ނައީމާގެ މަރުގެ މައްސަލާގައި ދެ މީހަކު ހައްޔަރުކޮށްފި

Naeemaage maruge massalaiga 2 myhaku hayyaru kohffi

މަނަދޫގައި އަނިޔާވެރިކޮށް މަރާލާފައި އޮއްވާ ފެނުނު ނައީމާ —

26 މޭ 2023

ނ. މަނަދޫގައި، ގައިގެ އެކިތަންތަނަށް ވަޅި ހަރައި ނައީމާ މޫސާ މަރާލި މައްސަލާގައި ދެ މީހަކު ހައްޔަރުކޮށްފި އެވެ.

ޕޮލިސް ކޮމިޝަނަރު މުހައްމަދު ކުރެއްވި ޓުވީޓެއްގައި ވިދާޅުވީ ނައީމާގެ މަރުގެ މައްސަލާގައި ފުލުހުން ހިންގާ ތަހުގީގަށް ބޮޑެތި ކުރިއެރުންތަކެއް ލިބެމުން އަންނަ ކަމަށެވެ. ދެ މީހަކު ހައްޔަރުކުރުމުގެ އިތުރުން މައްސަލައިގެ ތަހުގީގަށް މުހިއްމު ހެކިތަކެއް ހުރި ކަމަށް ބެލެވޭ ތަނެއް ފުލުހުން ބަލައި ފާސްކުރަމުން އަންނަ ކަމަށް ވެސް އޭނާ ވިދާޅުވި އެވެ.

"މަރުގެ މައްސަލަ ތަހްގީގް ކުރުމުގެ ތަޖުރިބާކާރު، އިންސްޕެކްޓަ މުހައްމަދު ސާމިހް އިސްކޮށް ހުރެ މާލެއިން ދިޔަ ޓީމާއި ނ. އަތޮޅުގެ ފުލުހުން، މިމަރުގެ ހަގީގަތް ހޯދާ އިންސާފު ގާއިމްކުރުމަށް ކުރަމުންދާ ބުރަ މަސައްކަތް ފަހްރުވެރިކަމާ އެކު ފާހަގަކުރަން،" ޕޮލިސް ކޮމިޝަނަރު ވިދާޅުވި އެވެ.

ނައީމާގެ މަރަށް 50 ދުވަސް މާދަމާ ފުރޭއިރު މިއީ އެ މައްސަލައިގެ ތުހުމަތުގައި ބަޔަކު ހައްޔަރުކުރި ފުރަތަމަ ފަހަރެވެ.

މަރުގެ ތަހުގީގަށް ފުލުހުންގެ ގިނަ އަދަދެއްގެ ފޮރެންސިކް އެކްސްޓާޕުން އެ ރަށުގައި ހަރަކާތްތެރިވި އެވެ. އަދި, އެ ރަށުގެ ގިނަ ބައެއްގެ ޑީއެންއޭ ސާމްޕަލް ވެސް ނެގި އެވެ

މި ތަހުގީގު ފުލުުހުންނަށް އުނދަގޫވި އެއް ސަބަބަކީ ރަށުތެރޭ މީހުންގެ ހަރަކާތްތައް ފެންނަ ސީސީޓީވީ ފުޓޭޖެއް ވެސް އަދި އެފަދަ އެހެން ހެއްކެއް ވެސް ލިބެން ނެތުމެވެ. އެހެންވެ ފުލުހުންގެ މުޅި ތަހުގީގު ބިނާކޮށްފައިވަނީ ފޮރެންސިކް ހެކީގެ މައްޗަށެވެ