ފޯ ނޭޝަންސް ކަޕުގެ ފައިނަލަށް ދިވެހި އަންހެން ޓީމު, މަރުހަބާ!

ރާއްޖޭގައި މިހާރު ކުރިއަށްދާ ފޯ ނޭޝަންސް ވޮލީ މުބާރާތުގެ އަންހެން ޑިވިޝަނުގެ ސެމީ ފައިނަލުގައި މެލޭޝިއާ ބަލިކޮށް ރާއްޖެއިން ފައިނަލަށް ދަތުރުކޮށްފިއެވެ.

މި ފަހަރުގެ ފޯ ނޭޝަންސް ކަޕްގެ އަންހެން ޑިވިޝަނުގެ ލީގު ބުރުގައި މެލޭޝިއާ އަތުން ފަސް ސެޓު ކުޅެގެން ހިތްދަތިގޮތަކަށް ރާއްޖެ ބަލިވި ނަމަވެސް މިއަދު ވަނީ ތަފާތު ރޫހެއްގައި ފަސް ވަނަ ސެޓު ކުޅެލައި، ފައިނަލުން ޖާގަ ހޯދައިފަ އެވެ. މިއަދުގެ މެޗުގެ ސެޓުތައް ދިޔައީ 25-23, 17-25, 25-23, 21-25 އަދި 15-09 އިންނެވެ.

ރާއްޖެއިން ލީގު ބުރުގައި މެލޭޝިއާ އަތުން ބަލިވީ ފަސް ސެޓު ކުޅެ ފަހު ސެޓުގައި ކުޑަތަފާތަކުން ބަލިވެގެންނެވެ. އެކަމަކު މިއަދުގެ މެޗުގައި މެލޭޝިއާ އަތުން ރާއްޖެ ވަނީ ކުރީ މެޗާ ޙިލާފަށް ފަހު ސެޓުގައި ވެސް ބޮޑު ތަފާތަކުން މޮޅުވެފައެވެ.

Advertisement

މިއަދުގެ މެޗު ފަށައިގެން ރާއްޖެއިން ވަނީ ވިސްނުންތެރިކަމާއެކު ކުޅެ މެލޭޝިއާ އަތުން ސެޓު ހޯދައިފައެވެ. އެ ސެޓު 25-23 އިން ރާއްޖެ ގެންދިޔައިރު، ދެވަނަ ސެޓުގައި ވެސް ރާއްޖެއިން ލީޑު ނަގާފައި އޮއްވާ މެލޭޝިއާއިން ވަނީ ފަހަތުން އަރައި އެ ސެޓު ގެންގޮސްފައެވެ. ދެވަނަ ސެޓުން މެލޭޝިއާ މޮޅުވީ 25-17 އިންނެވެ. ތިންވަނަ ސެޓުން ރާއްޖެ އަނެއްކާވެސް ރަނގަޅަށް ކުޅެ މޮޅުވީ 25-23އިންނެވެ. ހަތަރުވަނަ ސެޓުން ރާއްޖެ ބަލިވީ ކުޑަ ފަރަގަކުންނެވެ. އެއީ 21-25 އިންނެވެ.

ނަތީޖާ ނެރެން ކުޅުނު ސެޓު ފަށައިގެން ދެ ޓީމަށް ވެސް ލިބޭ ލީޑުގެ ބޭނުމެއް ނުހިފިދިޔައީ ޕްރެޝަރުގައި ހެދޭ ގޯހެއްގެ ސަބަބުންނެވެ. މެލޭޝިއާ އިން 5-7 އިން ލީޑުނަގާފައި އޮއްވައި، ރާއްޖޭން ޓައިމްއައުޓެއް ނަގައި، ޓީމު ހަމަޔަކަށް އެޅުވި އެވެ. އަދި އަލުން ކުޅެން ނުކުމެ، 8-7 އިން ނަތީޖާ އަނބުރާލި އެވެ. އޭގެ ފަހުން ރާއްޖޭން ތަފާތު ރޫހެއްގައި ކުޅެލައި، ސެޓު 15-09 އިން ގެންގޮސް މެޗުން މޮޅުވި އެވެ. ރާއްޖެ އަށް ފަހު ވަގުތުގައި ތަފާތު ދައްކައިދިން އެއް ކުޅުންތެރިއަކި މި މެޗުގައި މުހިންމު ވަގުތުތަކުގައި ބަދަލަކަށް ކުޅެން އެރި، ފާތިމަތު ޝަމްހާ އެވެ. ސާވިސްތަކުގައި ވެސް ރަނގަޅަށް ބޭނުންހިފައި ޑިފެންސް ބޯޅަތަކުގައި ވެސް ޝަމްހާ ފެނުނީ މޮޅު ކުޅުމެއް ދެއްކިތަނެވެ.