ޔޫރޯ 2024: ނެދަލޭންޑްސް ކުޅުން ފުރަތަމަ މެޗުން މޮޅުވެއްޖެ

ޔޫރޯ 2024ގެ ގްރޫޕް ޑީގެ ފުރަތަމަ މެޗްގައި ޕޮލަންޑް އަަދި ނެދަލޭންޑްސް ކުރިމަތިލި މެޗުގައި ފަހު ވަގުތު ޖެހި ގޯލާއެކު ނެދަލޭންޑްސް މޮޅުވެއްޖެ އެވެ.

ޖަރުމަނުގެ ވޮލްކްސް ޕާކް ސްޓޭޑިއަންގައި ކުޅުން މިމެޗް ނިމުނީ 2-1 ގެ ނަތީޖާއަކުންނެވެ.

މި މެޗުގައި ގިނަ ވަގުތު ބޯޅަ ގެންގުޅެ ރަނގަޅަށް ކުޅެފައި ވަނީ ނެދަލޭންޑްސް އެވެ. މެޗްގެ ގެ ފުރަތަމަ ގޯލް ޖަހާ ލީޑު ނެގީ ޕޮލަންޑުންނެވެ. ޕޮލަންޑަށް މިގޯލް ކާމިޔާބުކޮށްދިނީ 16 ވަނަ މިނެޓުގައި އެޑަމް ބުކްޝާ އެވެ.

Advertisement

ޕޮލަންޑުން ގޯލް ޖެހިތާ 13 މިނެޓު ފަހުން ކޯޑީ ގަކްޕޯ ވަނީ ގޯލެއް ޖަހާ ނެދާލޭންޑްސް އަށް ނަތީޖާ ހަމަހަމަ ކޮށްފައެވެ. މެޗްގެ 81 ވަނަ މިނެޓުގައި ކުޅެން ނިކުތް ވެގޯސްޓް ނެދަލޭންޑްސް އަށް ލީޑު ނަގައިދިނީ 83 ވަނަ މިނެޓުގައި ޑިފެންޑަރު ނެތަން އާކޭ ދިން ބޯޅައެއްގެ ބޭނުންހިފާ ގޯލު ތެރެއަށް ވައްދާލައިގެންނެވެ.

މެޗުގައި ހަމަ އެކަނި ދެއްކި ރީންދޫ ކާޑު ދައްކާފައި ވަނީ ނެދަލޭންޑްސްގެ ޖޮއެ ވީމަން އަށެވެ.

ޕޮލަންޑް އަދި ނެދާލޭންޑްސް އެންމެ ފަހުން ބައްދަލުކޮށްފައިވަނީ 2022 ވަނަ އަހަރުގެ ޔޫއެފްއާ ނޭޝަންސް ލީގުގެ ގްރޫޕް ސްޓޭޖުގަ އެވެ. އެ މެޗު ނިމިގެން ދިޔައީ 2-0 ގެ ނަތީޖާއަކުން ނެދަލޭންޑްސް މޮޅުވެގެންނެވެ.

ގްރޫޕް ޑީގެ މެޗެއް ދެން އޮންނާނީ ޖޫން 18 ވަނަ ދުވަހުގެ ރޭ ދަންވަރު 00:00 ގައެވެ. އެ މެޗުގައި ބައްދަލު ކުރާނީ އޮސްޓްރިއާ އަދި ފްރާންސެވެ. މިރޭ 9:00 ގައި ފަށާ މެޗުގައި ބައްދަލު ކުރާނީ ގްރޫޕް ސީ ގެ ސްލޮވޭނިއާ އަދި ޑެންމާކެވެ.

ޔޫރޯ އަކީ ޔޫރަޕްގެ ގައުމުތަކުގެ މެދުގައި ބޭއްވޭ މުބާރާތެކެވެ. މި މުބާރާތަކީ 4 އަހަރުން އެއްއަހަރު ބޭއްވޭ މުބާރާތެކެވެ. މިއަހަރު ޔޫރޯގެ މެޗްތައް ކުޅެމުން ދަނީ ޖަރުމަނުގައެވެ.