ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕް 2023: ޑީޓޫ ސްޕޯޓްސް ކުލަބު އަތުން ބަލިވެ ނެބަޓަންއަށް ސެމީގެ ފުރުސަތު ގެއްލިއްޖެ

ނ. ކެނދިކުޅުދޫގައި މިހާރު ކުރިއަށްދާ ދި މެންގްރޫވް އައިލެންޑް ރިޒޯޓް ބޯއީސް ފުޓްސަލް ކަޕުގައި ހެނބަދޫގެ ޑީޓޫ ސްޕޯޓްސް ކުލަބުގެ އަތުން ބަލިވެ ކުޑަފަރީގެ ނެބަޓަންއަށް ސެމީ ފައިނަލުގެ ފުރުސަތު ގެއްލިއްޖެއެވެ.

ކެނދިކުޅުދޫގެ ފުޓުބޯޅަ ސްޓޭޑިއަމުގައި މިއަދު ކުޅުނު އެ މެޗުން ނެބަޓަންގެ މައްޗަށް ޑީޓޫ ސްޕޯޓްސް ކުލަބުން ކުރި ހޯދީ 2-3 ގެ ނަތީޖާއަކުންނެވެ. މިއީ ޑީ ޓޫ ސްޕޯޓްސް ކުލަބުން މި މުބާރާތުގައި ހޯދި ފުރަތަމަ މޮޅެވެ. ފުރަތަމަ މެޗުގައި ވިންޑް ވޯރިއާސް އަތުން އެ ޓީމު ބަލިވެފައިވާ އިރު، ސެމީގެ ޖާގައެއް އެ ޓީމަށް ކަށަވަރު ވާނީ އަންނަ މެޗުގައި ޓީމް ލަންދޫ ބަލިކޮށްގެންނެވެ. އަނެއްކޮޅުން ކުޅުނު ދެ މެޗުންވެސް ބަލިވެ މުބާރާތުގައި ބާކީ އެއްމެޗު އޮއްވާ ނެބަޓަންއަށް ވަނީ ސެމީގެ ޖާގަ ގެއްލިފައެވެ. އެ ޓީމުން ފުރަތަމަ މެޗުގައި ބަލިވީ ޓީމް ލަންދޫ އަތުންނެވެ.

މިއަދުގެ މެޗު ފަށައިގެން ދެ ޓީމަށް ވެސް ލަނޑުޖަހާނެ ރަނގަޅު ފުރުސަތުތަކެއް ލިބުނު އިރު ފުރަތަމަ ގޯލު ޖަހައި ލީޑު ނެގީ ޑީޓޫ ސްޕޯޓްސް ކުލަބުންނެވެ. އެ ޓީމަށް މެޗުގެ ކުރީކޮޅު ލީޑު ނަގައިދިނީ މުހައްމަދު ވަހީދު (ކޮކީ) އެވެ. އެއަށްފަހު ނެބަޓަންއިން ކުޅުން ރަނގަޅުކޮށް ވަނީ ގޯލެއް ޖަހައި ނަތީޖާ ހަމަހަމަ ކޮށްފައެވެ. އެ ގޯލަކީ އަހުނަސް އަހުމަދު ޖެހި ގޯލެކެވެ.

Advertisement

ނެބަޓަންއިން ވަނީ ފުރަތަމަ ގޯލުން ލިބުނު ހިތްވަރާއެކު ރަނގަޅަށް ކުޅެ އިތުރު ގޯލެއް ވެސް މާ ގިނައިރުތަކެއް ނުވަނީސް ޖަހައިފައެވެ. އެ ގޯލު ކާމިޔާބު ކުރީ ހުސައިން ޝަރީފް މުހައްމަދުއެވެ. ނެބަޓަންއިން ލީޑު ނެގިތާ މިނަޓެއް ނުވަނީސް ޑީޓޫ ސްޕޯޓްސް ކުލަބުން އަނެއްކާވެސް ވަނީ ގޯލެއް ޖަހައިފައެވެ. އެއީ  އަލީ ފާއިޒް އެ ޓީމަށް ޖަހައިދިން ގޯލެކެވެ.

ދެވަނަ ހާފުގައި ދެ ޓީމުން ވެސް މޮޅުވާން ގިނަ އެޓޭކްތަކެއް އުފެއްދި އިރު އެ ޑީޓޫ ސްޕޯޓްސް ކުލަބުން މެޗުގެ ފަހު ގޯލު ޖަހައި ވަނީ މެޗު ކާމިޔާބުކޮށްފައެވެ. އެ ގޯލު އެ ޓީމަށް ޖަހައިދިނީ އެ މެޗުގައި މޮޅު ކުޅުމެއް ދެއްކި ކޮކީއެވެ. 

މި މުބާރާތުގެ ޓައިޓަލް ސްޕޮންސަރަކީ ދި މެންގްރޫވް އައިލެންޑް އެވެ. ޕާޓުނަރުންގެ ގޮތުގައި ހިމެނޭ ސްޕޮންސަރުންނަކީ ޕްރިންޓިންގް ޕާޓުނަރު - ރެޑް ކްރިއެޓިކް، ޓްރޮފީ ޕާޓުނަރު - ލޭޔާ، ޕޮޓޯ ޕާޓުނަރު - ކެޕްޗާސް، ގްރެފިކް ޕާޓުނަރު - އެލައިވްޑިޒައިންސް، ޓެލެކޮމް ޕާޓުނަރު - އެންފްލެއާ، ބެވެރެޖް ޕާޓުނަރު - ކެނދި މާޓު، ޓްރެވަލް ޕާޓުނަރު - އަރިސް ގްރީން، މިއުޒިކް ޕާޓުނަރު ޑީޖޭ ކައްޗޭ އަދި ކިޓް ޕާޓުނަރު - ޖޯޒީ.އެމްވީއެވެ.

ކޯ ސްޕޮންސަރުންނަކީ ސިލިކާ، ލޯކަލް އާރްކް ސްޓޫޑިއޯ, ޕްރޮޓޯން ވައިބްސް އަދި ޑްރީމް ދޯންޏެވެ.

މި މުބާރާތާ ބެހޭ އެންމެ ފަހުގެ އަޕްޑޭޓުތައް ރަށްފުށު އޮންލައިންގެ ޙަބަރުތަކުންނާއި، ސޯޝަލް މީޑިއާގެ ޕޭޖުތަކުން ފެންނަން ހުންނާނެއެވެ.