ޔޫރޯ 2024: އޮސްޓްރިއާ ހިތްދަތި ގޮތަކަށް ކަޓުވާލައި ކުއާޓާގެ ފަހު ޖާގަ ހޯދީ ތުރުކީއިން

ޔޫރޯ 2024 ކުއާޓާ ފައިނަލްގެ ފަހު ޖާގަ ތުރުކީއަށް ލިބިއްޖެއެވެ.

ތުރުކީ އަށް މި ޖާގަ ލިބުނީ އޮސްޓްރިއާ އާ ދެކޮޅަށް ކުޅުން ގަދަ 16ގެ މެޗުން މޮޅުވެގެންނެވެ. މިމެޗުން ތުރުކީ މޮޅުވީ 2-1 ގެ ނަތީޖާއަކުންނެވެ.

މެޗުން ދަށްވިކަމުގައި ވީނަމަވެސް އޮސްޓްރިއާއިން ވަނީ މި މެޗުގަޔާއި މިމުބާރާތުގައި ރަނގަޅު ކުޅުމެއް ދަށްކާފައެވެ. ގަދަ 16 އަށް އޮސްޓްރިއާ ކޮލިފައިވީ ފްރާންސް، ނެދަލޭންޑްސް އަދި ޕޮލޭންޑް ހިމެނުން ގްރޫޕުގެ އެއްވަނަ ޓީމުގެ ގޮތުގައެވެ.

Advertisement

މެޗުގެ ފުރަތަމަ މިނެޓުގައި ތުރުކީން ވަނީ އޮސްޓްރިއާ ކޮޅަށް ގޯލު ޖަހާ މެޗުގައި ލީޑު ނަގާފައެވެ. މި ގޯލް ތުރުކީއަށް ކާމިޔާބުކޮށްދިނީ އެޓީމުގެ ޑިފެންސަށް ކުޅުން މެރިހް ޑެމިރަލް އެވެ. 

ފުރަތަމަ ހާފުނިމުން އިރު 1-0 ގެ ނަތީޖާއަކުން ކުރީގައި އޮތީ ތުރުކީއެވެ.

ދެވަނަ ހާފު ފަށައިގެން 50 ވަނަ މިނެޓުގައި އޮސްޓްރިއާގެ އާނާޓޮވިޗް އަށް ވަނީ ގޯލް ޖަހާނެ ހުސް ފުރުސަތެއް ލިބި ބޭކާރުވެފައެވެ. އާނާޓޮވިޗް ފޮނުވާލި ބޯޅަ ގޯލާ ދިމާވިނަމަވެސް ތުރުކީ ކީޕަރު ވަނީ އެހަމަލާ ދިފާއުކޮށްފައެވެ.

ތުރުކީއަށް މިމެޗުގައި މާ ރަނގަޅު ކުޅުމެއް ނުދެށްކުން ކަމުގައި ވީނަމަވެސް، އެޓީމު ކުރިޔަށް ކުޅޭ ބޯޅަތަކުގައި އޮސްޓްރިއާގެ ޑިފެންސަށް ބާރުބޮޑު ކުރެއެވެ. ތުރުކީއަށް މިމެޗުގައި ލީޑު ފުޅާކޮށްދިނީވެސް ފުރަތަމަ ގޯލް ޖަހައިދިން މެރިހް ޑެމިރަލް އެވެ. އެއީ މެޗުގެ 59 ވަނަ މިނެޓުގައި ތުރުކީގެ އަރްދާ ގުލާ ނަގާދިން ކޯނަރެއް ޑެމިރަލްގެ ބޮލުން ގޯލްތެރެއަށް ވަށްދާލާގެންނެވެ. 

މެޗުގެ 66 ވަނަ މިނެޓުގައި އޮސްޓްރިއާއިން ވަނީ މެޗުގައި ތުރުކީ އިން ނަގާފައިވާ 2 ގޯލުގެ ލީޑު 1 ގޯލަށް ތިރިކޮށް އުންމީދު އާކޮށްފައެވެ. މިގޯލް ކާމިޔާބުކޮށްދިނީ ލިބުން ކޯނަރަކުން ދެވަނަ ހާފުގައި ކުޅެން ނިކުތް މައިކަލް ގްރެގޮވިޗެވެ.

އޮސްޓްރީއާގެ ގޯލަށްފަހުވެސް އެޓީމުން ނަތީޖާ ހަމަހަމަ ކުރުމަށް މަސައްކަތް ކުރި ނަމަވެސް، އެކަން ވަނީ ނާކާމިޔާބުވެފައެވެ. މިމެޗު ނިމިގެން ދިޔައީ މެރިހް ޑެމިރަލްގެ 2 ގޯލުން ތުރުކީ 2-1 ގެ ނަތީޖާއަކުން ކުރީގައި އޮވެގެންނެވެ.

މިމެޗުގެ މޮޅު ކުޅުންތެރިއަކަށް ހޮވުނީ ތުރުކީއަށް 2 ގޯލް ޖަހައިދިން ޑިފެންޑަރު މެރިލް ޑެމިރަލް އެވެ.

އޮސްޓްރިއާ އުންމީދީ ފެށުންމަކުން މުބާރާތް ފެށިނަމަވެސް މިހިސާބުން މިވަނީ މުބާރާތް ނިންމާލަން ޖެހިފައެވެ.

ކުއާޓާ ފައިނަލްގައި ތުރުކީ ނިކުންނާނީ ނެދަލޭންޑްސް އާ ދެކޮޅަށެވެ. ނެދަލޭންޑްސް ކުއާޓާ ފައިނަލަށް ދަތުރު ކުރީ ރޯމޭނިއާ ކައިރިން 3-0 ގެ ނަތީޖާއަކުން މޮޅުވެގެންނެވެ.

ތުރުކީ އަދި ނެދަލޭންޑްސް ކުއާޓާ ފައިނަލްގައި ބައްދަލު ކުރާ މެޗް ފަށާނީ  7 ޖުލައި 2024 ގެ 00:00 ގައެވެ.