ނޮވެމްބަރު 3 ގެ އުދުވާނުގެ އަޑީގައި ހުރި ލުތުފީ މިނިވަންވެއްޖެ

November 3 ge udhuvaanuge adeegai huri Luthufee minivan vejje

ރާއްޖެ ހިފަން އުޅުނު ބާގީ އަބްދުﷲ ލުތުފީ ހައްޔަރުކޮށްގެން ގެންދަނީ--

27 ނޮވެންބަރު 2023

ނަވާރަ ދިވެހީން ޝަހީދުކޮށްލި، ނޮވެމްބަރު ތިނެއްގެ އުދުވާނީ ހަމަލާއާ ގުޅިގެން ޖަލުގައި ހުކުމް ތަންފީޒުކުރަމުންދާ ހ. ހާޖަރާގޭ އަބްދުﷲ ލުތުފީގެ ހުކުމުގެ މުއްދަތު މިއަދަށް ހަމަވެއްޖެއެވެ.

ނޮވެމްބަރު ތިނަކާ ގުޅިގެން ލުތުފީގެ މައްޗަށް ކުރި ހުކުމް މިދިޔަ ޖޫން މަހު ތަންފީޒުކޮށް ވަނީ ނިމިފައެވެ. ލުތުފީ މި ފަހުން ތަންފީޒު ކުރީ، ބޭސްފަރުވާއަށް ފޮނުވުމުން ފިލި މައްސަލައިގައި އޭނާގެ މައްޗަށް ކުރި ހުކުމެވެ.

ހޯމް މިނިސްޓްރީން ޖެނުއަރީ 16، 2010 ގައި ލުތުފީ އެއް އަހަރު ދުވަހަށް އަމިއްލަ ޚަރަދުގައި ބޭސްފަރުވާ ކުރުމަށް އިންޑިއާއަށް ފޮނުވުމުން އޭނާ ފިލިއެވެ. ލުތުފީ ހޯދައި ހައްޔަރުކޮށް އޭނާގެ ހުކުމް ތަންފީޒުކުރުމަށް ފުލުހުންނާއި ކަރެކްޝަންސްގެ މައްޗަށް 2012 ވަނަ އަހަރު ކްރިމިނަލް ކޯޓުން އަމުރެއް ވެސް ނެރުނެވެ. އޭގެ ފަހުން ލުތުފީ ހޯދަން ފުލުހުން އިންޓަޕޮލް މެދުވެރިކޮށް ރެޑްނޯޓިސް ވެސް ނެރުނެވެ.

ނުވަ އަހަރާއި ހަ މަހާއި ތިން ދުވަސް ވަންދެން ފިލައިގެން އުޅުނު ލުތުފީ ރާއްޖެ ގެނައީ، ލަންކާގައި ދިން އީސްޓާ ބޮމުގެ ހަލަމާތަކާ ގުޅިގެން އެ ގައުމުގެ ސިފައިން ފެށި އޮޕަރޭޝަނާ އެކު، މެއި 1، 2019 ގައި އޭނާ އަމިއްލައަށް ލަންކާގައި ހުންނަ ދިވެހި އެމްބަސީއާ ހަވާލުވުމުންނެވެ.

ރާއްޖެއިން ބޭރުގައި ނުވަ އަހަރު އޭނާ ފިލައިގެން އުޅުނީ ސިފަ ބަދަލުކޮށްގެން އެކި ނަން ނަމުގައި ކަމަށް ވެއެވެ. އެހެންވެ، އަލުން ރާއްޖެ ގެނައުމަށް ފަހު، މާޗު 10، 2021 ގައި އޭނާގެ މައްޗަށް ހަތް މަހާއި ހަ ދުވަހުގެ ހުކުމެއް ކުރީ އޭނާ ފިލި ކަމުގެ ދައުވާއަށް އިއުތިރާފު ވުމުންނެވެ.

މީގެ 35 އަހަރު ކުރިން ނޮވެމްބަރު ތިނެއްގައި ދިން އުދުވާނީ ހަމަލައިގައި 19 ދިވެއްސަކު ވަނީ ޝަހީދުވެފައެވެ. އެ އުދުވާނުގެ އެންމެ އިސްމޭސްތިރިއަކީ ލުތުފީއެވެ.