ފަލަސްތީނަށް އެހީވާން އައިއޭސީން ހުޅުވާލި ފަންޑަށް 5 މިލިއަނަށްވުރެ ގިނަ ރުފިޔާ ލިބިއްޖެ

ފަލަސްތީނަށް އެހީވުމަށް އިންޓަނޭޝަނަލް އެއިޑް ކެމްޕެއިން (އައިއޭސީ)ން ހުޅުވާލި ފަންޑަށް ފަސް މިލިއަނަށް ވުރެ ގިނަ ރުފިޔާ ލިބިފައިވާކަމަށް އެ ޖަމިއްޔާއިން ބުނެފިއެވެ.

ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށް ދިވެހި ޖަމިއްޔާ އިންޓަނޭޝަނަލް އެއިޑް ކެމްޕޭން (އައިއޭސީ) އިން ފަންޑަށް ހުޅުވާލީ މިދިޔަ އާދީއްތަ ދުވަހުއެވެ. އައިއޭސީން ބުނިގޮތުގައި އެ ފަންޑަށް މިހާރު ފަސް މިލިއަނަށް ވުރެ ގިނަ ރުފިޔާ ލިބިފައިވެއެވެ.

އައިއޭސީން ބުނީ އެ ފަންޑަށް އެހީ ވުމުގެ ފުރުސަތު މިހާރުވެސް ހުޅުވާލައިފައިވާކަމަށާއި އެ ޖަމިއްޔާގެ ބީއެމްއެލް އެކައުންޓަށް ފައިސާ ފޮނުވައިގެން މިހާރުވެސް ފަލަސްތީނުގެ ރައްޔިތުންނަށް އެހީތެރިވެދެވޭނެ ކަމަށެވެ.

Advertisement

އިޒްރޭލުން މިހާރު ގާޒާ އަށް ހަމަލާ ދެމުންދަނީ ވައިގެ މަގުންނެވެ. އެ ހަމަލާތަކުގައި 1،500 އަށް ވުރެ ގިނަ މީހުން ވަނީ މަރުވެފަ އެވެ. ވައިގެ މަގުން ދޭ ހަމަލާތަކުގައި ވެސް އިޒްރޭލްގެ ހިތް ނުފުރުނެވެ. މިހާރު ތައްޔާރުވަމުން ދަނީ ގްރައުންޑް ހަމަލާތައް ވެސް ގާޒާ އަށް ދިނުމަށެވެ.

އެ ހަމަލާތައް ދޭން ފެށުމުގެ ކުރިން އިޒްރޭލުން އިއުލާންކޮށްފައި ވަނީ ގާޒާގެ އުތުރުގައި ދިރިއުޅެމުންދާ ފަލަސްތީނުގެ 1.1 މިލިއަން މީހުން 24 ގަޑިއިރު ތެރޭ އެ ސިޓީގެ ދެކުނު ސަރަހައްދަށް ހިޖުރަ ކުރުމަށެވެ. އެކަމަކު އދ އިން ބުނަނީ މިހާ ކުޑަ ވަގުތުކޮޅެއްގެ ތެރޭގައި މީހުން ބަދަލުކުރުމަކީ ވުމަށް ވުރެ ނުވުން ގާތް ކަމެއް ކަމަށެވެ. އެކަމުގެ ސަބަބުން ނުރައްކާތެރި އިތުރު ކަންތައްތަކެއް ނުކުންނާނެ ކަމުގެ ބިރު ވެސް އެބައޮތް ކަމަށް އެ ޖަމާއަތުން ބުނެ އެވެ.

އިޒްރޭލުން މިހާރު ވަނީ ގާޒާއިން ފެނާއި ކަރަންޓް އަދި ކާބޯތަކެތި ލިބުން ވެސް ހުއްޓުވައިފަ އެވެ.

އައިއޭސީ މެދުވެރިކޮށް ފަލަސްތީނު ރައްޔިތުންނަށް އެހީ ފޯރުކޮށްދިނުމަށް:

• - ބީއެމްއެލް އިސްލާމިކް
• - އެކައުންޓް ނަމްބަރު: 7770000062741
• - އެކައުންޓް ނަން: International Aid Campaign
• - އެކައުންޓް ލޭބަލް: IAC | EMERGENCY