ޔޫރޯ 2024: ގްރޫޕްގެ 1 ވަނާގައި އޮސްޓްރިއާ ގަދަ 16 އަށް، ފްރާންސްއަށް 2 ވަނަ

ގްރޫޕް ޑީ އިން އެއްވަނާގައި އޮސްޓްރިއާ ގަދަ 16 އަށް ދަތުރުކޮށްފިއެވެ.

މި ގްރޫޕުން 3 ޓީމަކަށް ވަނީ ގަދަ 16 ޔަގީންވެފައެވެ. އެއީ އޮސްޓްރިއާ، ފްރާންސް އަދި ނެދާލޭންޑްސް އެވެ.

އޮސްޓްރިއާ ގްރޫޕްގެ 1 ވަނަ ލިބުނީ ނެދްލޭންޑްސްއާ ދެކޮޅަށް ކުޅުނު މެޗު ކާމިޔާބުކޮށްގެންނެވެ. މިމެޗު އޮސްޓްރިއާ ކާމިޔާބުކުރީ 3-2 ގެ ނަތީޖާ އަކުންނެވެ.

Advertisement

މެޗު ފަށައިގެން 6 ވަނަ މިނެޓުގައި ދޮންޔެން މަލަން ފައިގާ ޖެހި ނެދަލޭންޑްސް ބައިކޮޅަށް ވަތް ގޯލާއެކު ފުރަތަމަ ލީޑު ނެގީ އޮސްޓްރިއާއިންނެވެ. ފުރަތަމަ ހާފް ނިމިގެން ދިޔައީ 1-0 މި ގޯލާއެކު އޮސްޓްރިއާ ކުރީގައި އޮވެގެންނެވެ.

ދެވަނަ ހާފް ގައި ނެދަލޭންޑްސް އިން ވަނީ ދެފަހަރެއްގެ މަތިން ނަތީޖާ އެއްވަރު ކޮށްފައެވެ. ކޮޑީ ގަކްޕޯގެ ގޯލުން މެޗުގެ ނަތީޖާ ފުރަތަމަ އެއްވަރު ވީ މެޗުގެ 47 ވަނަ މިނެޓުގައެވެ. ނަމަވެސް އޮސްޓްރިއާއިން ވަނީ ރަނގަޅަށް ކުޅެ މެޗުގެ ލީޑު އާކޮށްފައެވެ. އެއީ މެޗުގެ 59 ވަނަ މިނެޓުގައި ރޮމާނޯ ސްމިޑް ކާމިޔާބުކޮށްދިން ގޯލުންނެވެ. 

މެޗުގެ 75 ވަނަ މިނެޓުގައި ވޮއުޓް ވެގްހޯސްޓް ދިން ބޯޅައަކުން ދެވަނަ ފަހަރަށް ނަތީޖާ ހަމަކޮށްދިނީ މެޗުގެ 75 ވަނަ މިނެޓުގައި މެންފިސް ޑިޕާއީ އެވެ. ޑިޕާއީ ފޮނުވާލި ބޯޅަ އަމާޒުވީ އޮސްޓްރިއާ ގޯލްގެ މަތީ ކަނަށެވެ.

ޑިޕާއީ މެޗްގެ ނަތީޖާ ހަމަހަމަ ކޮށްދިން ނަމަވެސް، އޭގެ 5 މިނެޓު ފަހުން އޮސްޓްރިއާއިން ވަނީ މެޗުން މޮޅުވި ގޯލް ޖަހާފައެވެ. މިގޯލް އޮސްޓްރިއާއަށް ކާމިޔާބުކޮށްދިނީ ޓީމުގެ ކެޕްޓަން މާސެލް ސަބިޓްޒާއެވެ.

މިމެޗުގައި ދެޓީމަށްވެސް ގޯލް ޖަހާނެ ރަނގަޅު ފުރުސަތުތަކެއް ލިބިގެން ދިޔައެވެ.

އޮސްޓްރިއާ އަދި ނެދަލޭންޑްސް ބައްދަލު ކުރި މެޗުގެ މޮޅު ކުޅުންތެރިޔާ އަށް ހޮވުނީ އޮސްޓްރިއާގެ ކެޕްޓަން މާސެލް ސަބިޓްޒާއެވެ.

