ޔޫރޯ 2024: ސްވިޒަލޭންޑަށް ހަންގޭރީ ކައިރިން 3 ޕޮއިންޓް

ގްރޫޕް އޭ ގައި ހަންގޭރީ އަދި ސްވިޒަލޭންޑް ބައްދަލުކުރި މެޗުން ސްވިޒާލޭންޑް މޮޅުވެއްޖެއެވެ.

ސްވިޒަލޭންޑް މޮޅުވެފައިވަނީ 3-1 ގެ ނަތީޖާއަކުން ހަންގޭރީ ބަލިކުރުމަށްފަހުގައެވެ.

މެޗް ފެށިގެން ގިނަ އިރުތަކެއް ނުވަނީސް ސްވިޒަލޭންޑްގެ ސިލްވަން ވިޑްމާއަށް ވަނީ ރީދޫކާޑު ދައްކާފައެވެ.

Advertisement

މެޗްގައި ފުރަތަމަ ގޯލްޖަހައި ލީޑުނެގީ ސްވިޒާލޭންޑުންނެވެ. މިކެލް އެބިސްކާ ދިން ތްރޫ ބޯޅައަކުން މިގޯލް ކާމިޔާބުކޮށްދިނީ 12 ވަނަ މިނެޓުގައި ޑުއާ އެވެ.

މި ގޯލަށްފަހު ސްވިޒާލޭންޑުން ވަނީ މެޗް ކޮންޓްރޯކޮށް ރަނގަޅު ޗާންސް ތަކެއް ތަނަވަސްކޮށްފަ އެވެ. ހަންގަރީގެ ޑިފެންޑަރަށް ހެދުނު ގޯހެއްގެ ސަބަބުން ސްވިޒާލޭންޑްގެ 17 ނަންބަރު ރުބެން ވާގަސް އަށް ލިބުނު ހުސް ފުރުސަތު ވަނީ ބޭނުން ނުކުރެވި ބޭކާރުވެފަ އެވެ.

ހަންގޭރީއަށް ލިބުނު ހިލޭ ޖެހުމަކުން ލިބުނު ފުރުސަތެއްގައި އެޓީމުގެ ޑިފެންޑާ އެޑަމް ސަލާއި ހުސްކޮށް ހުރެ ބޮލުން ފޮނުވާލި ބޯޅަ ސްވިޒާލޭންޑްގެ ކީޕަރު ޔާން ސޯމާ ވަނީ ދިފާއުކޮށްފަ އެވެ. ނަމަވެސް އެހަމަލާއަށް ފަހު ގިނަ އިރުތަކެއް ނުވަނީސް ފުރަތަމަ ހާފުގެ އިތުރުވަގުގައި ސްވިޒާލޭންޑުގެ މިކެލް އެބިސްކާ ވަނީ އިތުރު ގޯލެއްޖަހާ ފަރަގު ފުޅާކޮށްފައެވެ.

ފުރަތަމަ ހާފް ނިމުނު އިރު 2-0 ގެ ނަތީޖާއަކުން ލީޑްގައި އޮތީ ސްވިޒާލޭންޑެވެ.

ދެވަނަ ހާފް ފަށައިގެން ހަންގަރީ އިންވަނީ ކުޅުން ރަނގަޅުކޮށް ގިނަ ވަގުތު ބޯޅަ ގެންގުޅެފައެވެ. ހަނގޭރީގެ ޑޮމިނިކް ސޮބޮސްލޭއިއަށް ކުރި ފައުލަކާއި ގުޅިގެން ރޮމެއޯ ފްރެއުލާ އަށް ވަނީ 59 ވަނަ މިނެޓުގައި ރީންދޫ ކާޑު ދައްކާފައެވެ.

ހަންގޭރީއަށް ލިބުނު ގިނަ ފުރުސަތުތަކެއް ވަނީ ގޯލާ އަމާޒުނުވެ ބޭރަށް ގޮސްފަ އެވެ. އެހެންނަމަވެސް ލިބުނު ކައުންޓާ އެޓޭކެއްގެ ބޭނުން ހިފާ ހަންގަރީ އިން ވަނީ 66 ވަނަ މިނެޓުގައި ސްވިޒާލޭންޑް ކޮޅަށް ގޯލެއްޖަހާ ފަރަގު ކުޑަކޮށްފައެވެ. މިގޯލް ކާމިޔާބޮކޮށް ދިނީ ލިވަޕޫލްގެ މެދުތެރެއަށް ކުޅެމުން އަންނަ ސޮބޮސްލޭއީ އޭރިއާ ކުރިމައްޗަށް ނަގާދިން ހުރަހަކުން ޖާޒީ ނަންބަރު 19 ބަނަބާސް ވާގާ އެވެ.

މެޗްގެ ފަހުވަގުތު ދެޓީމުންވެސް ވަނީ ގިނަ ފުރުސަތުތަކެއް ތަނަވަސް ކޮށްފަ އެވެ. ހަންގޭރީގެ ޑިފެންސަށް ކުޅެމުން އަންނަ އަޓިލާ ފިއޯލާ އަށް ވަނީ ރީންދޫ ކާޑު ދައްކާފައެވެ. އެވަގުތުގައި ސްވިޒާލޭންޑްގެ ކޯޗު މުރަޓް ޔަކިންއަށް ވެސް ވަނީ ރީންދޫ ކާޑެއް ދައްކާފައެވެ.

ހަންގަރީގެ ޑިފެންޑަރަށް ހެދުން ކުށެއްގެ ބޭނުންހިފާ ސްވިޒާލޭންޑްގެ ޖާޒީ ނަންބަރު 7 ބްރީލް އެމްބޯލޯ ވަނީ 3-1 ގެ ނަތީޒާއަކަށް ސްކޯ ބަދަލުކޮށްލާފައެވެ. މިގޯލް ކާމިޔާބުކޮށްދިނީ މެޗްގެ ފުރިހަމަ ވަގުތު ހަމަވެގެން ދެއްކި އިތުރު 5 މިނެޓު ތެރޭގައެވެ.

ގްރޫޕް އޭގެ ހުރިހާ ޓީމެއްވެސް 1 މެޗް ކުޅެފައިވާއިރު ޖަރުމަނަށާއި ސްވިޒާލޭންޑަށް ވަނީ 3 ޕޮއިންޓް ލިބިފައެވެ. ދެން މިގްރޫޕުގައި ހިމެނޭ ހަންގޭރީ އަދި ސްކޮޓްލޭންޑް ވަނީ ކުޅުނު ފުރަތަމަ މެޗުން ބަލިވެ ޕޮއިންޓެއް ނުލިބިއެވެ.

ގްރޫޕް ބީ ގެ މެޗްތައް މިރޭ ފަށާއިރު އެގްރޫޕުގެ ފުރަތަމަ މެޗުގައި ވާދަކުރާނީ ސްޕެއިން އާއި ކްރޮއޭޝިއާ އެވެ. މިމެޗް އޮންނާނީ މިރޭ 9:00 ގައެވެ. 

ޔޫރޯ އަކީ ޔޫރަޕްގެ ގަޢުމުތަކުގެ މެދުގައި ބޭއްވޭ މުބާރާތެކެވެ. މި މުބާރާތަކީ 4 އަހަރުން އެއްއަހަރު ބޭއްވޭ މުބާރާތެކެވެ. މިއަހަރު ޔޫރޯގެ މެޗްތައް ކުޅެމުން ދަނީ ޖަރުމަނުގައެވެ.