ޓްރެއިނަރެއްގެ އެހީތެރިކަމާއެކު މިނިސްޓަރު ފައިސަލް އިނގިރޭސި ބަހުން ފަރިތަކަމާއެކު ވާހަކަދައްކަވަން ދަސްކުރުމުގެ މަސައްކަތް ފައްޓަވަނީ

ޓްރެއިނަރެއްގެ އެހީތެރިކަމާއެކު އިނގިރޭސި ބަހުން ފަރިތަކަމާއެކު ވާހަކަދައްކަވަން ދަސްކުރުމުގެ މަސައްކަތް ފައްޓަވާނެކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ. 

ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން މިނިސްޓަރު ފައިސަލް ވިދާޅުވީ އަމާޒަކީ ކުރިއަށް އޮތް ހަ މަސް ތެރޭ ޓްރެއިނަރެއްގެ އެހީތެރިކަމާއެކު އިނގިރޭސި ބަހުން ފަރިތަކޮށް ވާހަކަދައްކަން ދަސްކުރުން ކަމަށެވެ. 

އިނގިރޭސި ބަހުން ވާހަކަ ދެއްކުމާއި ގިނަ މީހުންތެރޭ ވާހަކަ ދެއްކުން ނުވަތަ "ޕަބްލިކް ސްޕީކިން" ގެ ހުނަރުވެސް ތަރައްގީކުރަން ބޭނުންވާކަމަށް މިނިސްޓަރު ވިދާޅުވި އެވެ. 

Advertisement

" ޓުއަރިޒަމް މިނިސްޓަރު ވީމަ، (ވާހަކަ ދެއްކުމުގައި) ރައްޔިތުން ބޭނުންވާ ވަކި ސްޓެންޑަޑެއް ހުންނަކަން ގަބޫލުކުރަން، ޓްރެއިނިން ހަދާ ކުރިއަށް އޮތް ހަ މަސް ތެރޭ އިނގިރޭސި ބަހުން ވާހަކަދެއްކުން ރަނގަޅުކުރާނަން،" މިނިސްޓަރު ވިދާޅުވި އެވެ.

އިންޓަނޭޝަނަލް ޕްލެޓްފޯމްތަކުގައި ފަރިތަކަމާއެކު އިނގިރޭސި ބަހުން ފަރިތަކަމާއެކު ވާހަކަދައްކަން މިނިސްޓަރަށް އެނގިނުލައްވާކަމަށް ބުނެ ގިނަ ބައެއްގެ ފާޑުކިޔުން ފުރަތަމަ ދުވަހުން ފެށިގެން މިނިސްޓަރަށް އަމާޒުވެފައިވެއެވެ. އޭގެ ތެރޭގައި އާންމު ރައްޔިތުންނާއި ސިޔާސީގޮތުން ހިޔާލު ތަފާތު ބޭފުޅުން ހިމެނެއެވެ. 

އެކަމުގެ ސަބަބުން ބައިނަލްއަގްވާމީ މައިދާނުގައި ރާއްޖޭގެ އަގު ވެއްޓޭނެކަމަށް ބުނެ ގިނަ ބައެއްގެ ފާޑުކިޔުން މިނިސްޓަރަށް އަމާޒުވެފައިވެއެވެ. 

މިނިސްޓަރު ވިދާޅުވި ގޮތުގައި ބައެއް ސިޔާސީ ބޭފުޅުން ހާއްސަކޮށް ޕީޕަލްސް ނޭޝަނަލް ފްރަންޓް (ޕީއެންއެފް)ގެ އިސް ބޭފުޅުންގެ ފާޑުކިޔުމަކީ ޒާތީ ފާޑު ކިޔުމެކެވެ.