ރައީސް ހއ، ހދ، ށ އަދި ނ އަތޮޅަށް

ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުތުރުގެ ބައެއް ރަށްތަކަށް ކުރައްވާ ދަތުރުފުޅުގައި ފުރާ ވަޑައިގެންފި އެވެ. 

ރައީސްގެ މި ދަތުރުފުޅުގައި ހއ، ހދ، ށ އަދި ނ އަތޮޅުގެ ބައެއް ރަށްތަކަށް ވަޑައިގަންނަވާނެ އެވެ.

ހަ ދުވަހުގެ މި ދަތުރުފުޅު ގައި ރައީސް ޒިޔާރަތް ކުރައްވާ ސިޓީތަކާއި ރަށްތަކުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާ ބައްދަލު ކުރައްވާނެ އެވެ. އަދި މިހާރު ކުރިއަށް ދާ މަޝްރޫއުތަކާއި ރައްޔިތުންނަށް މި ވަގުތު ބޭނުންވާ އެންމެ މުހިންމު ކަންކަމާ ގުޅޭ ގޮތުން މަޝްވަރާ ކުރައްވާނެ އެވެ.

Advertisement

ކައުންސިލްތަކުން އެމަނިކުފާނާ ބައްދަލު ކުރެއްވުމަށް އައުމުގެ ބަދަލުގައި، އެމަނިކުފާނުގެ ވިސްނުމަކީ ރަށް ރަށަށް ވަޑައިގެން ކައުންސިލުތަކާ ބައްދަލުކުރެއްވުން ކަމުގައި ރައީސް ވިދާޅުވެފައި ވެއެވެ.

ހަމަ އެހެންމެ ވެރިކަމަށް ވަޑައިގެންނެވުމަށް ފަހު އަތޮޅުތަކަށް ފުރަތަމަ ފެއްޓެވި ދަތުރުފުޅުގެ ތެރޭގައި އެމަނިކުފާނު ވަނީ ރޯދައިގެ ކުރިޔަށް އޮތް މަދު ދުވަސްކޮޅުގެ ތެރޭގައި ރާއްޖޭގެ ހުރިހާ ކައުންސިލުތަކާ ބައްދަލުކުރެއްވުމަށް މަސައްކަތްކުރައްވާނެ ކަމަށް ވިދާޅުވެފަ އެވެ.

އެގޮތުން އެމަނިކުފާނު މިހާތަނަށް އައްޑޫ ސިޓީ، ފުވައްމުލައް ސިޓީ، ތިނަދޫ ސިޓީ، ތ. އަތޮޅު އަދި ގދ. އަތޮޅުގެ ހުރިހާ ކައުންސިލުތަކާ ބައްދަލު ކުރައްވާފައިވެ އެވެ.

އަދި ގއ އަތޮޅުގެ ބައެއް ކައުންސިލްތަކާ ވެސް ބައްދަލު ކުރައްވާފައި ވެއެވެ.