"ޕޮއެޓްރީ ތެރަޕީ"ގެ ދިވެހި ނަމަކަށް "ޅެންފަރުވާ"، ކުރިއަށް ދެން އޮތީ ފަރުވާގެ ދިރާސާ މަރުހަލާ

“ޕޮއެޓްރީ ތެރަޕީ” ގެ ދިވެހި ނަމަކީ "ޅެންފަރުވާ ކަމުގައި ކަނޑައަޅައި ނަން ފާސްކޮށްފިއެވެ. 

 ދިވެހިބަހުގައި އެ ނަމުގެ މާނައަކީ “ބަލި މީހާގެ އިހްސާސްތަކާއި އުދާސްތަކާއި ގުޅޭ ޅެން ހެދުމާއި ކިޔުމާއި އަޑުއެހުމުގެ ތެރެއިން ނަފުސަށް ގެނެސްދޭ ތަސައްލީއެއް. މިއީ ގަދީމީ ޒަމާނުއްސުރެ ހަޟާރަތްތަކުގައި ނަފުސީ ތަފާތު ބަލިތަކަށް ފަރުވާދިނުމުގައި ބޭނުންކުރަމުން އަންނަ ތަރީގާއެއް” ކަމަށް ބަސްކޮމިޓީގެ ނިންމުމުގައިވެ އެވެ.

މި ނަން މިހާރު ވަނީ ބަސްފޮތުގެ އޮންލައިން އިސްދާރުގައި ވެސް ހިމަނާފަ އެވެ. 

Advertisement

ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން ހާމަކޮށްފައިވާ ގޮތުގައި ކުރިއަށް އޮތީ މި ފަރުވާގެ ދިރާސާ މަރުހަލާއެވެ. ދިރާސާކުރުމަށް ވުޒާރާއާއި ގައުމީ ޔުނިވާސިޓީއާ ދެމެދު އެކުލަވާލާފައިވާ ފަހުމުނާމާގައި މި މަހުގެ 22 ވަނަ ދުވަހު ސޮއިކުރާނެކަމަށް އެ ވުޒާރާއިން ބުނެއެވެ. 

މި ފަހުމުނާމާގެ ދަށުން ޅެންފަރުވާއާ ބެހޭ އިލްމީ ދިރާސާތައް ކުރުމާއި ދިވެހި ޅެންތައް ބޭނުންކޮށްގެން ނަފުސީ ތަފާތު ބަލިތަކަށް ދެވިދާނެ ފަރުވާގެ މިންވަރާއި ތަފާތު ބަލިތަކަށް ފަރުވާ ދިނުމުގައި ގެންގުޅޭނެ އުސްލޫބުތަކުގެ މައްޗަށް ދިރާސާތައް ކުރެވިގެންދާނެކަމަށް އެވުޒާރާއިން ބުނެއެވެ. މީގެ އިތުރަށް، ދިވެހިބަސް ކުރިއެރުވުމަށް ކުރެވޭ މަސައްކަތްތަކަށް ބޭނުންވާ ތަފާތު އެހެނިހެން ދިރާސާތައް ކުރުން ވެސް މި ފަހުމުނާމާގެ ދަށު ންގައުމީ ޔުނިވާސިޓީއާއެކު ކުރުމަށް ހަމަޖެހިފައިވާކަމަށް މައުލޫމާތުދެއެވެ. 

ދިވެހި ޅެންވެރިކަން ބޭނުންކޮށްގެން ނަފްސާނީ ހާލަތްތަކަށް ފަރުވާ ދެވޭތޯ ބެލުމުގެ ދިރާސާއެއް ކުރައްވާނެ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް އިއުލާން ކުރެއްވީ މިއަހަރުގެ ޅެންވެރީންގެ ދުވަސް ފާހަގަކުރުމަށް ގދ. ތިނަދޫގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ޅެންފަރުވާގެ މަސައްކަތް ކުރިއަށް ގެންދިއުމަށްޓަކައި ދާއިރާގެ ފަންނީ ބޭފުޅުންނާ އެ ވުޒާރާގެ ފަރާތުން ބައްދަލުކޮށް މަޝްވަރާތައް ކުރިއަށް ގެންގޮސްފައިވެއެވެ. އެގޮތުން، ސޮސައިޓީ ފޯ ހެލްތު އެޑިއުކޭޝަން (ޝީ)، މެންޓަލް ހެލްތް ސެންޓަރ، ޗައިލްޑް ޑިވެލޮޕްމަންޓް ސެންޓަރ އަދި ދަމަަނަވެށީގެ ފަންނީ ބައެއް ބޭފުޅުންނާއެކު މަޝްވަރާ ކޮށްފައިވާކަމަށް އެވުޒާރާއިން މައުލޫމާތުދެއެވެ.