ސްޓެލްކޯއިން ފަސްލައްކަ ގަސް އިންދުމުގެ މަޝްރޫއެއް ފަށައިފި

Stelco in fas lakka gass indhumuge mashroou eh fashaifi

މިއަދު އެކަނިވެސް ރާއްޖޭގެ އެކި ހިސާބުތަކުގައި އެ ކުންފުނީގެ ފަރާތުން 27،000 ގަސް އިންދާނެ

5 ޖޫން 2024

މިއަދު ފާހަގަކުރާ ދުނިޔޭގެ ތިމާވެށީގެ ދުވަހާ ގުޅުވައިގެން ސްޓެލްކޯއިން ފަސްލައްކަ ގަސް އިންދުމުގެ މަޝްރޫއެއް ފަށައިފި އެވެ.

މި މަޝްރޫއު އިފްތިތާހުކުރުމަށް ކ. ތުލުސްދޫގައި މިއަދު ހަވީރު ބޭއްވި ރަސްމިއްޔާތުގައި ކުންފުނީގެ މެނޭޖިން ޑިރެކްޓަރ ހުސެއިން ފަހުމީ ވިދާޅުވީ މި މަޝްރޫއު މާލެ ސަރަހައްދުގެ އިތުރުން އިތުރު 33 ސަރަހައްދެއްގައި ކުރިއަށް ގެންދާނެ ކަމަށެވެ.

މިއަދު އެކަނިވެސް ރާއްޖޭގެ އެކި ހިސާބުތަކުގައި އެ ކުންފުނީގެ ފަރާތުން 27،000 ގަސް އިންދާނެ ކަމަށް ފަހުމީ ވިދާޅުވި އެވެ.

ރަސްމިއްޔާތުގައި ވާހަކަފުޅު ދައްކަވަމުން ފަހުމީ ވިދާޅުވީ މިއީ މި މަޝްރޫއުގެ ފެށުން ކަމަށާއި ކުރިއަށް އޮތް ތަނުގައި މި މަޝްރޫއުގެ ދަށުން ކުންފުނިން އިންދާ ގަސްތަކުގެ ތަފާސްހިސާބުތައް ސަރުކާރާއި ކަމާ ބެހޭ އިދާރާތަކާ ހިއްސާ ކުރާނެކަމަށް ވިދާޅުވި އެވެ.

"މިއަދު މި އިންދާ ގަހުގެ ފައިދާ ފަހަރުގައި އަޅުގަނޑުމެންނަށް ނުކޮށްފާނެ، އެހެންނަމަވެސް މިކަމުގެ ފައިދާ މިއަދުގެ ތުއްތު ކުދިންނަށް ކުރާނެ، މިއީ މުސްތަގްބަލަށް ކުރެވޭ އިންވެސްޓްމަންޓެއް،" ފަހުމީ ވިދާޅުވި އެވެ.

ދުނިޔޭގެ ތިމާވެށީގެ ދުވަހާ ގުޅުވައިގެން ސަރުކާރުން ވަނީ ފަސް މިލިއަން ގަސް އިންދުމުގެ މަޝްރޫއެއް މިއަދު އިފްތިތާހުކޮށްފަ އެވެ. މި މަޝްރޫއު އިފްތިތާހު ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ރައީސްގެ އަނބިކަނބަލުން ސާޖިދާ މުހައްމަދެވެ.