ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ހާމަނޯސް އަތުން ބޮޑު މޮޅެއް ހޯދައި ކަބަޓާން ސެމީއަށް ދަތުރުކޮށްފި

ނ. ކެނދިކުޅުދޫގައި މިހާރު ކުރިއަށްދާ ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕުގައި އެފްސީ ހާމަނޯސް އަތުން ބޮޑު މޮޅެއް ހޯދައި މާޅެންދޫގެ ކަބަޓާން އެފްސީއިން ސެމީ ފައިނަލަށް ދަތުރުކޮށްފިއެވެ.

ކެނދިކުޅުދޫގެ ފުޓުބޯޅަ ސްޓޭޑިއަމުގައި މިއަދު ކުޅުނު މެޗުން ހާމަނޯސްގެ މައްޗަށް ކަބަޓާން ކުރި ހޯދީ 1-5 ގެ ނަތީޖާއަކުންނެވެ. މި މޮޅާއެކު ކުޅުނު ހަތަރު މެޗުން އަށް ޕޮއިންޓް ހޯދައިގެން ކަބަޓާން ސެމީ ފައިނަލަށް ދަތުރު ކުރި އިރު، އެ ޓީމު އޮތީ މިވަގުތު ތާވަލުގެ އެއްވަނައިގައެވެ. ދެވަނައިގައި އެއް މެޗު މަދުން ކުޅެގެން އޮތް ކޮމެޓްސް ހަތް ޕޮއިންޓާ އެކު އޮތް އިރު، ސުޕް ސްޕޯޓިންގް ބޯއީސް ވެސް އެއް މެޗު މަދުން ކުޅެގެން ހަތަރު ޕޮއިންޓް ހޯދާފައިވާ އިރު، އެ ޓީމަށް އޮތީ އަމިއްލަ ބާރު ގެއްލިފައެވެ. މިއަދުގެ މެޗުން ބަލިވި ހާމަނޯސް ވަނީ ކުޅުނު ތިން މެޗުން ލިބުނު ތިން ޕޮއިންޓާއެކު ސެމީއަށް ދިއުމުގެ ފުރުސަތު ހަނިވެފައެވެ.

ކަބަޓާން ސެމީއަށް ދަތުރު ކުރި އިރު، ބާކީ ޖާގަ ޔަގީންވާނީ ކޮމެޓްސް އާއި ހާމަނޯސް ބައްދަލު ކުރާ މެޗާއި، އެސްއެސްބީ އާއި ކޭކޭއެފްސީ އަންޑާ 19 ބައްދަލު ކުރާ މެޗުގެ ނަތީޖާއަކުންނެވެ. ކޮމެޓްސް އެ މެޗުން މޮޅުވެއްޖެ ނަމަ އެއްވަނައިގައި ސެމީއަށް ދަތުރު ކުރާނެއެވެ. ކޮމެޓްސް އެ މެޗުން ބަލިވެއްޖެ ނަމަ އެސްއެސްބީއަށް ދެވަނައިގެ ގޮތުގައި ސެމީއަށް ދިއުމުގެ ފުރުސަތު އޮންނާނެއެވެ. އެސްއެސްބީ އޭރުން ޖެހޭނީ ފަސް ގޯލަށްވުރެން ބޮޑު ލީޑަކުން ކޭކޭއެފްސީގެ ޒުވާން ޓީމު އަތުން މޮޅުވާންށެވެ.

Advertisement

މިއަދުގެ މެޗު ފަށައިގެން ދެ ޓީމުގެ ފަރާތުން ވެސް ފެނުނީ ހަމަހަމަ ކުޅުމެކެވެ. ރަނގަޅަށް ޕާސް ޖަހައިގެން ދެ ޓީމުންވެސް ކުޅުނު އިރު މެޗުގައި ގޯލު ޖަހައި ފުރަތަމައިން ލީޑު ނެގީ ހާމަނޯސްއިންނެވެ. ހާމަނޯސްއަށް އެ ގޯލު ކާމިޔާބުކޮށްދިނީ އަހުމަދު މިފްރާހް (ކުއްބެ) އެވެ. ކުއްބެ ލަނޑު ޖެހިތާ މާގިނައިރުތަކެއް ނުވަނީސް އަބްދުﷲ ޝާފީން ވަނީ ކަބަޓާންއަށް ނަތީޖާ ހަމަހަމަ ކޮށްދީފައެވެ. އަދި އެ ހާފު ނިމެންދަނިކޮށް މުހައްމަދު ފަރުހާން (ފަރޭ) ވަނީ ކަބަޓާންއަށް މެޗުގައި ފުރަތަމަ ފަހަރަށް ލީޑު ނަގައިދީފައެވެ.

 

ދެވަނަ ހާފު ފަށައިގެން ހާމަނޯސްއަށް ޓީމު ކުރިއަށް ޖައްސައިގެން ގޯލެއް ޖަހަން މަސައްކަތް ކުރިއެވެ. އެގޮތުން އަފްރާހް (މެސީ) ގެ ނުރައްކާތެރި ހަމަލާތަކެއް ފެނިގެންދިޔައިރު، ކަބަޓާންގެ ކައުންޓާ އެޓޭކްތައް ފެނުނީ ނުރައްކާކޮށެވެ. އެގޮތުން އިގްލީމް އަލީގެ ދެ ލަނޑެއް ކައުންޓާ އެޓޭކުން ފެނުނު އިރު، އެ ހާފުގައި އެ ޓީމަށް ވަނީ ޕެނަލްޓީއެއް ލިބިފައެވެ. އެ ޕެނަލްޓީ ކާމިޔާބުކޮށް ކަބަޓާންގެ ފަސްވަނަ ގޯލު ކާމިޔާބުކުރީ މެޗުގެ މޮޅު ކުޅުންތެރިޔަކަށް ހޮވުނު ފަރޭއެވެ.

މި މުބާރާތުގެ ޓައިޓަލް ސްޕޮންސަރަކީ ދި މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯންޏެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.