ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ހާމަނޯސް ބޮޑު ތަފާތަކުން ބަލިކޮށް ކޮމެޓްސް އެއްވަނައިގައި ސެމީއަށް

ނ. ކެނދިކުޅުދޫގައި މިހާރު ކުރިއަށްދާ ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕުގައި އެފްސީ ހާމަނޯސް ބޮޑު ތަފާތަކުން ބަލިކޮށް ކޮމެޓްސް ސްޕޯޓްސް ކުލަބުން ގުރޫޕު އޭ ގެ އެއްވަނައިގެ ގޮތުގައި ސެމީ ފައިނަލަށް ދަތުރުކޮށްފިއެވެ.

ކެނދިކުޅުދޫގެ ފުޓުބޯޅަ ސްޓޭޑިއަމުގައި މިއަދު ހަވީރު ކުޅުނު މެޗުން ހާމަނޯސްގެ މައްޗަށް ކޮމެޓްސް ކުރި ހޯދީ 0-6 ގެ ނަތީޖާއަކުންނެވެ. މި މޮޅާއެކު ކުޅުނު ހަތަރު މެޗުން ކޮމެޓްސް ވަނީ 10 ޕޮއިންޓް ހޯދައިފައެވެ. އެއާއެކު ގުރޫޕު އޭ ގެ އެއްވަނަ އެ ޓީމަށް ލިބިފައިވާ އިރު، އެ ގުރޫޕުން ދެވަނައިގެ ގޮތުގައި ސެމީއަށް ދަތުރުކުރީ ކަބަޓާން އެފްސީއެވެ. ކަބަޓާންއަށް ހަތަރު މެޗުން ލިބިފައިވަނީ އަށް ޕޮއިންޓެވެ.

މިއަދުގެ އެ މެޗަށް ނުކުތް އިރުވެސް ހާމަނޯސް ޓީމަށް އޮތީ ސެމީ ފައިނަލުގެ ފުރުސަތު ގެއްލިފައެވެ. އެ ޓީމުން ކުޅުނު ހަތަރު މެޗުން ތިން ޕޮއިންޓް ލިބިފައިވާ އިރު، ގުރޫޕް ސްޓޭޖު ނިންމާލީ ގުރޫޕުގެ ހަތަރުވަނައިގައެވެ. އެ ގުރޫޕުގެ ތިންވަނަ ހޯދީ ހަތް ޕޮއިންޓާއެކު އެސްއެސްބީއެވެ. އެސްއެސްބީއިން މިއަދު ކޭކޭއެފްސީގެ 19 އަހަރުން ދަށުގެ ޓީމު ބޮޑު ތަފާތަކުން ބަލި ކުރި ނަމަވެސް ކޮމެޓްސް މޮޅުވުމުން އެ ޓީމު ވަނީ ކަޓައިފައެވެ.

Advertisement

މިއަދުގެ މެޗަށް ކޮމެޓްސްއިން ނުކުތީ އެ ޓީމުން ކުރިން ކުޅުނު މެޗުތަކުގައި ކުޅެފައި ނުވާ މުހައްމަދު އައްޒާމް ހިމަނައިގެންނެވެ. މާލޭގައި މިހާރު ކުޅެމުންދާ ކުލަބް މޯލްޑިވްސްގައި ވާދަކުރާ ފެނަކަ ރިކްރިއޭޝަން ކުލަބުގެ ވައިސް ކެޕްޓަންކަން ކުރަމުން އަންނަ އައްޒާމް މިއަދުގެ މެޗުގައި ތަފާތު ދެއްކި އިރު، ކޮމެޓްސްއިން މެޗުގައި ޖެހި ފުރަތަމަ ގޯލު ޖަހައިދިނީ އޭނައެވެ. ފުރަތަމަ ހާފު އެއްކޮށް އޭނާ ކުޅުނު އިރު، ކޮމެޓްސްއިން ހަތަރު ގޯލެއް ވަނީ އެ ހާފުގައި ޖަހައިފައެވެ. އައްޒާމުގެ ގޯލުގެ އިތުރުން އެ ހާފުގައި ގޯލުތައް ޖެހީ އަބްދުﷲ ސުއާދު އާއި ހުސައިން ޝަރީފް އަދި މުހައްމަދު ޝައްމާހް އެވެ.

ދެވަނަ ހާފުގައި ކޮމެޓްސްއިން ދެ ގޯލެއް ވަނީ ޖަހައިފައެވެ. އެ ދެ ގޯލަކީ ޝައްމާހު އަދި އިބްރާހިމް ތަހްސީނު ކާމިޔާބުކުރި ގޯލެކެވެ.

ކޮމެޓްސްއިން ސެމީ ފައިނަލުގައި ކުޅެން ޖެހޭނެ ޓީމެއް ޔަގީންވާނީ މާދަމާ ހަވީރު ކުޅޭ މެޗުންނެވެ. އެ މެޗުގައި ބައްދަލު ކުރާނީ ޑީޓޫ ސްޕޯޓްސް ކުލަބާއި ޓީމް ލަންދޫއެވެ. އެ މެޗުން މޮޅުވާ ޓީމެއް ސެމީއަށް ދަތުރު ކުރާއިރު، އެއްވަރުވެއްޖެ ނަމަ ދަނީ ޑީޓޫ ސްޕޯޓްސް ކުލަބެވެ. ސެމީގެ އަނެއް މެޗުގައި ބައްދަލު ކުރާނީ ގުރޫޕު ބީ އިން އެއްވަނަ ހޯދި ވިންޑް ވޯރިއާސް އަދި ގުރޫޕް އޭ ގެ ދެވަނަ ކަބަޓާންއާއެވެ.

މި މުބާރާތުގެ ޓައިޓަލް ސްޕޮންސަރަކީ ދި މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯންޏެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.