ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ފުރަތަމަ މެޗުގައި ކަބަޓާންއާއި ކޮމެޓްސް އެއްވަރު

ނ.ކެނދިކުޅުދޫގައި މިއަދު ފެށި ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕުގެ ފުރަތަމަ މެޗުގައި ކެނދިކުޅުދޫގެ ކޮމެޓްސް ސްޕޯޓްސް ކުލަބާއި މާޅެންދޫގެ ކަބަޓާން އެފްސީ ބައްދަލު ކުރި މެޗު އެއްވަރުވެގެން ނިމިއްޖެއެވެ.

މިއަދު ހަވީރު ކެނދިކުޅުދޫގެ ފުޓުބޯޅަ ދަނޑުގައި ކުޅުނު އެ މެޗު ނިމުނީ 1-1 ގެ ނަތީޖާއަކުންނެވެ. ކުލަގަދަ ފެށުމުގެ ރަސްމިއްޔާތަކާއެކު މިއަދުގެ މެޗު ޝަރަފުވެރިކޮށްދިނީ ރާއްޖޭގެ ކުރީގެ ގައުމީ ކެޕްޓަން އަލީ އަޝްފާގު (ދަގަނޑޭ) އެވެ. ދަގަނޑޭ ވަނީ ފެށުމުގެ ރަސްމިއްޔާތުގައި މުބާރާތުގެ ހިތްގައިމު ޗެމްޕިއަން ޓްރޮފީ ވެސް ދައްކާލައިފައެވެ.

ނުވަ ޓީމު ވާދަކުރާ މި މުބާރާތުގެ ފުރަތަމަ މެޗު ފަށައިގެން މާގިނައިރުތަކެއް ނުވަނީސް ކަބަޓާންއިން ވަނީ މެޗުގައި ލީޑު ނަގައިފައެވެ. ފަހަތުގައި ހުރި އެ ޓީމުގެ އަފީފް އީސާ މަތިން ނަގައިދިން ބޯޅައެއް ބޮލުން ގޯލަށް ވައްދާލައިގެން މާޅެންދޫއަށް ލީޑު ނަގައިދިނީ ކެޕްޓަން އިބްރާހިމް ނިޔާޒްއެވެ.

Advertisement

ފުރަތަމަ ހާފުގައި ދެ ޓީމުން ވެސް ކުރިއަށް ޖައްސައިގެން ގިނަ ހަމަލާތަކެއް އުފައްދަން މަސައްކަތް ކުރި އިރު، ފުރަތަމަ ހާފު ނިމުމުގެ ކުރިން ކޮމެޓްސްއިން ވަނީ ލަނޑެއް ޖަހައި ނަތީޖާ ހަމަހަމަ ކޮށްފައެވެ. އެ ޓީމަށް ލިބުނު ކޯނަރެއްގެ ފައިދާ ނަގައި އެ ބޯޅަ ގޯލަށް ފޮނުވާލީ އިބްރާހިމް އަލީމްއެވެ.

ދެވަނަ ހާފުގައި ދެ ޓީމުން ވެސް ވަނީ ރަނގަޅަށް ޑިފެންސްކޮށްގެން ކުޅެފައެވެ. އިދިކޮޅު ޓީމަށް ލަނޑެއް ޖަހަން ފުރުސަތު ނުދީ ހަމަޖެހިލައިގެން ދެ ޓީމުންވެސް ކުޅެން މަސައްކަތް ކުރި އިރު، ނިޔާޒްއަށް ކުރި ފައުލަކާ ގުޅިގެން ކަބަޓާންއަށް ވަނީ ކޮމެޓްސްގެ އޭރިއާ ކުރިމަތިން ހިލޭ ޖެހުމެއް ލިބިފައެވެ. އެހެން ނަމަވެސް އެ ހިލޭ ޖެހުން އަމާޒުވީ ކޮމެޓްސްގެ ކުޅުންތެރިއެއްގެ ގައިގައެވެ. 

މި ހާފުގައި ކޮމެޓްސްގެ ހުސައިން ޝަރީފް އާއި އަލީ ބުޝްރީ ބާރު ގިނަ ހަމަލާތަކެއް ދުރުން ވަނީ އުފައްދާފައެވެ. އެހެން ނަމަވެސް ކަބަޓާންގެ ކީޕަރު ސިރްފާން މޫސާ ވަނީ އެ ބޯޅަތައް ދިފާއުކޮށްފައެވެ.

މިއަދުގެ މެޗުގެ މޮޅު ކުޅުންތެރިޔަކަށް ހޮވުނީ ކަބަޓާން ޓީމުގެ ކެޕްޓަން އިބްރާހިމް ނިޔާޒެވެ.

މި މުބާރާތުގައި މާދަމާ ވަނީ ދެ މެޗެއް ކުޅުމަށް ހަމަޖެހިފައެވެ. ފުރަތަމަ މެޗުގައި ބައްދަލު ކުރާނީ ނެބަޓަން އާއި ޓީމް ލަންދޫ އެވެ. ދެވަނަ މެޗުގައި ބައްދަލު ކުރާނީ ކެނދިކުޅުދޫ އެފްސީ އަންޑާ 19 އަދި އެފްސީ ހާމަނޯސްއެވެ.

މި މުބާރާތުގެ ޓައިޓަލް ސްޕޮންސަރަކީ ދި މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯންޏެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.