ގޯލްޑެން ފުޓްސަލް ޗެލެންޖެ: ފައިނަލުގައި މާފަރު ބަލިކޮށް ކެނދިކުޅުދޫން ނ އަތޮޅުގެ ޗެމްޕިއަންކަން ހޯދައިފި

Final gai Maafaru balikoh Kendhikulhudhoo in N atoll ge championkan hoadhaifi

ގޯލްޑެން ފުޓްސަލް ޗެލެންޖް ނ އަތޮޅުގެ ޗެމްޕިއަން ކެނދިކުޅުދޫ --- ފޮޓޯ/އަދަދު ފޮޓޯ

6 ފެބުރުވަރީ 2024

މިހާރު ކުރިއަށްދާ ގޯލްޑެން ފުޓްސަލް ޗެލެންޖްގެ ނ އަތޮޅުގެ ފައިނަލުގައި މާފަރު ބަލިކޮށް ކެނދިކުޅުދޫއިން އަތޮޅުގެ ޗެމްޕިއަންކަން ހޯދައިފިއެވެ.

ހުޅުމާލެ ރެހެންދި ޓާފު 1 ގައި މިރޭ ކުޅުނު ފައިނަލުން ކެނދިކުޅުދޫ ކުރި ހޯދީ 1-3 ގެ ނަތީޖާއަކުންނެވެ. މިއީ މި މުބާރާތުގެ އަތޮޅު ބުުރުން ކެނދިކުޅުދޫ ޗެމްޕިއަންކަން ހޯދި ދެވަނަ ފަހަރެވެ. ކުރިން މި މުބާރާތުގައި އެ ރަށުން ބައިވެރިވި ހަމައެކަނި ފަހަރު 2017 ވަނަ އަހަރުވެސް ވަނީ އަތޮޅުގެ އެއްވަނަ ހޯދައިގެން ޒޯން ބުރަށް ދަތުރުކޮށްފައެވެ.

މިރޭގެ މެޗުގައި ފުރަތަމައިން ގޯލު ޖަހައި ލީޑު ނެގީވެސް ކެނދިކުޅުދޫއިންނެވެ. މުހައްމަދު އައްޒާމްއަށް ކުރި ފައުލަކާ ގުޅިގެން ލިބުނު ހިލޭ ޖެހުމެއް އޭނާ ވަނީ ގޯލުގެ ކަނަށް އަމާޒުކޮށްލައިގެން ލީޑު ނަގައިފައެވެ. އެ ހާފު ނިމެންދަނިކޮށް ކެނދިކުޅުދޫއަށް ލީޑު ފުޅާކޮށްދިނީ މުހައްމަދު އަރީހުއެވެ.

ދެވަނަ ހާފު ފަށައިގެން މާފަރު ޓީމުން ކުރިއަށް ޖައްސައިގެން ކުޅެ ގިނަ ހަމަލާތަކެއް ވަނީ އުފައްދައިފައެވެ. އެގޮތުން އައްޒާމް އަބްދުﷲ އާއި އަފްރާހުގެ ބާރު ބޯޅަތަކެއް ގޯލަށް އަމާޒުކުރި އިރު، އެ ބޯޅަތައް ކެނދިކުޅުދޫގެ ކީޕަރު އިސްމާއިލް ރާއިފް ވަނީ ހުށިޔާރުކަމާއެކު ދިފާއުކޮށްފައެވެ.

މާފަރު ޓީމުން ދެވަނަ ހާފުގައި ގޯލެއް ޖެހީ އަފްރާހް ޖެހި ބޯޅައެއްގެ ރިބައުންސްގެ ފައިދާ ނަގައިގެން އިބްރާހިމް ޒަކަރިއްޔާއެވެ. މާފަރު ޓީމުން ފަސް ފައުލު ހަމަވުމާއެކު ކެނދިކުޅުދޫގެ އައްޒާމަށް ލިބުނު ދުރު ޕެނަލްޓީ އޭނާ ވަނީ މެދު ނިމެންދަނިކޮށް ވައްދާލައިގެން އަނެއްކާވެސް ދެ ގޯލުގެ ލީޑެއް ކެނދިކުޅުދޫއަށް ހޯދައިދީފައެވެ.

މިއީ މިފަހަރުގެ މުބާރާތުގައި ކެނދިކުޅުދޫއިން މާފަރު ޓީމު ބަލިކުރި ދެވަނަ ފަހަރެވެ.

މިރޭ މެޗުގެ މޮޅު ކުޅުންތެރިއަކަށް ހޮވިފައިވަނީ ކެނދިކުޅުދޫގެ ކީޕަރު ރާއިފްއެވެ. ނ އަތޮޅުގެ ޓޮޕް ސްކޯރާއަކަށް ހޮވުނީ މާފަރުގެ އައްޒާމްއެވެ. އަދި އެ އަތޮޅުގެ އެންމެ މޮޅު ކުޅުންތެރިއަކަށް ހޮވުނީ ކެނދިކުޅުދޫ ޓީމު އައްޒާމްއެވެ.