މާޅެންދޫ ކައުންސިލް ފުޓްސަލް ޗެލެންޖް ކުރިއަށް ގެންދެވޭނެ މާހައުލެއް ނެތުމުން ނިންމާލައިފި

ނ. މާޅެންދޫގައި ކުރިއަށްދާ ކައުންސިލް ފުޓްސަލް ޗެލެންޖް 2023 ކުރިއަށް ގެންދެވޭނެ މާހައުލެއް ނެތުމުން މުބާރާތް ހުއްޓާލިކަން އިއުލާން ކޮށްފިއެވެ.

މާޅެންދޫ ކައުންސިލުން އިންތިޒާމުކޮށްގެން ބާއްވާ ފުޓްސަލް ޗެލެންޖް ނިންމާލިކަން އަންގާ، ކައުންސިލުން މިއަދު ވަނީ ޓީމުތަކަށް ސިޓީއެއް ފޮނުވައިފައެވެ. އެ ސިޓީގައި ބުނެފައިވަނީ އެ ކައުންސިލުން އިންތިޒާމުކޮށްގެން 5 ޖުލައި އިން ފެށިގެން 15 ޖުލައި އަށް ކުރިއަށް ގެންދާ މުބާރާތް އިތުރަށް ކުރިއަށް ގެންދެވޭނެ މާހައުލެއް ނެތް ކަމަށާއި މިވަގުތަށް މުބާރާތް ހުއްޓާލީ ކަމަށެވެ.

"ކައުންސިލް ފުޓްސަލް ޗެލެންޖް 2023 ބޭއްވޭނެ މާހައުލެއް ނެތުމުގެ ސަބަބުން، މުބާރާތް މިވަގުތަށް ހުއްޓާލީ ކަމަށް ޓީމުތަކާ ރައްޔިތުންގެ މައުލޫމާތަށްޓަކައި ދަންވަމެވެ." މާޅެންދޫ ކައުންސިލުން ޓީމުތަކަށް ފޮނުވި ސިޓީގައި ބުނެފައިވެއެވެ.

Advertisement

 

ހަ ޓީމާއެކު ދެ ގުރޫޕަކަށް ބަހާލައިގެން ފެށި މި މުބާރާތުގައި މިހާތަނަށް ތިން މެޗެއް ކުޅެފައިވާ އިރު، ގުރޫޕް އޭ ގެ ކުރީގައި އޮތީ ކަބަޓާން އެފްޓީއެވެ. ގުރޫޕް ބީ ގެ އެއްވަނައިގައި އޮތީ ޓެމެރާރިއޯސްއެވެ. މި ނޫހަށް އެނގިފައިވާ ގޮތުގައި ޓީމުތަކުގެ މެދުގައި މައްސަލަ ޖެހުނީ ގުރޫޕް އޭގެ ތިން ޓީމުގެ މެދުގައެވެ. އެ ގުރޫޕުގައި ދެން އޮތީ ވެންޑަލްސްއާއި ޑި-ފީޓާރްސްއެވެ. 

ކައުންސިލްގެ ރައީސް މުހައްމަދު ހަސަން (މޯޑު) "ރަށްފުށު އޮންލައިން" އަށް މައުލޫމާތު ދެމުން ވިދާޅުވީ މި ވަގުތު އެ މުބާރާތް ކުރިއަށް ގެންދިއުމުގެ މާހައުލެއް ނެތްކަމަށް މުބާރާތް އިންތިޒާމުކުރާ ކައުންސިލަށް ފެންނަން ނެތް ކަމަށް ނިންމުމުން މި އަހަރުގެ މުބާރާތް ހުއްޓާލީކަމަށެވެ.

އަދި ޓީމުތަކުގެ މެދުގައި ޖެހުނު މައްސަލަތަކެއް ހައްލު ކުރުމަށް ތިން ދުވަސް މަސައްކަތް ކޮށްގެން ވެސް ހައްލެއް ހޯދިފައި ނުވާ ކަމަށާއި، މި މުބާރާތް ދެން އިތުރަށް ކުރިއަށް ނުގެންދަން ނިންމީ ކަމަށެވެ. އެހެން ނަމަވެސް މި މައްސަލަތައް ހައްލުކޮށް ޒުވާނުންގެ އެއްބާރުލުމާއެކު މިފަދަ އެހެން މުބާރާތްތައް ބާއްވާނެ ކަމަށް މޯޑް ވިދާޅުވިއެވެ.