ނައީމާގެ މަރާގުޅޭ މައުލޫމާތު އެނގޭނަމަ ހިއްސާކޮށްދިނުމަށް ފުލުހުން އެދިއްޖެ

Naeema ge maraa gulhey mauloomaathu ingey nama hissaakohdhinumah fuluhun edhijje

މަނަދޫ އަންނާރުމާގެ ނައީމާ މޫސާ

8 އެޕްރީލު 2023

ނ މަނަދޫގައި އަނިޔާތަކަކާއެކު މަރުވެފައި އޮއްވައި ފެނުނު ނައީމާ މޫސާގެ މަރާގުޅޭ އެއްވެސް މައުލޫމާތެއް އެނގޭނަމަ އެކަން ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓާ ހިއްސާކޮށްދިނުމަށް ފުލުހުން އެދިއްޖެއެވެ.

ނައީމާ މޫސާގެ މަރުގައި ތުހުމަތުކުރެވޭ ކަންތައްތަކެއް ފާހަގަކުރެވިފައިވާތީ މިމައްސަލައިގެ ތަހުގީގު ކުރިޔަށް ގެންދަނީ ހޮމިސައިޑް އިންވެސްޓިގޭޝަނެއް ގޮތުގައި ކަމަށް ފުލުހުން ބުނެއެވެ. އަދި ފުލުހުންގެ ޚިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ ޚާއްޞަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން، ޕެތޮލޮޖިސްޓެއް މަނަދޫގައި މިހާރު ހަރަކާތްތެރިވަމުން އަންނަ ކަމަށްވެސް ފުލުހުން ބުނެއެވެ.

ނައީމާގެ ހަށިގަނޑު ބަލައި ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަންޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލިޖިސްޓް ނިންމުމުން ހަށިގަނޑު ވަނީ އާއިލާ އާ ހަވާލުކޮށްފައިކަމަށާއި، ނައީމާގެ ހަށިގަނޑު ހޮނިހިރު ދުވަހުގެ ހަވީރު 5:20ގައި ވަނީ ވަޅުލާފައިކަމަށް ފުލުހުން ބުނެއެވެ.

ނައީމާގެ ތިން ދަރިން ތިބެއެވެ. ނަމަވެސް އޭނާ ދިރިއުޅެމުން ދިޔައީ އެ ރަށު ގެއެއްގައި އެކަންޏެވެ.

ނައީމާގެ ޚަބަރެއް ނުވާތާ ދެ ދުވަސް ވުމުން އެކަން ފުލުހުންނަށް ރިޕޯޓުކުރީ އިއްޔެ އިރުއޮއްސި 6:13 ހާއިރެވެ. އޭނާއަކީ ރަށުތެރެ ކުނި ކެހުމުގެ މަސައްކަތް ކުރަމުންދާ އެ ރަށު ކައުންސިލްގެ މުވައްޒަފެކެވެ.

ފުލުހުން ނައީމާގެ ކޮޓަރީގެ ދޮރު ހަލާކު ކޮށްލައިގެން ވަންއިރު، އޭނާ އޮތީ ބިންމަތީގައި މަރުވެފައެވެ.