ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ކެނދިކުޅުދޫގެ 19 އަހަރުން ދަށުގެ ޓީމު ކުރިއަށްދާން ލިބޭ ރަނގަޅު ތަޖުރިބާއެއް

އަންނަ އޮގަސްޓް މަހުގެ އެއްވަނަ ދުވަހު ނ. ކެނދިކުޅުދޫގައި ފަށައި ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023 މުބާރާތަކީ މުބާރާތް ބާއްވާ ކެނދިކުޅުދޫގެ 19 އަހަރުން ދަށު ޓީމު ކުރިއަށްދާން ލިބޭނެ ރަނގަޅު ތަޖުރިބާއެއް ކަމަށް އެ ޓީމުގެ ކޯޗު ހުސައިން ސޮލާހް ބުނެފިއެވެ. 

ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕަކީ މި ފަހުގެ ތާރީހެއްގައި ނޫނު އަތޮޅުގައި ބޭއްވޭ އެންމެ ބޮޑު ފުޓްސަލް މުބާރާތެވެ. ފަސް ރަށަކުން ޖުމުލަ 10 ޓީމު ވާދަކުރާ މި މުބާރާތަކީ ކުލަބުތަކަށް ހުޅުވާލައިގެން ވެސް އަތޮޅުގައި ދުވަސްގަނޑަކަށް ފަހު ބޭއްވޭ އެންމެ ފުރަތަމަ މުބާރާތެވެ. ނޫނު އަތޮޅުގެ ރަށްތަކަށް އަމާޒުކޮށްގެން ބާއްވާ މި މުބާރާތް ބޭއްވުމަށް ހަމަޖެހިފައިވަނީ ކެނދިކުޅުދޫގެ ފުޓްސަލް ދަނޑުގައެވެ. މިއީ މި ނަމުގައި މުޅިން އަލަށް ބާއްވާ މުބާރާތެކެވެ. މި މުބާރާތް އިންތިޒާމުކޮށް ހިންގާނީ ކެނދިކުޅުދޫއަށް ނިސްބަތްވާ ރިޒޯޓް ބޯއީސްގެ ޓީމުން އިސްނަގައިގެންނެވެ

މި މުބާރާތުގައި ބައިވެރިވުމަށް ހުޅުވާލި ފުރުސަތު ބައިވެރިވި 10 ޓީމެއްގެ ނަން ރިޒޯޓް ބޯއީސް ފުޓްސަލް މުބާރާތުގެ އިންތިޒާމީ ކޮމިޓީއިން މިހާރު ވަނީ އިއުލާން ކޮށްފައެވެ. އެގޮތުން ފަސް ރަށަކުން ޓީމުތައް ބައިވެރިވާ އިރު، މުބާރާތުގެ ފޯރި އިތުރަށް ގަދަވާނެ ކަމަށާއި، އަމާޒަކީ މުބާރާތް ވީހާވެސް ވާދަވެރިކޮށް ކުރިއަށް ގެންދިއުން ކަމަށް ރިޒޯޓް ބޯއީސް ފުޓްސަލްގެ އިންތިޒާމީ ކޮމީޓިން މައުލޫމާތު ދެޔެވެ.

Advertisement

މިފަހަރުގެ މުބާރާތުގައި ވާދަކުރާ އެންމެ ޒުވާން ޓީމަކީ ކެނދިކުޅުދޫގެ 19 އަހަރުން ދަށުގެ ޓީމެވެ. ފަހަކަށް އައިސް ގިނަ މެޗުތަކެއް ކުޅެ، ރަށުގެ ސީނިއާ ޓީމަށް ދެމިގަތުމުގެ އަޒުމުގައި ޒުވާން ޓީމުން އަންނަނީ ކުރިއެރުންތަކެއް ހޯދަމުންނެވެ. ކެނދިކުޅުދޫގައި މިހާރުވެސް ހިނގަމުންދާ ދެ ފުޓުބޯޅަ އެކަޑަމީއިން ރަނގަޅު ޕްލޭޔަރުންތަކެއް އުފެދެމުން އަންނަ އިރު ރިޒޯޓްބޯއީސް ފުޓްސް މުބާރާތް ވެގެންދާނީ މި ކުޅުންތެރިންނަށް ތަޖުރިބާ ހޯދުމުގެ ދަތުރަކަށް ކަމަށް އެ ޓީމުގެ ކޯޗު ސޮލާ ވަނީ ފާހަގަކޮށްފައެވެ.

