ކުއާޒޯ ދި މެންގްރޫވް އައިލެންޑް ޗެންޕިއަންޝިޕްެ 2023ގެ ގުރު ނަގައިފި!

CUARZO The Mangrove Island Championship 2023 ge guru nagaifi

ފޮޓޯ/ކެނދިކުޅުދޫ ކައުންސިލް

12 މާރިޗު 2023

އަންނަ މަހު ނ.ކެނދިކުޅުދޫގައި ފެށުމަށް ހަމަޖެހިފައިވާ "ކުއާޒޯ ދި މެންގުރޫވް އައިލެންޑް ޗެންޕިއަންޝިޕް 2023"ގެ ގުރުއަތުލުން، ރޭ ބާއްވަފިއެވެ.

ނ.ކެނދިކުޅުދޫގައި ގާއިމް ކޮށްފައިވާ ފިފާ ސްޑޭންޑާޑުގެ ޓާފް ދަނޑުގައި، އެ ރަށު ކައުންސިލުން އިންތިޒާމްކޮށްގެން މިދިޔަ އަހަރު ބާއްވަން ފެށި މި މުބާރާތް، މިއަހަރު ބޭއްވުމަށް ތާވަލް ކުރެވިފައިވަނީ އަންނަ މަހުގެ 4 ވަނަ ދުވަހުގެ ހަވީރު 16:00 ގައެވެ. މި އަހަރުގެ މި މުބާރާތުގައި ޖުމްލަ 4 ޓީމެއް ބައިވެރިވެފައިވެއެވެ. އެއީ އެންމެ ފަހު ޗެންޕިއަން ކޮމެޓްސް ސުޕޯޓްސް ކުލަބް، ފިފްޓީ-ފިފްޓީ އަދި ޑަކް ސިޓީގެ އިތުރުން ވަތުއޮޑި ޓައިޓަންސްއެވެ.

މެޗް ޝެޑިއުލް -- ފޮޓޯ/ކެނދިކުޅުދޫ ކައުންސިލް

ކެނދިކުޅުދޫ ކައުންސިލްގެ މީޓިން ރޫމްގައި ގުރުނެގުމަށް ރޭ ބޭއްވުނު ޙާއްސަ ހަރަކާތުގައި ގުރުއަތުލުން ކުރިއަށް ގެންދެވުނު އިރު، މުބާރާތުގެ ފުރަތަމަ މެޗްގައި ބައްދަލުކުރާނީ ވަތުއޮޑި ޓައިޓަންސް އަދި ކޮމެޓްސް ސުޕޯޓްސް ކުލަބެވެ. ލީގު އުސޫލުން ކުރިއަށް ގެންދިއުމަށް ހަމަޖެހިފައިވާ މި މުބާރާތުގައި، ލީގުގެ ފުރަތަމަ ބުރު ނިމޭ އިރު އެންމެ ގިނައިން ޕޮއިންޓް ހޯދާ 2 ޓީމް ފައިނަލްގައި ބައްދަލު ކުރާނެއެވެ.

2022 ވަނަ އަހަރު ބާއްވަން ފެށުނު މި މުބާރާތަށް ބޮޑު ތަރުޙީބެއް ލިބިފާވައިރު، މިފަހަރުގެ މުބާރާތަށް ވަނީ ފައިސާގެ އިނާމް ވެސް އިތުރުކޮށްފައެވެ. އެ ގޮތުން ޗެންޕިއަން ޓީމަށް 50،000 ރުފިޔާގެ ފައިސާގެ އިނާމް އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމް ދިނުމަށް ވަނީ ކަނޑައަޅާފައެވެ. 2023 ވަނަ އަހުރުގެ މި މުބާރާތުގެ ޓައިޓަލް ސުޕޮންސަރަކީ "ކުއާޒޯ ޕުރައިވެޓް ލިމިޓެޑް"އެވެ.