ރޮބޯމޭންއާއި ޝަންމު ކުޑަކުޑަ ނިޝާން ހެއްވާލީ ބޮޑު ސަޕްރައިޒަކުން: "ދެން ފޫހިވެގެން އުޅޭކަށް ނުޖެހޭނެ"

Roboman aai Shammu kuda kuda Nishan hevvaaly bodu suprise akun: ''dhen foohi vegen ulheykah nujeheyne''

ނިޝާންއަށް ހަދިޔާ ކުރި ފުރޮޅުލޯ ރިމޯޓް ކޮންޓްރޯލް ގޮނޑީގައި ރޮބޯމޭންއާއި ނިޝާން -- ރޮބޯމޭން

16 ޖުލައި 2023

ރާއްޖޭގައި ރޮބޮޓް ޑާންސް ޖައްސައިގެން މަޝްހޫރުކަން ހޯދި ރޮބޯމޭންއާއި މަޝްހޫރު ލަވަކިޔުންތެރިޔާ ޝަންމޫން މުހައްމަދުގެ (ޝަންމު) އެހީތެރިކަމާއެކު ށ. މިލަންދޫގެ ނިޝާންއަށް ބޮޑު ހަދިޔާއަކާއެކު އޭނާގެ ހުވަފެން ހަގީގަތަކަށް ހަދައިދީފިއެވެ.

ރޮބޯމޭންގެ ފޭސްބުކަށް މިއަދު ދޫކޮށްލި ފަސް މިނަޓުގެ ވީޑިއޯއަށް ގިނަބައެއްގެ ތައުރީފް އަންނަނީ ލިބެމުންނެވެ. މި ވީޑިއޯގައި ދައްކުވައިދެނީ ނުކުޅެދުންތެރިކަން ހުންނަ ކުޑަ ކުއްޖެއްގެ ހުވަފެން ހަގީގަތަކަށް ހަދައިދިނުމަށް ރޮބޯމޭންއާއި އިކުއަޓިކް ވައިބް އަދި އޮބިއޯންގެ އިތުރުން މޯލްޑިވްސް ޕޮލިސް ސާވިސްއިން ކުރި ތަފާތު ކަމެކެވެ. އަސަރުން ފުރިގެންވާ މި ވީޑިއޯއިން ފެންނަ މަންޒަރުތަކަކީ މިލަންދޫގެ ނިޝާން ނަމަކަށް ކިޔާ ކުއްޖަކަށް އެތައް އުފަލަކުން މަހްރޫމް ވެފައިވަނިކޮށް އެ ކުއްޖާއަށް ހާއްސަކޮށްގެން ރޮބޯމޭންއާއި ޝަންމު ދިން ސަޕްރައިޒެކެވެ.

"މޯލްޑިވްސް ޕޮލިސް ސާރވިސްގެ އަމާންވެށި 100ވަނަ ޕްރޮގްރާމްގެދަށުން ބޭއްވުނު ށ.މިލަންދޫ ކުޑަކުދިންގެ ހަވީރުަގައި ބައިވެރި ނުވެވުނެ 10 އަހުރުގެ ނީޝަންގެ ވާހަކަ އެނގުނީ ޝޯ ނިމުނު ފަހުން. ފޯނަށް ލިބުނު މެސެޖަކާއެކު ވަގުތުން އެރަުށު ޕޮލިހާވާަހަަަކަ ދައްކައި އެވަގުތު ނީޝަންއާއި ބައްދަލްކޮއްލަންދެވެން ނެތްނަމަވެސް ގިފްޓްޕެކެއް ރެޑީކޮށްފޮނުވާލެވުނު." މި ފަހުން މިލަންދޫގައި ބޭއްވި ޝޯވްގައި ޕާފޯމް ކުރުމަށްފަހު ރޮބޯމޭންއަށް ނިޝާންގެ ވާހަކަ އެނގުނު ގޮތް ހިއްސާ ކުރަމުން އޭނާ ބުނެފައިވެއެވެ.

"މައުލޫމާތު ލިބުނުގޮތުގައި ނީޝަންއަށް އެހަވީރުގައި ބައިވެރިވާންބޭނުންވެ އެހެންނަމަވެސް ބައިވެރި ނުވެވުނީ އެހިސާބަށްދާނެ ގޮތެއްނެތުމުން. ނީޝަންއަކީ އުފެދުމުގައިވެސް ހައިޑްރޯޝެފެލަސް ވިތް ބައިލެޓްރަލް ވީޕީ ޝަޓިންގެ އެޕިލެޕްސީ ހުންނަކުއްޖެއް."

ރޮބޯމޭން ބުނީ ނީޝަންއަކީ ހިނގައިބިނގައި ނޫޅެވޭ، އުރައިގެން އެއްތަނުން އަނެއްތަނަށް ގެންދަންޖެހޭ ކުއްޖެއް ކަމަށާއި ކޮށްދެވިދާނެ ނުވަތަ އެހީތެރިކަން އެންމެބޭނުންވާކަމެއްގެ ވާހަކަ އެހުމުން ނީޝަންގެ މަންމަ އެދުނީ ފުރޮޅުލީ ރިމޯޓު ގޮނޑިއެއްލިބިއްޖެނަމަ ބޮޑުވަމުންއަންނަ ކުއްޖެއް އުފުލުމުގެ ބުރަ އެތައްގުނަ އަކަށް ލުއިވެގެންދާނެ ކަމަށެވެ. އަދި ނީޝަންއަށް ފަސޭހަކަމާއެކު އެކަނިވެސް ގޭތެރޭ ތަންތަނަށް ދެވޭނެ ކަމަށް އޭނާ މަންމަ ބުނެފައިވެއެވެ.

"އެހެންކަމުން ރޮބޯމޭންގެ ޓީމްގެ ފަރާތުން ނީޝަންގެ އާއިލާގެ މި ހުވަފެން ހަގީގަތަކަށްހަދައިދިނުމަށްޓަކައި ކުރެވުނު މަސަތްކަތުން، ރޮބޯމެން، އޮބިއޯން އަދި އިކުއެޓިކްވައިބްގެ ދީލަތި އެހީތެރިކަމާއި އެކު މާތް اللهގެ އިރާދުފުޅުން މިވަނީ މިކަން ފުރިހަމަކޮށްދެވިފަ."

ރޮބޯމޭންއާއި ޝަންމު ވަނީ އެ ވީޑިއޯގައި ށ.މިލަންދޫ ޕޮލިސް، މޯލްޑިވްސް ޕޮލިސް ސާރވިސަސް، އޮބިއޯން އަދި އިކުއެޓިކްވައިބްގެ އެންމެހާ ފަރާތްތަކުން ނިޝާންގެ ހުވަފެން ހަގީގަތަކަށް ހެދުމަށް ދެއްވި އެހީތެރިކަމަށް ޝުކުރު އަދާކޮށްފައެވެ.

"މިހާރަކު ނުޖެހޭނެ ފޫހިވެގެން އުޅޭކަށް." ނިޝާންއަށް ރޮބޯމޭން އައިސް ފުރޮޅުލީ ގޮނޑު ދައްކާލުމުން އޭނާ ބުންޏެވެ.