ޕާކިން ސްޓިކާތަކުގެ ޖޫރިމަނާ މައާފު ކުރުމުގެ ފުރުސަތަށް ހުޅުވާލައިފި

Parking sticker thakuge joorimanaa maafu kurumuge furusathah hulhuvaalaifi

ގަވާއިދާ ހިލާފަށް ޕާކްކޮށްފައި ހުރި ސައިކަލްތަކެއްގައި ސްޓިކާ ޖަހާފައި --

25 ސެޕްޓެންބަރު 2023

ރައީސް އިބްރާހިމް މުހައްމަދު ސޯލިހް މިފަހުން ވައުދުވެވަޑައިގެންނެވި ގޮތަށް ޓްރެފިކާ ގުޅޭ އުސޫލުތަކާ ޚިލާފުވެގެން ކޮށްފައިވާ ޖޫރިމަނާ މަޢާފުކުރުމުގެ ފުރުސަތަށް ހުޅުވާލައިފިއެވެ.

ޕާކިން ޖޫރިމަނާތަކުގެ ތެރެއިން 2018 ވަނަ އަހަރުން ފެށިގެން މިހާތަނަށް ދައުލަތަށް ނުލިބިވާ ހުރިހާ ފައިސާއެއް ރައީސް ސޯލިހް މާފުކުރައްވާފައިވާކަން ސަރުކާރުން އިއުލާން ކުރީ މި މަހުގެ ކުރީކޮޅުއެވެ. އަދި އެއާއެކު ޕާކިން ޖޫރިމަނާ ފިޔަވާ، އެހެނިހެން ޓްރެފިކް ޖޫރިމަނާތައް ދެއްކުން ލުއިކުރުމުގެ ގޮތުން، ބައެއް ހާލަތްތަކުގައި ތަމްރީނެއް ފުރިހަމަކޮށްގެން ޖޫރިމަނާ މާފުވާނެ ގޮތް ސަރުކާރުން ކަނޑައަޅުއްވާފައިވާކަމަށްވެސް ސަރުކާރުން ވަނީ ބުނެފައެވެ.

ޓްރާންސްޕޯޓު މިނިސްޓްރީން މިއަދު ކުރި އިއުލާނުގައި ބުނީ 17 ނޮވެމްބަރު 2018 އިން ފެށިގެން މި މަހުގެ 5 ވަނަ ދުވަހުގެ ނިޔަލަށް ޓްރެފިކާ ގުޅިގެން ކޮށްފައިވާ ޖޫރިމަނާތައް މައާފުކޮށްދިނުމަށް އެދުމުގެ ފުރުސަތު ހުޅުވާލާފައިވާ ކަމަށެވެ. އެގޮތުން ޓްރެފިކް ޖޫރިމަނާ މައާފުކޮށްދިނުމަށް އެދުމުގެ ފުރުސަތު އަންނަ މަހުގެ 25 އާ ހަމައަށް އޮންނާނެ ކަމަށް ވެސް ބުނެފައިވެއެވެ.

މިގޮތަށް ޖޫރިމަނާ މައާފުކޮށްދިނުމަށް އެދެން ޖެހެނީ ސިމްސް ޕޯޓަލް މެދުވެރިކޮށް ކަމަށް އެ މިނިސްޓްރީން ބުނެއެވެ.

ޓްރާންސްޕޯޓް މިނިސްޓްރީން އިތުރަށް ބުނީ، ޖޫރިމަނާ މަޢާފުކުރެވޭނީ ޓްރެފިކާ ގުޅޭ ގަވާއިދުތަކާއި އިޖުތިމާޢީ އެހެން މައްސަލަތަކަށް ހޭލުންތެރިކުރުމަށް މޯލްޑިވްސް ޕޮލިސް ސަރވިސް އިން ފަރުމާކޮށް ކަނޑައަޅާ 20 (ވިހި) ގަޑިއިރުގެ ޓްރެއިނިންގ ޕްރޮގްރާމެއް ފުރިހަމަކުރުމުން ކަމަށެވެ.

އެ އިއުލާން ގައިވާ ގޮތުން ރައީސުލްޖުމްހޫރިއްޔާގެ ނިންމެވުމާ ގުޅިގެން މަޢާފުކުރެވިގެންދާ ޖޫރިމަނާގެ ބާވަތްތަކުގެ ތެރޭގައި ހިމެނޭނީ؛ ލައިސަންސް އާ ގުޅޭ ޖޫރިމަނާއާއި ގަވާއިދާ ޚިލާފަށް ދުއްވައިގެން ކޮށްފައިވާ ޖޫރިމަނާ އަދި އުޅަނދުގައި ހުންނަންޖެހޭ ތަކެތި ހަމަނުވެ ދުއްވުން ނުވަތަ ބޭނުންކޮށްގެން އަރާފައިވާ ޖޫރިމަނާގެ އިތުރުން ޓެކްސީއާ ގުޅޭގޮތުން ކޮށްފައިވާ ޖޫރިމަނާތަކެވެ.