމުނީ 2-3 ގެ ނަތީޖާއަކުން މާފަރު އެފްސީއިން ކުރި ހޯދައިގެންނެވެ.

މިރޭގެ މެޗު ފަށައިގެން ގިނަ ހަމަލާތަކެެއް އުފައްދާ މޮޅަށް ކުޅެމުން ދިޔައީ މާފަރު އެފްސީއިންނެވެ. އެގޮތުން އެ ޓީމުގެ އައްޒާމް އަބްދުﷲ (އެޑު) އާއި އަފްރާހް މުހައްމަދު (މެސީ) ވަނީ ކައިރި ކައިރީގައި ރަނގަޅު ހަމަލާތަކެއް އުފައްދައިފައެވެ. ޕްރެސްކޮށްގެން ކުޅުނު މާފަރު ޓީމަށް މެޗުގެ ކުރީކޮޅު ލީޑު ނަގައިދިނީ އެޑުއެވެ. އެޑު އެ ގޯލު ޖެހީ އޭރިއާ ބޭރުގައި ހުރެފައި ފޮނުވާލި ބާރު ހަމަލާއަކުންނެވެ.

Advertisement

މާފަރުން ފުރަތަމަ ގޯލު ޖެހިތާ ގިނައިރުތަކެއް ނުވަނީސް އެ ޓީމަށް ލީޑު ފުޅާކޮށްދިނީ މާޅެންދޫ ޓީމުގެ ޑިފެންސުން ހެދި ގޯހެއްގެ ފައިދާ ނަގައިގެން އަބްދުލް ރައުފްއެވެ. އެ ހާފުގައި މާފަރުން ރަނގަޅު ގިނަ ހަމަލާތަކެއް އުފެއްދި ނަމަވެސް މާޅެންދޫން މާގިނަ ހަމަލާތަކެއް އުފެއްދިފައެއް ނުވެއެވެ.

ދެވަނަ ހާފުގައި މާޅެންދޫ ޓީމުން ކުޅުން ރަނގަޅުކޮށް ހަމަލާތަކެއް އުފައްދާފައިވާއިރު، އެ ޓީމުން ވަނީ ހާފުގެ ކުރީކޮޅު ގޯލެއް ޖަހައިފައެވެ. މާފަރު ޓީމުގެ ކީޕަރަށް ހެދުނު ގޯހެއްގެ ފައިދާ ނަގައި އެ ގޯލު އެ ޓީމަށް ޖަހައިދިނީ ހަސަން ޖަވާދުއެވެ. 

މާޅެންދޫ ޓީމުން ގޯލު ޖަހައި ރަނގަޅަށް ކުޅެން ފެށި ވަގުތު އެ ޓީމުގެ ކީޕަރު އިބްރާހިމް ޚާލިދު އޭރިއާ ބޭރުން އަތް ޖެއްސުމުން އޭނާއަށް ވަނީ ސީދާ ރަތް ކާޑެއް ދައްކައިފައެވެ. އެއްކުޅުންތެރިއަކު މަދުކޮށް ކުޅެމުން އައި މާޅެންދޫއިން އޭގެ އިރަކޮޅެެއް ފަހުން ނަތީޖާ ހަމަހަމަ ކުރީ މާފަރު ޓީމުގެ ޑިފެންސުން ހެދި ގޯހަކާއެކު ބަދަލު ކުޅުންތެރިއެއްގެ ގޮތުގައި ކުޅެން ނުކުތް މޫސާ އަހުމަދުއެވެ.

އެއްވަރުގައި އޮވެގެން މެޗު ނިމެންދަނިކޮށް މާފަރަށް އަނެއްކާވެސް ލީޑު ނަގައިދިނީ މެސީއެވެ.

މުބާރާތުގައި މާދަމާވެސް ދެ މެޗެެއް ކުޅުމަށް ވަނީ ހަމަޖެހިފައެވެ. އެގޮތުން ހަވީރު މެޗުގައި ބައްދަލު ކުރާނީ ކުޑަފަރިއާއި ނައިފަރު ޗެލްސީއެވެ. ރޭގަނޑު މެޗުގައި ވިންޑް ވޯރިއާސް އަދި ޑީޓޫ ސްޕޯޓްސް ކުލަބު ބައްދަލު ކުރާނެއެވެ.