ބައްސާމް އެފްއޭއެމްގައި ހިންގި ކަމަށް ބުނާ ޖަރީމާތަކުގެ މައްސަލައިގައި ޕީޖީއިން ދައުވާ ކުރުމާ ގާތަށް!

Bassam hingi kamah bunaa jareemaathakuge massalaigai PG in dhauvaa kurumaa gaathah!

އެފްއޭއެމްގެ ރައީސް ބައްސާމް އަދީލް ޖަލީލް - ފޮޓޯ/ ފަޔާޒް މޫސާ

1 ޑިސެންބަރު 2023

ރާއްޖޭގެ ފުޓްބޯޅައިގެ މައި އިދާރާ، އެފްއޭއެމްގެ ރައީސްގެ މަގާމުގައި ހުންނެވީ ބައްސާމް އަދީލް ޖަލީލުގެ މައްޗަށް ދައުވާކުރާނެ ކަމަށާއި އެ ވަރަށް ހެކި ވެސް އެބަހުރި ކަމަށް ޕްރޮސެކިއުޓަ ޖެނެރަލް އޮފީހުން ބުނެފި އެވެ.

މިދިޔަ ބުރާސްފަތި ދުވަހު މީޑިއާތަކާ ބައްދަލު ކުރައްވައި ޕީޖީ ހުސައިން ޝަމީމު ވިދާޅުވީ އެފްއޭއެމަށް ފީފާ އިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން މިހާތަނަށް ބެލި ބެލުމުން އެ އިދާރާގެ ރައީސް ބައްސާމަކީ އެންމެ އިސްކޮށް ތުހުމަތުކުރެވޭ ފަރާތް ކަމަށެވެ. އެގޮތުން މިހާތަނަށް ޕީޖީ އޮފީހަށް ގިނަ މައުލޫމާތުތަކެއް ލިބިފައިވާ ކަމަށާއި، މަސައްކަތް ކުރަނީ އެފްއޭމުގެ ރައީސް ބައްސާމާއި އެތަނުގެ އެހެން ވެރިންނަށް ދައުވާކުރެވޭ މިންވަރަށް ހެކި ހޯދުމަށް ފަހު މި ހަފުތާގައި ދައުވާ ކުރުމަށް ކަމަށް ވިދާޅުވި އެވެ.

ޕީޖީ ވިދާޅުވި ގޮތުގައި ފުލުހުންގެ ތަހުގީގަށް މިހާތަނަށް ވެސް ބޮޑެތި ކުރިއެރުންތަކެއް ލިބިފައިވެ އެވެ.

ޝަމީމް ވިދާޅުވީ ފައިސާ ނަހަމަ ގޮތުގައި ބޭނުންކޮށްފައިވާ އިރު، ގިނަ އަދަދެއްގެ ފައިސާ އެކި ގޮތްގޮތަށް ބޭނުންކޮށްފައި ހުރިކަން ފާހަގަކުރެވިފައިވާ ކަމަށެވެ. އެގޮތުން އެފްއޭއެމުގެ ބައެއް ވެރިން ބޭރަށް ކުރާ ދަތުރުތަކުގައި އެތަނުގެ ފައިސާ ޚަރަދުކޮށްފައި ހުންނަ ގޮތް ފެންނަން ހުރި ކަމަށް ވިދާޅުވި އެވެ.

އެފްއޭއެމުން ބޮޑެތި މައްސަލަތަކެއް ހުރި އިރު، ވަރަށް ގިނަ ބަޔަކު އަންނަނީ ބައްސާމްގެ އިސްތިއުފާ އަށް ގޮވަމުންނެވެ. އޭނަ އެފްއޭއެމްގެ ރައީސްކަމަށް ވަޑައިގެންނެވީ 2016 ގަ އެވެ.