މިނިސްޓަރު އަމީނަށް ބަދަލުގެ ގޮތުގައި 2.1 މިލިއަން ދިނުމުން ފާޑުކިޔުން

Minister ameen ah badhaluge gothugai 2.1 million dhinumun faadukiyany

ޓްރާންސްޕޯޓް މިނިސްޓަރު އަމީން ކެބިނެޓް ބައްދަލުވުމަކަށް ވަޑައިގަންނަވަނީ؛ އަމީނަށް ދެ މިލިއަން ރުފިޔާގެ ބަދަލެއް ދީފައި ވަޒީފާގެ މައްސަލަ ނިންމާލައިފި --- ފޮޓޯ: ރައީސް އޮފީސް

ހަބަރު

21 ނޮވެންބަރު 2023

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ ވަޒީރު މުހައްމަދު އަމީން، އައިލެންޑް އޭވިއޭޝަންގެ ވަޒީފާއިން ވަކި ކުރި މައްސަލަައިގައި އޭނާއަށް ދެ މިލިއަން ރުފިޔާގެ ބަދަލެއް ދޭން އެ ކުންފުނިން ނިންމައި، ކޯޓުން ބޭރުގައި މައްސަލަ ހައްލު ކުރުމުން ފާޑުކިޔުންތައް އަމާޒުވެއްޖެއެވެ.

ގައުމީ އެއާލައިން، މޯލްޑިވިއަންގެ ފްލައިޓް އޮޕަރޭޝަންސް ޑިރެކްޓަރުގެ މަގާމުގައި ހުންނަވަނިކޮށް ވަޒީރު އަމީން އެމަގާމުން ވަކިކޮށްފައިވަނީ 2019 ވަނަ އަހަރުގެ ތެރޭގައެވެ. އޭރު އޭނާ މަގާމުން ވަކިކޮށްފައިވަނީ އޭނާއާ ދެކޮޅަށް މޯލްޑިވިއަންގެ ބައެއް ޕައިލެޓުން އިހްތިޖާޖުވެސް ކޮށްފައިވަނިކޮށެވެ.

މި މައްސަލައިގައި އަމީންގެ ފަރާތުން ސިވިލް ކޯޓަށް މައްސަލަ ހުށަހަޅާފައިވަނީ އޭނާ މަގާމުން ވަކިކޮށްފައިވަނީ ވަޒީފާގެ އެއްބަސްވުމާ ހިލާފަށް ކަމަށް ބުނެއެވެ.

މިގޮތުން އަމީންގެ ފަރާތުން އެދިފައިވަނީ މޯލްޑިވިއަންގައި އޭނާ ކުރިން ހުރި މަގާމު ނުވަތަ އެ މަގާމާއި އެއްވަރަށް ފައިސާއާއި އިނާޔަތްތައް ލިބޭ އެހެން ވަޒީފާއެއް ހަމަޖެއްސުމުގެ އިތުރުން ވަޒީފާއިން ވަކިކުރި ދުވަހުން ފެށިގެން ދައުވާ ހުށަހެޅި ދުވަހާ ހަމައަށް އޭނާއަށް ލިބެންޖެހޭ ދެ މިލިއަނަށްވުރެ ގިނަ ރުފިޔާ ހޯދުމަށެވެ.

މި މައްސަލައިގައި ސިވިލް ކޯޓުން މިދިޔަ އަހަރުގެ ޖޫން މަހުގެ 28 ވަނަ ދުވަހު ކުރި ހުކުމުގައި ބުނެފައިވަނީ އަމީން ވަޒީފާއިން ވަކިކޮށްފައިވަނީ ގޯސްކޮށް ކަމުގައެވެ. އަދި ކުރިން ހުރި މަގާމު ނުވަތަ އެ ފެންވަރުގެ އެހެން މަގާމެއް 15 ދުވަހުގެ ތެރޭގައި ދިނުމަށް ވެސް ވަނީ އަމުރުކޮށްފައެވެ.

ހަމައެހެންމެ، މަގާމުން ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރަ އާއި އިނާޔަތްތައް ވެސް އޭނާ އަށް ދިނުމަށް ސިވިލް ކޯޓުން ކުރި ހުކުމުގައި ވަނި އަމުރުކޮށްފައެވެ.

ކޯޓުގައި ކުރިއަށް ދިޔަ އ މައްސަލަ ކޯޓުން ބޭރުގައި ހައްލުކޮށް، ސިވިލް ކޯޓުގެ އަމުރާއި އެއްގޮތަށް އަމީނަށް 2،202،580 ބަދަލުގެ ގޮތުގައި ދިނުމަށް އައިލެންޑް އޭވިއޭޝަނުން ނިންމާފައިވާކަން ކޯޓުން މިއަދު ވަނީ ހާމަކޮށްފައެވެ.

އަމީންއަށް މިނިސްޓަރުކަން ލިބުނުތާ ހަފުތާއެއް ނުވަނީސް އޭނާއަށް ބަދަލުގެ ގޮތުގައި ލިބެންޖެހޭ ފައިސާ ކޯޓުން ބޭރުގައި ނިންމުމުން ގިނަބައެއްގެ ފާޑުކިޔުންތައް ސޯޝަލް މީޑިއާގައި ދަނީ އަމާޒުވަމުންނެވެ.