ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ކަބަޓާންއާއި އެސްއެސްބީ އެއްވަރުވެ ގުރޫޕު އޭ ގެ ފޯރި އިތުރަށް ގަދަވެއްޖެ

ނ. ކެނދިކުޅުދޫގައި މިހާރު ކުރިއަށްދާ ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕުގައި ކަބަޓާން އެފްސީއާއި ސުޕަ ސްޕޯޓިންގް ބޯއީސް (އެސްއެސްބީ) ކުޅުނު މެޗު އެއްވަރުވެ ގުރޫޕް އޭ ގެ ފޯރި އިތުރަށް ގަދަވެއްޖެއެވެ.

ކެނދިކުޅުދޫގެ ފުޓުބޯޅަ ދަނޑުގައި މިއަދު ހަވީރު ކުޅުނު އެ މެޗުން ކަބަޓާން އަދި އެސްއެސްބީ އެއްވަރުވީ 1-1 އިންނެވެ. މި މެޗުގެ ނަތީޖާއާއެކު ގުރޫޕް އޭގެ ފޯރި ގަދަވެފައިވާ އިރު، އެ ގުރޫޕުގެ އެއްވަނައިގައި ހަތް ޕޮއިންޓާއެކު އޮތީ ކޮމެޓްސްއެވެ. ދެވަނައިގައި ފަސް ޕޮއިންޓް ހޯދައިގެން ކަބަޓާން އޮތް އިރު، ތިންވަނައިގައި އެސްއެސްބީ އޮތީ ހަތަރު ޕޮއިންޓާއެކުއެވެ. ހަތަރުވަނައިގައި އެފްސީ ހާމަނޯސް އެއް މެޗު މަދުން ކުޅެގެން ތިން ޕޮއިންޓާއެކު އޮތް އިރު ފުލުގައި އޮތީ ކެނދިކުޅުދޫ އެފްސީގެ 19 އަހަރުން ދަށުގެ ޓީމެވެ.

މި ނަތީޖާތަކާއެކު ކޮމެޓްސް އަދި ކަބަޓާންއަށް ވެސް ބާކީ އޮތް އެއް މެޗުން މޮޅުވެގެން ދެވަނަ ބުރެއް ޔަގީންވާނެއެވެ. ބާކީ އޮތް އެސްއެސްބީއަށް މިއަދުގެ މެޗުން މޮޅެއް ނުހޯދުމުން ވަނީ އަމިއްލަ ބާރު ގެއްލިފައެވެ. އެ ޓީމުން ފަހު މެޗުގައި ކޭކޭއެފްސީ އަތުން މޮޅުވި ނަމަވެސް ކަބަޓާން އަދި ކޮމެޓްސް ހާމަނޯސްއާ ދެކޮޅަށް ކުޅޭ ފަހު ދެ މެޗުން ބަލިވެއްޖެ ނަމަ ކަޓާނެއެވެ. ހާމަނޯސްއަށް އަމިއްލަ ބާރުގައި ސެމީގެ ފުރުސަތު އަދި އެބައޮތެވެ. އެ ޓީމަށް ސެމީއަށް ދެވޭނީ ދެން ކުޅޭ ދެ މެޗުން މޮޅުވެގެންނެވެ.

Advertisement

މިއަދުގެ މެޗު ފަށައިގެން ކަބަޓާންއިން ރަނގަޅަށް ކުޅެމުން ދިޔައިރު، އެ ޓީމުން ވަނީ ފުރަތަމަ ހާފުގައި ގޯލެއް ޖަހައިފައެވެ. އެ ގޯލަކީ ވެއްޓިގަނެގެން އެ ޓީމުގެ ކެޕްޓަން ޝާފީން އަބްދުﷲ ކާމިޔާބު ކުރި ގޯލެކެވެ. ދެވަނަ ހާފުގައި އެސްއެސްބީއިން ކުޅުން ރަނގަޅުކޮށް ވަނީ މެޗުގެ ނަތީޖާ ހަމަހަމަ ކޮށްފައެވެ. އެ ގޯލު އެ ޓީމަށް ޖެހީ މެޗުގައި މޮޅު ކުޅުމެއް ދައްކާ މޮޅު ކުޅުންތެރިޔާގެ މަގާމުވެސް ހޯދި ހުސައިން އަހުސަންއެވެ. އަހުސަން ވަނީ އެންމެ ފަހުން ކުޅުނު މެޗުގައި ހާމަނޯސް ކޮޅަށް ވެސް ދެ ގޯލު ޖަހައިފައެވެ.

މި ގުރޫޕުގައި މާދަމާ އެއްް މެޗު އޮންނާނެއެވެ. އެއީ ކަބަޓާން އަދި ހާމަނޯސް ބައްދަލު ކުރާ މެޗެވެ.

މި މުބާރާތުގެ ޓައިޓަލް ސްޕޮންސަރަކީ ދި މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯންޏެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.