"ސިފައިންނާއިމެދު ފިޔަވަޅު އަޅަނީ މިނިވަން ކައުންސިލަކުން، ވަކި މުވައްޒަފަކު ވަކިކުރުމަށް ނާންގާ"

"Sifainnaa medhu fiyavalhu alhanee minivan council akun, Vaki muvazzafaku vaki kurumah naangaa"

ދިވެހި ސިފައިން - ފޮޓޯ ވަގުތު

14 ސެޕްޓެންބަރު 2023

ސިފައިންނާއިމެދު ފިޔަވަޅު އަޅަނީ އެއްވެސް ނުފޫޒެއްނެތި މިނިވަން ކައުންސިލަކުންކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ބުނެފިއެވެ.

މީޑިޔާތަކަށް މައުލޫމާތުދެމުން އެމްއެންޑީއެފްއިން ބުނީ ސިފައިންގެ ޤާނޫނުގެ ދަށުން ހަދާފައިވާ 'ސިފައިން ކުރާ ކުށްތަކަށް އިދާރީ އަދަބު ދިނުމާއިބެހޭ ޤަވާޢިދު' ގެ ދަށުން، އިންސާފުވެރިކަމާއި ޢަދުލުވެރިކަމާއެކު މައްސަލަތައް ބަލާ ފިޔަވަޅު އެޅުމަށްޓަކައި، މިލިޓަރީ ޖަސްޓިސް ކައުންސިލްގެ ނަމުގައި ކައުންސިލެއް އުފައްދާފައިވާކަމަށެވެ. މިއީ ސިފައިންގެ ތާރީޚުގައި ފުރަތަމަ ފަހަރަށް ޢަސްކަރީ އަދުލުގެ ނިޒާމެއް ގާއިމްކުރިފަހަރަކުކަމަށް އެއިދާރާއިން ބުނެއެވެ. ކައުންސިލް އުފައްދާފައިވަނީ ނޮވެމްބަރ 3، 2021 ގައެވެ.

މިނިޒާމް ތަޢާރަފް ކުރެވުމާއެކު ޢަސްކަރީ ފުލުހުންނަށް ހުށަހެޅޭ މައްސަލަތައް ބަލައި ތަޙްޤީޤްކޮށް ފޮނުވަމުންދަނީ މިލިޓަރީ ޖަސްޓިސް ކައުންސިލަށްކަމަށް އެމްއެންޑީއެފްއިން ބުނެއެވެ. މިކައުންސިލުން މައްސަލަތައް ނިންމުމުގައި މައްސަލަ ރައްދުވާ ސިފައިންގެ މީހާއަށް ފުރިހަމައަށް ޖަވާބުދާރީވާނެ ފުރުޞަތާއި ބޭނުންވާނަމަ ޤާނޫނީ ވަކީލުންގެ އެހީތެރިކަންދީ ދިފާޢުވުމުގެ ފުރިހަމަ ފުރުސަތު ފަހިކޮށްދީފައިވާކަމަށް ބުނެއެވެ. އަދި މިލިޓަރީ ޖަސްޓިސް ކައުންސިލުން ނިންމާ ނިންމުންތައް، މިލިޓަރީ ޖަސްޓިސް އެޕީލް ކައުންސިލަށް އެޕީލްކުރުމުގެ ފުރުޞަތުވެސް މައްސަލަ ރައްދުވާ ފަރާތަށް ލިބިދޭ ކަމަށާއި އެންމެ ފަހު މަރުޙަލާއެއްގެ ގޮތުން މިލިޓަރީ ޖަސްޓިސް އެޕީލް ކައުންސިލުގެ ނިންމުން، މުރާޖަޢާކޮށްދިނުމަށް އެދި މިނިސްޓަރަށް ހުށަހެޅުމުގެ ފުރުޞަތުވެސް ލިބިގެންދާނެކަމަށް އެމްއެންޑީއެފްއިން ބުނެއެވެ.

"މި ނިޒާމުގެ ތެރެއިން މައްސަލަތައް ތަޙްޤީޤްކުރާ ފަރާތްތަކާއި މައްސަލަ ނިންމާ ކައުންސިލްތަކަށް އެއްވެސް ފަރާތެއްގެ ނުފޫޒެއްނެތި މިނިވަންކަމާ އަދުލުވެރިކަމާއެކު ހެއްކާއި ޤަރީނާގެ މައްޗަށް ބިނާކޮށް ނިންމުންތައް ނިންމުމުގެ ފުރިހަމަ އިޚްތިޔާރުވަނީ ލިބިދީފަ"

އެހެންކަމުން، ޢަސްކަރީ އަދުލުގެ ނިޒާމް މިހާރު ހަމަޖެހިފައިވާގޮތުން ސިފައިންގެ މީހަކާމެދު މިނޫންގޮތަކަށް ފިޔަވަޅު އެޅުމުގެ އެއްވެސް ފުރުސަތެއް އެއްވެސް ފަރާތަކަށް ލިބިފައިނުވާކަމަށް އެމްއެންޑީއެފްއިން ބުނެއެވެ. އަދި މިނިޒާމުގެ ބޭރުން އެއްވެސް ސިފައިންގެ މީހަކާމެދު ފިޔަވަޅު އަޅަމުން ނުދާކަމަށްވެސް މިނިސްޓްރީން ބުނެފައިވެއެވެ. އަދި އެފަދަ ގޮތަކަށް ޢަމަލުކުރުމަށް ސިފައިންގެ ލީޑަރޝިޕްގެ އެއްވެސް ބޭފުޅަކު އެއްވެސް އިރުޝާދު ދެއްވާފައިނުވާކަމުގައިވެސް ބުނެފައިވެއެވެ.

އެމްއެންޑީއެފްއިން މިފަދައިން މީޑިޔާތަކަށް މައުލޫމާތުދީފައިމިވަނީ ސިފައިންގޭގައި ވަޒީފާއަދާކުރަމުންދާ މުވައްޒަފަކު އުސޫލާއި ޚިލާފަށް ވަކިކޮށްފައިވާކަމަށް އިދިކޮޅު ބައެއް ފަރާތްތަކުން އަޑުއުފުލަމުން ދަނިކޮށެވެ. އެމްއެންޑީއެފްއިން ވަނީ ސިފައިންނަކީ ޤާނޫނުތަކާއި ޤަވާޢިދުތަކަށް ފުރިހަމައަށް ބޯލަނބައި، ސިފައިންގެ ކޯޑް އޮފް އެތިކްސްއާއި ކޯޑް އޮފް ކޮންޑަކްޓާއި އެއްގޮތަށް ޢަމަލުތައް ބަހައްޓާ، ޢަސްކަރީ ރިވެތި ޢަޚްލާޤެއްގެ މަތީގައި ސާބިތުވެ ތިބެންޖެހޭ ބަޔަކަށްވީހިނދު، މިނޫންގޮތަކަށް ޢަމަލުތައް ބެހެއްޓުމަށް ހިތްވަރުލިބޭފަދަ ދޮގު ޚަބަރުތައް އެއްވެސް ފަރާތަކުން ނުފެތުރުމަށް އިލްތިމާސްކޮށްފައެވެ.