ފިފްޓީ ފިފްޓީ ބަލިކޮށް ކޮމެޓްސް ތަށި އުފުލާލައިފި، މަރުހަބާ!

50-50 balikoh Comets thashi ufulaalaifi, Maruhabaa!

ކޮމެޓްސް ސްޕޯޓްސް ކުލަބުން މުބާރާތުގެ ތަށި އުފުލާލަނީ --- ކެނދިކުޅުދޫ ކައުންސިލް

12 މާރިޗު 2023

ކުއާރޒޯ ދަ މެންގްރޫވް އައިލެންޑް ޗެމްޕިއަންޝިޕުގެ ފައިނަލުގައި ފިފްޓީ ފިފްޓީ ބަލިކޮށް ކޮމެޓްސް ސްޕޯޓްސް ކުލަބުން ވިދިވިދިގެން ދެވަނަ ފަހަރަށް މި މުބާރާތް ކާމިޔާބުކޮށްފިއެވެ.

ކެނދިކުޅުދޫގެ ޓާފު ދަނޑުގައި މިއަދު ހަވީރު ކުޅުނު މެޗުން ފިފްޓީ ފިފްޓީގެ މައްޗަށް އެ ޓީމުން ކުރި ހޯދީ 0-1 ގެ ނަތީޖާއަކުންނެވެ. ވާދަވެރި ކުޅުމެއް ފެނުނު އެ މެޗުން ހޯދި މޮޅާއެކު ކޮމެޓްސް ވަނީ މި މުބާރާތް މިހާތަނަށް ބޭއްވި ދެ ފަހަރުވެސް ޗެމްޕިއަންކަން ހޯދައި މުބާރާތް މިލްކު ކުރުމަށް އަމާޒު ޖަހައިފައެވެ.

ކޮމެޓްސް ފައިނަލަށް ދަތުރު ކުރީ ލީގު ބުރުގައި ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށް ހަ ޕޮއިންޓާއެކުއެވެ. ފިފްޓީ ފިފްޓީ ފައިނަލަށް ދިޔައީ ކުޅުނު ތިން މެޗުން މޮޅުވެ އެއްވަނައިގެ މަގާމުގައެވެ.

ގިނަ ސަޕޯޓަރުންތަކެއްގެ ކުރިމަތީގައި މިއަދު ކުޅުނު މެޗުގައި ކޮމެޓްސްއިން ޖެހި ހަމައެކަނި ގޯލު ކާމިޔާބު ކުރީ ފުރަތަމަ ހާފުގެ ފަހު ވަގުތުއެވެ. އެ ޓީމުގެ އަބްދުﷲ ސުއާދުއަށް ފިފްޓީ ފިފްޓީގެ ކީޕަރު އިސްމާއިލް ރާއިފް ކުރި ފައުލަކާ ގުޅިގެން ލިބުނު ޕެނަލްޓީއަކުން މި ގޯލު ކާމިޔާބު ކޮށްދިނީ މެޗުގައި މޮޅު ކުޅުމެއް ދެއްކި މުހައްމަދު އައްޒާމްއެވެ.

މެޗުގައި ލަނޑު ޖަހާނެ ރަނގަޅު ފުރުސަތުތަކެއް ފިފްޓީ ފިފްޓީއިން ފަހު ހާފުގައި ތަނަވަސްކުރި ނަމަވެސް އަލީ ސަމާލް އާއި ނިހާދު ފޮނުވާލި ނުރައްކާތެރި ހަމަލާތައް ކޮމެޓްސްގެ ކީޕަރު އާތިފް އަހުމަދު (އާތީ) ވަނީ ދިފާއުކޮށްފައެވެ.

މިއަދުގެ މެޗުގެ މޮޅު ކުޅުންތެރިޔަކަށް ހޮވުނީ ކޮމެޓްސްގެ އައްޒާމްއެވެ. އައްޒާމް ވަނީ މީގެ އިތުރުން މުބާރާތުގެ ގަދަ 11 ގައި ވެސް ހިމެނިފައެވެ. އޭގެ އިތުރުން މުބާރާތުގެ މޮޅު ކުޅުންތެރިޔާގެ މަގާމު ވެސް ހޯދީ އޭނާއެވެ.

މުބާރާތުގެ އެންމެ މޮޅު ކީޕަރަކަށް އާތީ ހޮވުނު އިރު އެންމެ އުންމީދީ ކުޅުންތެރިޔަކަށް ވެސް ހޮވުނީ ކޮމެޓްސްގެ އަރަމުން އަންނަ ތަރި ރިފްނާން އާދަމްއެވެ. އެންމެ ގިނަ ގޯލު ޖެހި ކުޅުންތެރިޔަކަށް ހޮވުނީ އަލީ ސަމާލްއެވެ. އޭނާ ވަނީ މުބާރާތުގައި ފަސް ގޯލު ޖަހައިފައެވެ. މީގެ އިތުރުން އެންމެ ފެއާ ޕްލޭ ޓީމަކަށް ހޮވުނީ ވަތުއޮޑި ޓައިޓަންސްއެވެ.

މުބާރާތުގެ ގަދަ 11:

1. އާތިފް އަހުމަދު (ކޮމެޓްސް)

2. ހުސައިން ވިޝާލް (ކޮމެޓްސް)

3.އަހުމަދު އަލީ (ފިފްޓީ - ފިފްޓީ)

4. އަބްދުލް ރަހްމާން ހުސައިން (ވަތުއޮޑި ޓައިޓަންސް)

5. އަހުމަދު ނައުފަލް (ޑަކް ސިޓީ)

6. އިބްރާޙިމް އަލީމް (ފިފްޓީ - ފިފްޓީ)

7. މުހައްމަދު އައްޒާމް (ކޮމެޓްސް)

8.އަލީ ބުޝްރީ (ކޮމެޓްސް)

9.މޫސާ ނަދީމް (ފިފްޓީ - ފިފްޓީ)

10. އަލީ ސަމާލް (ފިފްޓީ - ފިފްޓީ)

11. އަހުމަދު މިފްރާހް (ފިފްޓީ - ފިފްޓީ)