ޕިކަޕް އެކްސިޑެންޓެއްގައި ރ. މަޑުއްވަރީގެ އެސްޖީ، އަސްލަމް ނިޔާވެއްޖެ

pickup accident ehgai R.Madduvareege SG, Aslam niyaavejje

މަޑުއްވަރީ ކައުންސިލްގެ ސެކްރެޓަރީ ޖެނެރަލް އަހްމަދު އަސްލަމް-- މަޑުއްވަރީ ކައުންސިލް

9 އެޕްރީލު 2023

ރ. މަޑުއްވަރީގައި މިއަދު ހިނގި އެކްސިޑެންޓެއްގައި އެރަށު ކައުންސިލްގެ ސެކްރެޓަރީ ޖެނެރަލް އަސްލަމް އަބްދުﷲ ނިޔާވެއްޖެއެވެ.

މަޑުއްވަރީން މި ނޫހާ ވާހަކަދެއްކި މީހަކު ބުނީ އެ ހާދިސާ ހިނގީ ކައުންސިލްގެ ޕިކަޕް ފަހަތަށް ޖެއްސުމުގެ ތެރޭގައި ޕިކަޕް ފަހަތުގައި އެސްޖީ އަސްލަމް ހުންނަވަނިކޮށް ފާރާއި ޕިކަޕްދޭތެރޭ ފިތިގެންކަމަށެވެ.

މި އެކްސިޑެންޓުގައި އަސްލަމަށް ބޮޑެތި ޒަހަމްތަކެއް ލިބިވަޑައިގެންނެވި ކަމަށް އޭނާ ވިދާޅުވިއެވެ.

އަސްލަމަށް އެންމެ ފުރަތަމަ ފަރުވާ ދިނީ މަޑުއްވަރީގައި ހުންނަ ސިއްހީ މަރުކަޒުގައެވެ. އަދި ފަހުން ވަނީ އުނގޫފާރު ރީޖަނަލްސް ހޮސްޕިޓަލަށް ގެންގޮސްފައެވެ. އޭނާ އަވަހާރަވީ އެ ހޮސްޕިޓަލުގައި ފަރުވާ ދެމުން ދަނިކޮށެވެ.

އަސްލަމް ނިޔާވިއިރު، އަނބިކަނބަލުންނާއި ތިން ކުދިން ދުނިޔޭގައި އެބަތިބިއެވެ.

މި އެކްސިޑެންޓާ ގުޅިގެން ފުލުހުން އަދި ވަކި އެއްޗެއް ނުބުނެއެވެ.އެ މައްސަލައާ ގުޅިގެން ފުލުހުން މިއަދު ބުނީ މަޑުއްވަރީގައި ޕިކަޕެއް ފަހަތަށް ޖައްސާލި ވަގުތު އެ ޕިކަޕުގެ ފަހަތުގައި ހުރި މީހެއްގެ ގައިގާ ޕިކަޕުން ޖެހިފައިވާ ކަމުގެ މައުލޫމާތި ލިބިފައިވާ ކަމަށެވެ.

އަނިޔާވި މީހާ އަށް އުނގޫފާރު ހޮސްޕިޓަލުގައި ފަރުވާ ދެމުން ދަނިކޮށް ނިޔާވެފައިވާ ކަމަށް ފުލުހުން ބުނެއެވެ.

ފުލުހުން ބުނީ އެ ހާދިސާގައި ނިޔާވެފައި ވަނީ އުމުރުން 40 އަހަރުގެ ދިވެހި ފިރިހެނެއް ކަމަށެވެ. މައުލޫމާތު ލިބިފައިވާ ގޮތުގައި ނިޔާވި މީހާ އަކީ މަޑުއްވަރީ ކައުންސިލްގެ ސެކްރެޓަރީ ޖެނެރަލްއެވެ.