ޔާމީނަށް ކުރިމަތި ނުލެއްވޭނަމަ ޕާޓީން އެހެން މީހަކު ކުރިމަތިލިޔަ ނުދޭނެކަން މާ ކުރިން އެނގޭ، ވިސްނީ ޕާޓީ ބިކަ ނުވާނެ ގޮތަކަށް ކަން ކުރުމަށް: އަބްދުއްރަހީމް

Yamin ah kurimathi nulevvey nama party in ehen meehaku kurimathi liya nudheynekan maa kurin ingey, Visnee party bika nuvaane gothakah kan kurumah: AbdulRaheem

ޕީއެންސީގެ އާ ޖަގަަހަ ހުޅުވުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް

24 ޖޫން 2024

ކުރީގެ ރައީސް އަބްދުﷲ ޔާމީނަށް ޕީޕީއެމް، ޕީއެންސީގެ ޓިކެޓުގައި ރިޔާސީ އިންތިހާބަށް ވާދަ ކުރެއްވުމުގެ ފުރުސަތު ލިބިވަޑައިނުގަތް ނަމަ ޕާޓީން އެހެން މީހަކު ވެސް ކުރިމަތިލިޔަ ނުދޭނެކަން މާ ކުރިން އެނގޭކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ޕީއެންސީގެ އާ ޖަގަަހަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަބްދުއްރަހީމް ވިދާޅުވީ ބެކްއަޕް ޕްލޭންގެ ގޮތުގައި އެތައް ޕްލޭނެއް ހެދީ 30 އަހަރުގެ ތަޖުރިބާއާ އެކު ރައީސް ޔާމީން ރަނގަޅަށް އެނގޭތީ ކަމަށެވެ. އަދި ވިސްނަމުން ދިޔައީ ވިސްނީ ޕާޓީ ބިކަ ނުވާނެ ގޮތަކަށާއި ޕާޓީގެ މެމްބަރުން މަގުމަތި ނުވާނެ ގޮތަކަށް ކަން ކުރުމަށް ކަމަށް ވިދާޅުވި އެވެ.

"އެހެންވެ ރާވަމުން ދިޔައީ، އަޅުގަނޑުގެ ހިތުގައި ޔަގީން ކަމާއެކު އޮތް ޕީޕީއެމް، ޕީއެންސީން ރިޔާސީ އިންތިހާބުގަ ވާދަ ކުރާނޭ، އަޅުގަނޑުމެންނަށް އެނގޭ ޕްލޭން ހެދިއިރު ވެސް އެމަނިކުފާނު (ރައީސް ޔާމީން)ގެ ރުހުމުގައި އަޅުގަނޑުމެންނަށް ރިޔާސީ އިންތިހާބުގައި ވާދަ ނުކުރެއްވޭނެކަން،" އަބްދުއްރަހީމް ވިދާޅުވި އެވެ.

މީގެ އިތުރުން، ރައްޔިތުންގެ އިތުބާރު ލިބިފައި އޮތް ވެރިކަމެއް މިއަދު ގާއިމްކުރެވިފައި މިއޮތީ ޕީޕީއެމް، ޕީއެންސީގެ ލީޑަޝިޕުން ނިންމެވި ނިންމެވުންތަކުގެ ސަބަބުން ކަމަށް ވެސް އަބްދުއްރަހީމް ވިދާޅުވި އެވެ.

އަދި މިއަދު މި ސަރުކާރާ ދެކޮޅަށް ރައީސް ޔާމީނާއި ޕީއެންއެފް އިން މަސައްކަތް ކުރަމުން އެދަނީ އެއްވެސް ވަރެއްގެ ލަދެއް ނެތުމުން ކަމަށް ވެސް އަބްދުއްރަހީމް ވިދާޅުވި އެވެ.