ކުޑަފަރި ބަލިކޮށް މޮޅަކާއެކު ޑީޓޫއިން މުބާރާތް ނިންމާލައިފި

ކުއާރޒޯ ދި މެންގްރޫވް އައިލެންޑް ފުޓްބޯޅަ ޗެމްޕިއަންޝިޕް 2024ގެ ގުރޫޕް ސްޓޭޖް ފަހު މެޗުގައި ކުޑަފަރި އެސްސީގެ މައްޗަށް ޑީޓޫ ސްޕޯޓްސް ކުލަބުން ކުރި ހޯދައިފިއެވެ.

ކެނދިކުޅުދޫގެ ފުޓުބޯޅަ ސްޓޭޑިއަމުގައި މިރޭ ކުޅުނު މެޗުން ކުޑަފަރި ޓީމުގެ މައްޗަށް ޑީޓޫއިން ކުރި ހޯދީ 0-2 ގެ ނަތީޖާއަކުންނެވެ. މި މެޗުގެ ނަތީޖާއާއެކު ޑީޓޫއިން ގުރޫޕް ސްޓޭޖް ނިންމާލީ ތާވަލުގެ ތިންވަނައިގައެވެ. ކުޅުނު ހަތަރު މެޗުން ހަ ޕޮއިންޓް ހޯދައިގެން ޑީޓޫއިން މުބާރާތުގައި އުންމީދީ ކުޅުމެއް ދެއްކި އިރު، އެ ގުރޫޕުން ސެމީ ފައިނަލަށް ދަތުރު ކުރީ އެއްވަނައަށް ދިޔަ ނައިފަރު ޗެލްސީ އަދި ދެވަނަ ހޯދި ވިންޑް ވޯރިއާސްއެވެ.

މަނަދޫ އެފްސީގެ މައްޗަށް އެންމެ ފަހު މެޗުގައި ހޯދި ކާމިޔާބީއަށްފަހު މިރޭގެ މެޗަށް ޑީޓޫއިން ނުކުތީ އެ ޓީމުގެ ކެޕްޓަން ހުސައިން އަބްދުﷲ (އުޗީ) ނުހިމަނައެވެ. ކުރީ ދެ މެޗުން ރީންދޫ ކާޑު ލިބުމާއެކު އުޗީ ވަނީ މިރޭގެ މެޗަށް ސަސްޕެންޑް ވެފައެވެ.

Advertisement

މިރޭގެ މެޗުގެ ފުރަތަމަ ހާފު ނިމުނީ 1-0 ގެ ނަތީޖާއަކުންނެވެ. އެ ހާފު ނިމެންދަނިކޮށް މުހައްމަދު ވަހީދު (ކޮކީ) ނަގައިދިން ހުރަހަކުން އެ ގޯލު އެ ޓީމަށް ޖަހައިދިނީ އަލީ ފާއިޒްއެވެ. ދެވަނަ ހާފުގެ ކުރީކޮޅު ކޮކީ ވަނީ ހިތްގައިމު ގޯލެއް ޖަހައި ޑީޓޫއަށް ފަރަގު ބޮޑުކޮށްދީފައެވެ. މިރޭގެ މެޗުގައި މޮޅު ކުޅުމެއް ދެއްކި ކޮކީ ވަނީ މެޗުގެ މޮޅު ކުޅުންތެރިޔާގެ މަގާމުވެސް ހޯދައިފައެވެ.

ގުރޫޕް ސްޓޭޖުގެ ފަހު މެޗާއެކު މާދަމާއަކީ މި މުބާރާތުގައި ބްރޭކް ދުވަހެކެވެ. ސެމީ ފައިނަލްގެ މެޗުތައް އޮންނާނީ އަންނަ ހޮނިހިރުގައެވެ. އެދުވަހު ސެމީގެ ދެ މެޗު ކުޅުމަށް ހަމަޖެހިފައިވާއިރު، ފުރަތަމަ މެޗުގައި ބައްދަލު ކުރާނީ ގުރޫޕް އޭގެ އެއްވަނަ ހޯދި ހިންނަވަރާއި، ގުރޫޕް ބީގެ ދެވަނަ ހޯދި ވިންޑް ވޯރިއާސްއެވެ. ދެވަަނަ މެޗުގައި ބައްދަލު ކުރާނީ ގުރޫޕް ބީގެ އެއްވަނަ ހޯދި ނައިފަރު ޗެލްސީ އަދި ގުރޫޕް އޭގެ ދެވަނަ ހޯދި މާފަރު އެފްސީއެވެ.