އާރުބީއެފްސީ 2024: ރާއްޖޭގެ މަޝްހޫރު ކުޅުންތެރިންގެ ފައިނަލެއް، ވާދަ ކުރަނީ ކެނދިކުޅުދޫގެ ދެ ޓީމު!

ރަށު ބޯޅަ ފުޓްސަލް ކަޕް 2024 ގެ ފައިނަލްގައި މިއަދު ހަވީރު ކޮމެޓްސް ސްޕޯޓްސް ކްލަބާއި ސިރަޕް ސްޕޯޓްސް ކްލަބު ބައްދަލު ކުރާނެ އެވެ.

މި ދެ ޓީމުވެސް ނިސްބަތް ވަނީ މުބާރާތް ކުރިއަށް ދާ ރަށް, ނ. ކެނދިކުޅުދޫއަށެވެ.

މިދެޓީމަކީވެސް މިމުބާރާތުގެ ގްރޫޕް އޭގައި ކުޅެފައިވާ ދެ ޓީމެވެ. ގްރޫޕް ސްޓޭޖުގައި މި ދެ ޓީމުގެ ކުރިމަތިލުން 0-4 އިން ކާމިޔާބުކުރީ ކޮމެޓްސްއެވެ. މި ގްރޫޕުގެ އެއްވަނަ ކޮމެޓްސްއިން ހޯދީ ކުޅުނު ހަތަރު މެޗުން މޮޅުވެގެންނެވެ. ދެވަނަ ހޯދި ސިރަޕް ތިން މެޗުން ވަނީ މޮޅުވެފައެވެ.

Advertisement

ސެމީ ފައިނަލުގައި ގުރޫޕް ބީގެ ދެވަނައިގެ ގޮތުގައި ދިޔަ މާފަރު ފުޓްސަލް އަތުން ކޮމެޓްސް މޮޅުވީ 1-3 އިންނެވެ. ވާދަވެރި ކުޅުމެއް ފެނުނު އެ މެޗުގައި ކޮމެޓްސްއިން ގޯލުތައް ޖެހީ ފަހަތުން އަރައެވެ. އަނެއްކޮޅުން ގްރޫޕް ބީގެ އެއްވަނަ ހޯދި ޑީޓޫ ސްޕޯޓްސް އަތުން 0-5 ގެ ނަތީޖާއަކުން ސިރަޕް ވަނީ ސެމީ ފައިނަލުގައި ކުރި ހޯދައިފައެވެ.

މި މުބާރާތުގެ އެންމެ ފަހުގެ ޗެމްޕިއަން ކޮމެޓްސް މިއަދު ނުކުންނާނީ އެ ޓީމުގެ 14 ވަނަ ތަށި ހޯދުމަށެވެ. 1998 ވަނަ އަހަރު ވުޖޫދުވި އެ ކުލަބު މިހާތަނަށް 13 ތަށި ހޯދާފައިވާއިރު, އަނެއްކޮޅުން ފައިނަލުގައި ވާދަކުރާ ސިރަޕް މުބާރާތްތަކުގައި ވާދަކުރާ މިއީ ފުރަތަމަ ފަހަރެވެ.

މިއަދުގެ ފައިނަލުގައި ވާދަކުރާ ދެ ޓީމުގައި ވެސް ގައުމީ ފެންވަރުގެ ގިނަ ޕްލޭޔަރުންތަކެއް ހިމެނެއެވެ. އެގޮތުން ކޮމެޓްސްގެ މުހައްމަދު އައްޒާމް, އަޔާޒް އަހުމަދު އަދި ސާދު ނިޒާރުގެ އިތުރުން އަލީ ޝަމާލް އަކީ މުޅި ރާއްޖޭގައިވެސް މަޝްހޫރު ކުޅުންތެރިންނެވެ. އަނެއްކޮޅުން ސިރަޕްގެ ޖުމައިލް ޖަމީލް އަދި ޖުނައިދު އާއި މުހައްމަދު އިސާމް އަދި އަލީ ޝަމާލްއަކީވެސް ރާއްޖޭގެ ގިނަ މުބާރާތްތަކެއް ކުޅެ ތަށި ހޯދާފައިވާ ކުޅުންތެރިންނެވެ.

މިއަދުގެ ފައިނަލް މެޗު ފަށާނީ ހަވީރު 4:00 ގައި ކެނދިކުޅުދޫ ފުޓްބޯޅަ ސްޓޭޑިއަމުގައެވެ.