މާޅެންދޫ ކައުންސިލް ފުޓްސަލް ޗެލެންޖް: ފައިނަލްގައި ކަބަޓާން ދެ ޓީމުގެ ކުރިމަތިލުމެއް

Maalhendhoo council futsal challenge: Final gai Kabataan 2 team ge kurimathilumeh

ކަބަޓާން އެސްސީއާއި ކަބަޓާން އެފްޓީ ބައްދަލު ކުރި މެޗުގެ ތެރެއިން -- ފޮޓޯ/ކަބަޓާން

9 ޑިސެންބަރު 2023

ނ. މާޅެންދޫގައި މިހާރު ކުރިއަަށްދާ ކައުންސިލް ފުޓްސަލް ޗެލެންޖުގެ ފައިނަލަށް ކަބަޓާން އެސްސީ އަދި ކަބަޓާން އެފްޓީ ދަތުރުކޮށްފިއެވެ.

މާޅެންދޫގައި މި ފަހުގެ ތާރީޙުގައި އެންމެ ނަންވިދާ ކަބަޓާންއިން މިފަހަރުގެ މުބާރާތަށް ތިން ޓީމެއް ވަނީ ނެރެފައެވެ. އެއީ ކަބަޓާން އެސްސީ، ކަބަޓާން އެފްޓީ އަދި ކަބަޓާން އެންޖީއެވެ. މި ތިންޓީމުގެ އިތުުރުން ދެން މުބާރާތުގައި ވާދަކުރީ ޓެމެރާރިއޯސް އެސްސީއެވެ.

އަތޮޅު ފެންވަރުގައްޔާއި، ގައުމީ ލެވެލްގައި ވެސް ފުޓްސަލްގައި ނަން ހިނގާ ކުޅުންތެރިން ވާދަކުރަމުން އަންނަ މި މުބާރާތުގެ ފައިނަލުން ފުރަތަމަ ޖާގަ ހޯދީ ކަބަޓާން އެސްސީއެވެ. ގުރޫޕް ސްޓޭޖުގައި ކުޅުނު ތިން މެޗުވެސް އެ ޓީމުން ކާމިޔާބުކުރި އިރު، ގިނަ ގޯލުތަކެއް އެ ޓީމުން ވަނީ މުބާރާތުގައި ޖަހައިފައެވެ. ތިން މެޗުން ހޯދި ނުވަ ޕޮއިންޓާއެކު ކަބަޓާން އެސްސީއަށް ވަނީ ގުރޫޕް ތާވަލުގެ އެއްވަނައިގެ ގޮތުގައި ސީދާ ފައިނަލުން ޖާގަ ލިބިފައެވެ.

ފައިނަލްގެ ދެވަނަ ޖާގަ ހޯދި ކަބަޓާން އެފްޓީން އެ ޖާގަ ކަށަވަރު ކުރީ އިއްޔެ ކުޅުނު ސެމީ ފައިނަލުގައި ވާދަވެރި ކުޅުމަކަށްފަހު ޓެމެރާރިއޯސް ބަލިކޮށްގެންނެވެ. އެ މެޗު އެ ޓީމުން ކާމިޔާބު ކުރީ 2-3 ގެ ނަތީޖާއަކުން ކުރި ހޯދައިގެންނެވެ. މެޗުގެ މޮޅު ކުޅުންތެރިޔަކަށް ހޮވުނީ ކަބަޓާން އެފްޓީގެ އިބްރާޙިމް އަލީމްއެވެ.

ސެމީ ފައިނަލުގައި މި ދެ ޓީމު ވާދަކުރީ ގުރޫޕް ތާވަލުގެ ދެވަނަ އަދި ތިންވަނަ ޓީމުގެ ގޮތުގައެވެ. އެގޮތުން ގުރޫޕް ސްޓޭޖުގައި މި ދެ ޓީމުގެ ކުރިމަތިލުން ކާމިޔާބުކުރީ 3-4 ގެ ނަތީޖާއަކުން ޓެމެރާރިއޯސްއެވެ.

މި މުބާރާތުގެ ފައިނަލް ކުޅުމަށް ހަމަޖެހިފައިވަނީ މާދަމާ ހަވީރުއެވެ.