ރިޒޯޓް ބޯއީސް ފުޓްސަލް ކަޕުގެ މީޑިއާ ޕާޓުނަރަކަށް ރަށްފުށު އޮންލައިން

އޮގަސްޓް މަހުގެ އެއްވަނަ ދުވަހު ފެށުމަށް ތައްޔާރުވަމުން އަންނަ "ރިޒޯޓް ބޯއީސް ފުޓްސަލް ކަޕް 2023" ގެ އޮފިޝަލް މީޑިއާ ޕާޓުނަރަކަށް ރަށްފުށު އޮންލައިން ހަމަޖައްސައިފިއެވެ.

ނޫނު އަތޮޅުގެ ރަށްތަކަށް އަމާޒުކޮށްގެން ބާއްވާ މި މުބާރާތް ބޭއްވުމަށް ހަމަޖެހިފައިވަނީ ކެނދިކުޅުދޫގެ ފުޓްސަލް ދަނޑުގައެވެ. މިއީ މި ނަމުގައި މުޅިން އަލަށް ބާއްވާ މުބާރާތެކެވެ. މި މުބާރާތް އިންތިޒާމުކޮށް ހިންގާނީ ކެނދިކުޅުދޫއަށް ނިސްބަތްވާ ރިޒޯޓް ބޯއީސްގެ ޓީމުން އިސްނަގައިގެންނެވެ.

މި މުބާރާތުގައި ބައިވެރިވުމަށް ހުޅުވާލި ފުރުސަތު މިހާރު ހަމަވެފައިވާ އިރު 10 ޓީމަކުން ވަނީ ވާދަކުރަން ފޯމު ހުށައަޅައިފައެވެ. އަދި އަންނަ ޖުލައި މަހުގެ ތެރޭ މުބާރާތުގެ ގުރު ނެގުމަށް ހަމަޖެހިފައިވާ ކަމަށް ރިޒޯޓް ބޯއީސްގެ ޓީމުން ވަނީ މައުލޫމާތު ދީފައެވެ.

Advertisement

ފައިސާގެ ބޮޑެތި އިނާމުތަކެއް ވެސް ކަނޑައަޅާފައިވާ މި މުބާރާތް ދެ ގުރޫޕަކަށް ބަހާލައިގެން ކުރިއަށް ގެންދަން ރާވާފައިވާ އިރު ސެމީއަށް ދަތުރު ކުރާނީ ގުރޫޕް ސްޓޭޖުގައި އެންމެ ގިނަ ޕޮއިންޓް ހޯދާ ދެ ޓީމެވެ. އެގޮތުން ޓީމުތައް ބަހާލާނީ ފަސް ޓީމުގެ ދެ ގުރޫޕަށެވެ. 

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.