ފްރާންސް އަދި ޕޮލޭންޑް ބައްދަލު ކުރި މެޗް ނިމިގެން ދިޔައީ 1-1 ގެ ނަތީޖާއަކުން އެއްވަރު ވެގެންނެވެ.

މިމެޗުގައި ފްރާންސް އިން ވަނީ ގޯލް ޖަހާނެ ގިނަ ފުރުސަތުތަކެއް ތަނަވަސް ކޮށްފައެވެ. 

މެޗުގައި ފުރަތަމަ ފްރާންސްއަށް ލީޑު ނަގައިދިނީ ލިބުން ޕެނަލްޓީއަކުން ކިލިއަން އެމްބަޕޭ އެވެ. އެއީ މެޗުގެ 56 ވަނަ މިނެޓުގައެވެ. 

ޕޮލޭންޑަށް ލިބުން ޕެނަލްޓީ ރޮބާޓް ލެވަންޑޯސްކީ ފޮނުވާލި ނަމަވެސް ފްރާންސްގެ ކީޕަރު މައިކް މެއިގްނަން ވަނީ މަތަކޮށްފައެވެ. ނަމަވެސް ވީއޭއާރު ބެލުމަށް ފަހު ރެފްރީ ނިމީ ބޯޅަ ފޮނުވާލުމުގެ ކުރިން ކީޕަރު ލައިނުން ބޭރަށް ނިކުމެފައިވާ ކަމަށެވެ.

ޕޮލޭންޑުން ނަތީޖާ ހަމަހަމަ ކުރީ މެޗުގެ 79 ވަނަ މިނެޓުގައެވެ. އެއީ ލިބުން ޕެނަލްޓީގެ ދެވަނަ ފުރުސަތުގައި ރޮބާޓް ލެވަންޑޯސްކީ ކާމިޔާބުކޮށްދިން ގޯލުންނެވެ. 

މިމެޗުގެ މޮޅު ކުޅުންތެރިއަކަށް ހޮވުނީ ޕޮލޭންޑުގެ ކީޕަރު ލުކަސް ސްކޮރުޕްސްކީ އެވެ. ސްކޮރުޕްސްކީ ވަނީ ޕްރާންސުން ޕްލޭންޑްގެ ގޯލާ ދިމާކޮށް ފޮނުވާލި ގިނަ ހަމަލާތަކެއް ދިފާއުކޮށްފައެވެ.

މިގްރޫޕުގެ އެއްވަނާގައި ދިޔަ އޮސްޓްރިއާ ކުރިމަތިލާނީ ގްރޫޕް އެފް ގެ 2 ވަނަ ޓީމާއެވެ. ގްރޫޕް އެފްގައި ހިމެނެނީ ޕޯޗުގަލް، ތުރުކީ، ޗެކް ރިޕަބްލިކް އަދި ޖޯޖިއާއެވެ.

ގްރޫޕުގެ ދެވަނާގައި ދިޔުމުން ފްރާންސް ކުރިމަތިލާން ޖެހޭނީ ގްރޫޕް އީ އިން 2 ވަނަ އަށް ދާ ޓީމާއެވެ. ގްރޫޕް އީގައި ހިމެނެނީ ރޯމޭނިއާ، ބެލްޖިއަމް، ސްލޮވާކިއާ އަދި ޔުލްރެއިން އެވެ. މިގްރޫޕްގެ ހުރިހާ ޓީމަކަށްވެސް 2 މެޗު ކުޅެގެން ވަނީ 3 ޕޮއިންޓް ލިބިފައެވެ. 

މިގްރޫޕުގެ 3 ވަނާގައި ދިޔަ ނެދަލޭންޑްސް ކުޅެން ޖެހޭނީ ސްޕެއިން ނުވަތަ ގްރޫޕު އީ އިން އެއްވަނަ އަށް ދާ ޓީމާއެވެ. ގްރޫޕް އީ ގައި ހިމެނެނީ ރޯމޭނިއާ، ބެލްޖިއަމް، ސްލޮވާކިއާ އަދި ޔުކްރެއިން އެވެ.