ކޭޒެޑްޑީ ބަލިކޮށް ނެބަޓަން އުންމީދު ހޯދިއިރު، ސީއެންޖީ ބަލިކޮށް ކަބަޓާން ކުރިއަށް!

ދި މެންގްރޫވް އައިލަންޑް ރަށުބޯޅަ ފުޓްސަލް މުބާރާތުގައި މިއަދު ކެނދިކުޅުދޫ ޒުވާނުންގެ ދިރުން ފަސޭހަކަމާއެކު ބަލިކޮށް ނެބަޓަންއިން އުންމީދު ދެމެހެއްޓިއިރު، ކޮމެޓްސް ނިއު ޖެނެރޭޝަން ބަލިކޮށް ކަބަޓާން މުބާރާތުގެ ފުރަތަމަ މޮޅު ހޯދައިފިއެވެ.

ކެނދިކުޅުދޫ ފުޓުބޯޅަ ދަނޑުގައި މިއަދު ކުޅުނު ފުރަތަމަ މެޗުގައި ކޭޒެޑްޑީ އަތުން ނެބަޓަން ކުރި ހޯދީ 0-5 ގެ ނަތީޖާއަކުންނެވެ. މި ނަތީޖާއާއެކު ކަބަޓާންއަށް މުބާރާތުގައި ކުރިއަށް ދިއުމުގެ ފުރުސަތު ވަނީ ހަނިވެފައެވެ. ކުޅުނު ދެ މެޗުންވެސް ކޭޒެޑްޑީ ބަލިވެފައިވާއިރު، ނެބަޓަން މިއަދުގެ މެޗުން މޮޅުވެ، ގުރޫޕުގައި ކުރިއަށް ދިއުމަށް ވަނީ އުންމީދު އައު ކޮށްފައެވެ. ނެބަޓަން ފުރަތަމަ މެޗުގައި ސިރަޕް އެފްސީ އަތުން ވަނީ ބަލިވެފައެވެ.

މިއަދުގެ މެޗު ފަށައިގެން ނެބަޓަންއިން ގާތް ގާތުގައި ގިނަ ހަމަލާތަކެއް އުފެއްދި އިރު، ކޭޒެޑްޑީގެ ކީޕަރު މާހިލް ވަނީ މޮޅު ކުޅުމެއް ދައްކައިފައެވެ. އެހެން ނަމަވެސް ފުރަތަމަ ހާފުގެ ކުރީކޮޅު ޒަޔާން ވަނީ ގޯލެއް ޖަހައި ނެބަޓަންއަށް ލީޑު ނަގައިދީފައެވެ. ނެބަޓަންގެ ދެވަނަ ގޯލަކީ ޒަޔާން ޖައްސާލި ޕާހަކުން އަހުނަސް ދުރުން ފޮނުވާލި ބާރު ހަމަލާއެއް ގޯލަށް އަމާޒުކޮށްލައިގެން ޖެހި ގޯލެކެވެ.

Advertisement

ދެވަނަ ހާފުގެ 10 ވަނަ މިނަޓުގައި ނެބަޓަންއަށް ތިންވަނަ ގޯލު ޖަހައިދިނީ އުނެއިސް އެވެ. އެއަށްފަހު މުޅިން ހުސްކޮށް ހުރެ އެ ޓީމުގެ ލީވާން ވަނީ ހަތަރުވަނަ ގޯލު ނެބަޓަންއަށް އެ މެޗުގައި ޖަހައިދީފައެވެ. ނެބަޓަންގެ ފަހު ގޯލަކީ މެޗު ނިމެންދަނިކޮށް ޒަޔާން ކާމިޔާބުކުރި ގޯލެކެވެ. ޒަޔާން ވަނީ އެ މެޗުގެ މޮޅު ކުޅުންތެރިޔާގެ މަގާމު ހޯދައިފައެވެ.

މިއަދުގެ ދެވަނަ މެޗުގައި ސީއެންޖީ އަތުން ކަބަޓާން ކުރި ހޯދީ 0-6 ގެ ނަތީޖާއަކުންނެވެ. އެ މޮޅާއެކު ކުޅުނު ދެ މެޗުން ހަތަރު ޕޮއިންޓް ކަބަޓާންއިން ވަނީ ހޯދައިފައެވެ. ކުޅުނު ދެ މެޗުންވެސް ބަލިވެ ސީއެންޖީއަށް ވަނީ ސެމީ ފައިނަލުގެ ދޮރު ބަންދުވެފައެވެ. ސީއެންޖީއިން ފަހު މެޗުގައި ބައްްދަލު ކުރާނީ ޑީޓޫ ސްޕޯޓް ކުލަބާއެވެ.

ކަބަޓާއިން އެ މެޗުގައި ޖެހި ހަ ގޯލުގެ ތެރެއިން ދެ ގޯލު ކާމިޔާބު ކޮށްދިނީ މެޗުގެ މޮޅު ކުޅުންތެރިޔާގެ މަގާމު ހޯދި މޫސާ އަހުމަދު (ދަގަނޑޭ) އެވެ. މީގެ އިތުރުން އަބްދުﷲ ޝާފީން އާއި އަފީފް އީސާ އަދި މުހައްމަދު ފަރުހާންގެ އިތުރުން މުހައްމަދު ނައުފަލް ވެސް ވަނީ އެ މެޗުގައި ކަބަޓާންއަށް ގޯލު ޖަހައިދީފައެވެ.