ޅޮހީ ބަލިކޮށް މާފަރު އެފްސީން ސެމީއަށް ދަތުރުކޮށްފި

ކުއާރޒޯ ދި މެންގްރޫވް އައިލެންޑް ފުޓުބޯޅަ ޗެމްޕިއަންޝިޕް 2024 ގައި ޅޮހީ އެސްސީ ބަލިކޮށް މާފަރު އެފްސީއިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

ކެނދިކުޅުދޫ ފުޓުބޯޅަ ސްޓޭޑިއަމުގައި މިރޭ ކުޅުނު މެޗުން ޅޮހީގެ މައްޗަށް މާފަރުން ކުރި ހޯދީ 1-4 ގެ ނަތީޖާއަކުންނެވެ. މި މޮޅާއެކު ކުޅުނު ހަތަރު މެޗުން ނުވަ ޕޮއިންޓް ހޯދައިގެން މާފަރުން ވަނީ ގުރޫޕްގެ ދެވަނައިގެ ގޮތުގައި ސެމީގެ ޖާގައެއް ހޯދައިފައެވެ. އެ ގުރޫޕުން އެއްވަނައިގައި ސެމީއަށް ދިޔައީ ކުޅުނު ހަތަރު މެޗުންވެސް މޮޅުވި ހިންނަވަރު އެސްސީއެވެ.

މިރޭގެ މެޗު ފަށައިގެން މާފަރުން ގިނަވަގުތު ބޯޅަ ހިފަހައްޓައިގެން ކުޅެ، ގިނަ ހަމަލާތަކެއް ދިޔައީ އުފައްދަމުންނެވެ. އެގޮތުން އައްޒާމް އަބްދުﷲ (އެޑު) އާއި އަފްރާހް މުހައްމަދު (މެސީ) ގެ ގިނަ ހަމަލާތަކެއް ޅޮހީގެ ކީޕަރު އަބްދުﷲ މުއާޒް ދިފާއުކުރި އިރު، ލިބުނު ކައުންޓާ އެޓޭކެއްގައި މެޗުގައި ފުރަތަމަ ގޯލު ޖެހީ ޅޮހީ ޓީމުންނެވެ. އެ ގޯލު އެ ޓީމަށް ޖަހައިދިނީ ހަސަން ޔާސިރު އަދުނާންއެވެ.

Advertisement

ޅޮހީގެ ގޯލާއެކު މާފަރު ޓީމުން ކުރިއަށް ޖައްސައި، ފުލުފުލުގައި ގިނަ ހަމަލާތަކެއް އުފައްދާފައިވާއިރު، އެ ޓީމަށް މެޗުގައި ނަތީޖާ ހަމަހަމަ ކޮށްދިނީ ކެޕްޓަން އެޑުއެވެ. މެސީ ނަގައިދިން ކޯނަރަކުން މެސީ ނަތީޖާ ހަމަހަމަކޮށްދިން އިރު، އެ ހާފުގެ އިތުރު ވަގުތު އެޑު ވަނީ ދުރުން ފޮނުވާލި ބާރު ހަމަލާއެެއް ގޯލަށް އަމާޒުކޮށް ލީޑު ފުޅާކޮށްފައެވެ.

ދެވަނަ ހާފު ފަށައިގެން މާފަރު ޓީމުން ހަމަޖެހިލައިގެން ކުޅެމުންދިޔައިރު، އެ ޓީމުގެ އަރާޝް އައްސަދު ވަނީ އެ ހާފުގައި މާފަރަށް ދެ ލަނޑު ޖަހައިދީފައެވެ. 

މުބާރާތުގައި މާދަމާ ހަވީރުވެސް މެޗެއް ކުޅޭނެ އެވެ. އެ މެޗުގައި ބައްދަލު ކުރާނީ ގުރޫޕް ބީގެ ވިންޑް ވޯރިއާސް އަދި މަނަދޫ އެފްސީއެވެ.