ޔޫރޯ 2024 ގެ ފުރަތަމަ މެޗް މިރޭ، ޖަރުމަނު އަދި ސްކޮޓްލޭންޑްގެ ކުރިމަތިލުމެއް

ފޯރިގަދަ ޔޫރޯ 2024 ގެ މެޗްތައް މިރޭ ފެށުމަށް ވަނީ ހަމަޖެހިފައެވެ.

ޔޫރޯ 2024 ގެ ފުރަތަމަ މެޗް ފެށުމަށް ހަމަޖެހިފައިވަނީ ރާއްޖެ ގަޑިން ދަންވަރު 12:00 ގައެވެ. ޖުމުލަ 6 ގްރޫޕަކަށް ބަހާލައިގެން، ކޮންމެ ގްރޫޕެއްގައި 4 ޓީމު ކުޅޭ މިމުބާރާތުގެ ފުރަތަމަ މެޗްގައި ބައްދަލުކުރާނީ ޖަރުމަނާއި ސްކޮޓްލޭންޑެވެ. މިމެޗަކީ ގްރޫޕް އޭ ގައި ހިމެނޭ ދެޓީމެވެ. މިގްރޫޕުގައި ދެން ހިމެނޭނީ ހަންގަރީ އަދި ސްވިޒާލޭންޑެވެ. މި ގްރޫޕުގެ ދެވަނަ މެޗްގައި ބައްދަލު ކުރާނީ މިދެޓީމެވެ. ހަންގަރީ އަދި ސްވިޒާލޭންޑް ބައްދަލުކުރާ މެޗް އޮންނާނީ 15 ޖޫން 2024 ވާ ހޮނިހިރު ދުވަހު ރާއްޖެ ގަޑިން 18:00 ގައެވެ.

މި މުބާރާތުގެ ގްރޫޕް ބީ ގައި ހިމެނެނީ އަލްބޭނިއާ، ކްރޮއޭޝިއާ، ސްޕެއިން އަދި އެންމެ ފަހުން ކުޅެވުނު މިމުބާރާތުގެ ޗެމްޕިއަނުން ކަމުގައިވާ އިޓަލީއެވެ. 2021 ވަނަ އަހަރު ކުޅެވުނު މިމުބާރާތުގެ ޗެމްޕިއަންކަން އިޓަލީއިން އުފުލާލީ ފައިނަލުގައި އިންގްލޭންޑް ބަލިކުރުމަށް ފަހުއެވެ. ފޯރިގަދަ ފައިނަލުގައި 1-1 ގެ ނަތީޖާއަކުން މެޗް އެއްވަރުވެ، ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. ޕެނަލްޓީގައި 2-3 ގެ ނަތީޖާއަކުން އިޓަލީ ކުރިހޯދިއިރު، ޕެނަލްޓީގައި އިޓަލީގެ ކީޕަރު ޑޮނަރުމާ ވަނީ އިންގްލޭންޑްގެ ބަކަޔޯ ސަކާ އަދި ޖޯޑަން ސަންޗޯ ކުރިޔަށް ފޮނުވާލި ޕެނަލްޓީ މަތަކޮށްފައެވެ.

Advertisement

މިމުބާރާތުގެ ގްރޫޕް ސީ ގައި ވާދަކުރާ 4 ޓީމަކީ ޑެންމާރކް، އެންމެ ފަހުގެ ރަނާސް-އަޕް އިންގްލޭންޑް، ސާބިއާ އަދި ސްލޮވޭނިއާއެވެ. ގްރޫޕް ޑީ އަށް ބަލާލާ އިރު، މިގަރޫގައި ވާދަކުރާނީ އޮސްޓްރިއާ، ނެދާލޭންޑްސް، ޕޮލޭންޑް އަދި 2022 ވަނަ އަހަރު ފީފާ ވޯލްޑްކަޕްގެ ރަނާސް-އަޕް ފްރާންސް އެވެ. ވަރުގަދަ ބެލްޖިއަމް ގްރޫޕް  އީގައި ލައްވާލާފައިވީ އިރު، އެގްރޫޕުގައި ދެން އޮތް 3 ޓީމަކީ ރޯމޭނިއާ، ސްލޮވާކިއާ އަދި ޔުކްރެއިން އެވެ. 2016 ވަނަ އަހަރު ބޭއްވުނު ޔޫރޯގެ ޗެމްޕިއަނުން ކަމުގައިވާ ޕޯޗުގަލް ހިމެނިފައިވަނީ ޗެކް ރިޕަބްލިކް، ޖޯޖިއާ އަދި ތުރުކީއާއި އެކު ގްރޫޕް އެފް ގައެވެ.

މި މުބާރާތް މިއަދު ފެށިގެން ދާއިރު، ކޮންމެ ޓީމެއްވެސް ގްރޫޕް ސްޓޭޖުގައި 3 މެޗް ކުޅެން ޖެހޭނެއެވެ. ކޮންމެ ގްރޫޕަކުންވެސް 2 ޓީމެއް މުބާރާތުގެ ގަދަ 16 އަށް ކޮލިފައިވާއިރު، ބާކީ އިން 4 ޖާގަ ކަޝަވަރު ވާނީ 6 ގްރޫޕުގެ ތެރެއިން ގްރޫޕުން 3 ވަނަ އަށްދާ، މުޅި މުބާރާތުގައި އެންމެ ރަނގަޅު ކުޅުމެއް ދައްކާ 4 ޓީމަށެވެ.

ޖުމުލަ 51 މެޗް ކުޅެވިގެންދާ މި މުބާރާތުގެ ގްރޫޕް ސްޓޭޖް ނިމޭނީ 27 ޖޫން 2024 ގައެވެ. 29 ޖޫން ގައި ގަދަ 16 ގެ މެޗްތައް ފެށިގެންދާނެއެވެ. ކުއާޓަރ ފައިންލްސްގެ މެޗުތައް 5 ޖުލައިގައި ފަށަން ތާވަލުކުރެވިފައިވާ އިރު، 10 އަދި 11 ޖުލައިގައި ސެމީ ފައިނަލްސް ކުޅެވިގެން ދާނެއެވެ. ޔޫރޯ 2024 ގެ ފައިންލް މެޗް ކުޅެން ހަމަ ޖެހިފައިވަނީ 15 ޖުލައި 2024 ވާ ހޯމަދުވަހު ރާއްޖެ ގަޑިން ދަންވަރު 12:00 ގައެވެ.