ކެނދިކުޅުދޫ 19 އަހަރުން ދަށުގެ ޓީމުގެ ޖާޒީ

ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023 އާ މެދު ދެކެނީ ކިހިނެތް؟

"މިކަހަލަ މުބާރާތްތަކަކީ ކެނދިކުޅުދޫއަށް ވަރަށް މުހިއްމު މުބާރާތެއްގެ ގޮތުގައި ދެކެނީ. ރަށުން ބޭރުގެ ޓީމުތައް ބައިވެރިކޮށްގެން މިހެން ކުޅޭ މުބާރާތްތައް ވަރަށް މުހިއްމު،" ސޮލާ ބުންޏެވެ.

މުބާރާތާއި މެދު ޓީމުގެ އުންމީދުތަކަކީ ކޮބާ؟

"މި މުބާރާތުގައި އަންޑާ 19 ޓީމުން ބައިވެރިވެފައިވަނީ ތަޖުރިބާ ހޯދުމާއި، އެކުދިންނަށް ވާދަވެރި މުބާރާތްތައް ކުޅުމުގެ ފުރުސަތު ހޯދައިދިނުމުގެ ގޮތުން."

މި މުބާރާތް ކާމިޔާބުކުރުން ވެގެންދާނީ ޓީމުގެ މުސްތަގުބަލަށް ކިހާ މުހިއްމު ކަމަކަށް؟

"މި މުބާރާތް ކާމިޔާބު ކުރެވިއްޖެޔާ އެ ވެގެންދާނީ މި ޓީމުގެ ކުޅުންތެރިންނަށް ލިބޭ ވަރަށް ބޮޑު ކުރިއެރުމަކަށް. ކެނދިކުޅުދޫ އެފްސީގެ މުހިއްމު ޕްލޭޔަރުންތަކަކާ ދެކޮޅަށް އަންޑާ 19 ޓީމެއް ކުޅެ ކާމިޔާބުކޮށްފިއްޔާ އެ ވާނީ ހަމަ ވަރަށް ބޮޑު ކާމިޔާބަކަށް. ވަރަށް އުންމީދުކުރަން އެދުވަސް އަންނާނެކަމަށް."

އަތޮޅުތެރޭގައި ކްލަބްގެ ވާދަވެރިކަން އޮތުން އެއީ ކިހާ މުހިއްމު ކަމެއް؟

"އެއީ ފުޓުބޯޅައަށްޓަކައި ކޮންމެހެންވެސް އޮންނަންޖެހޭ ކަމެއް. އެއީ ހަމަ ފުޓުބޯޅަ ކުރިއަރުވަންޏާ، ނުވަތަ ފުޓްސަލް ކުރިއަރުވަންޏާ ނޯ ޗޮއިސް ހަމަ މިކަހަލަ މުބާރާތްތަކެއް ނުބާއްވާ ކުރިއަށް ދެވޭނެކަމަށް."

ފައިސާގެ ބޮޑެތި އިނާމުތަކެއް ވެސް ކަނޑައަޅާފައިވާ މި މުބާރާތް ދެ ގުރޫޕަކަށް ބަހާލައިގެން ކުރިއަށް ގެންދަން ރާވާފައިވާ އިރު ސެމީއަށް ދަތުރު ކުރާނީ ގުރޫޕް ސްޓޭޖުގައި އެންމެ ގިނަ ޕޮއިންޓް ހޯދާ ދެ ޓީމެވެ. އެގޮތުން ޓީމުތައް ބަހާލާނީ ފަސް ޓީމުގެ ދެ ގުރޫޕަށެވެ. 

މި މުބާރާތުގެ ޓައިޓަލް ސްޕޮންސަރުންނަކީ މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯނީގެ އިތުރުން އިއްސޭ ފިޝިންގްއެެވެ. އަދި ސަޕޯޓިންގް ޕާޓުނަރުންގެ ގޮތުގައި އެފްސީ ރޮބިންސިއާ ހިމެނެއެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.