ސަރުކާރު ހަރަދު ކުޑަ ކުރުމަށް މިނިވަން ދުވަސް ކުލަގަދަކޮށް ފާހަގަ ނުކޮށް ހަމައެކަނި ޖަލްސާއެއް ބޭއްވުމަށް ރައީސް ނިންމަވައިފި

ސަރުކާރު ހަރަދު ކުޑަ ކުރުމަށް މިނިވަން ދުވަސް ކުލަގަދަކޮށް ފާހަގަ ނުކޮށް ހަމައެކަނި ޖަލްސާއެއް ބޭއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.  

ރައީސް އެކްސް ގައި ކުރެއްވި ޕޯސްޓެއްގައި ވިދާޅުވީ ހަރަދު ކުޑަ ކުރުމަށް ބައެއް ފިޔަވަޅުތައް އެޅުމަށް ނިންމާފައިވާ ކަމަށެވެ. އެގޮތުން ސިޔާސީ މުވައްޒަފުން މަދުކޮށް މިނިވަން ދުވަސް ފާހަގަ ކުރާނީ ވެސް ހަމައެކަނި ޖަލްސާއަކުން ކަމަށް ވިދާޅުވެފައިވެ އެވެ.

"ކުރިޔަށް އޮތް މިނިވަން ދުވަހަށް ފުޅަނދު ބުރާއި، ކުޅިވަރުތަކާއި ރިސެޕްޝަން ފަދަ ކަންކަން ނުބޭއްވުމަށާއި، ހަމައެކަނި މިނިވަން ދުވަސް ފާހަގަކުރުމަށް ޖަލްސާއެއް ބާއްވާ ޚަރަދުތައް އެތައް ގުނައަކުން ކުޑަކުރުމަށް ވާނީ ކަމާބެހޭ ފަރާތްތަކަށް އަންގާފައި،" ރައީސް ވިދާޅުވި އެވެ. 

Advertisement

ސަރުކާރުގެ މާލީ ހާލަތު ގޯސްވެ ފާއިތުވެދިޔަ ތިން އަހަރު ހިފަހައްޓަމުން އައި ފިޗް ރޭޓިން ވެސް ވަނީ ދަށްވެފަ އެވެ.

މިނިވަން ދުވަސް ކުލަ ގަދަކޮށް ފާހަގަ ނުކުރުމަށް ނިންމިއިރު މި ސަރުކާރު އައި ފަހުން އައި ދެ އީދު ވެސް ކުލަ ބޮކި ތަކާއި ގިނަ ހަރަކާތްތަކާއެކު ފާހަގަކޮށްފައިވެ އެވެ. 

ސިޔާސީ މުވައްޒަފުން މަދު ކުރާނެކަމަށް ރައީސް ވިދާޅުވި އިރު ސަރުކާރުގައި 2،000 އަށްވުރެ ގިނަ ސިޔާސީ މުވައްޒަފުން އެބަ ތިއްބެވެ. ބައެއް މިނިސްޓްރީތަކުގައި 20 އަަށްވުރެ ގިނަ ޑެޕިޔުޓީ އަދި ސްޓޭޓް މިނިސްޓަރުން އެބަ ތިއްބެވެ.