ޑްރަގުގެ މައްސަލައެއްގަައި ހިނގި އަނިޔާވެރި މަރަކަށްފަހު ރައީސްގެ ވަރުގަދަ އިންޒާރެއް!

Drug ge massalaehgai hingi aniyaaveri marakah fahu raees ge varugadha inzaareh

20 ގަޑިއިރު ކުރި

މަސްތުވާތަކެތީގެ މައްސަލައެއްގައި ހިނގި ހަމަނުޖެހުމެއްގައި މީހަކު މަރުވިތާ ހަފުތާއެއް ނުވަނީސް މަސްތުވާތަކެތީގެ ވިޔަފާރިކުރާ މީހުންނަށް މަރުގެ އަދަބު ދެވޭގޮތަށް ގާނޫނު އިސްލާހުކުރަން ބޭނުންފުޅުވާކަން ރައީސް ޑރ. މުހައްމަދު މުއިއްޒު ހާމަކުރައްވައިފިއެވެ.

ރައީސް މިފަދައިން އަންގަވާފައި މިވަނީ ލ. މާވަށުގައި ވަޅިން ހަމަލާދީ މީހަކު މަރާލާފައިވާ ދަނޑިވަޅެއްގައެވެ. އެއީ މަސްތުވާތަކެތީގެ މައްސަލައަކާ ގުޅިގެން ހިނގި ހާދިސާއެކެވެ.

މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލް ސަރުކާރުގެ ފަރާތުން ވަނީ މީގެކުރިން މަޖިލީހަށް ހުށަހަޅާފައެވެ. އެ ބިލް ހުށަހެޅުމުގެ ކުރިން ހޯމް މިނިސްޓަރު އަލީ އިހްސާން ވަނީ ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމަށް އެ ބިލްގައި ހިމަނާނެ ކަމަށެވެ.

އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ އެހެން ގައުމުތަކުގައި ވެސް ކަންކުރާ ގޮތަށް މަސްތުވާތަކެތީގެ ވިޔަފާރިކުރާ ފަރާތްތަކަށް މަރުގެ އަދަބާއި އެހެނިހެން ބޮޑެތި އަދަބުތައް ކަނޑައެޅުމަށް ބިލު އިތުރަށް ދިރާސާކުރަން ދަންނަވާފައިވާ ކަމަށެވެ.

"މަސްތުވާތަކެތީގެ ވަބާއިން ދިވެހި މުޖުތަމައު ސަލާމަތްކޮށް މަސްތުވާތަކެތިން ދުރުހެލިވެފައިވާ ޖީލެއް ބިނާކުރުމަކީ މި ސަރުކާރުގެ އެންމެ މުހިންމު އެއް އަމާޒު،" ރައީސް ވިދާޅުވިއެވެ.